ស្ងាត់ៗ…មីយ៉ាន់ម៉ា កំពុងសម្ងំធ្វើកំណែទម្រង់ទាក់ទាញវិនិយោគិន !
មីយ៉ាន់ម៉ា ៖ យោងតាមសេចក្តីរាយការណ៍របស់សារព័ត៌មាន Bangkok Post ដែលបានចេញផ្សាយកាលពីថ្ងៃច័ន្ទបានឲ្យដឹងថា អ្នកដឹកនាំ Aung San Suu…
មីយ៉ាន់ម៉ា ៖ យោងតាមសេចក្តីរាយការណ៍របស់សារព័ត៌មាន Bangkok Post ដែលបានចេញផ្សាយកាលពីថ្ងៃច័ន្ទបានឲ្យដឹងថា អ្នកដឹកនាំ Aung San Suu…
មីយ៉ាន់ម៉ា ៖ យោងតាមសេចក្តីរាយការណ៍របស់សារព័ត៌មាន Bangkok Post ដែលបានចេញផ្សាយកាលពីថ្ងៃច័ន្ទបានឲ្យដឹងថា អ្នកដឹកនាំ Aung San Suu Kyi របស់មីយ៉ាន់ម៉ាបានជំរុញដល់វិនិយោគិនជុំវិញពិភពលោកឲ្យវិនិយោគក្នុងប្រទេសមីយ៉ាន់ម៉ា ។
អ្នកស្រីបានលើកឡើងពីសក្តានុពលសេដ្ឋកិច្ចរបស់ប្រទេសខ្លួន ទីតាំងដ៏មានភាពទាក់ទាញ ទីផ្សារក្នុងស្រុកដែលកំពុងតែលូតលាស់ និងប្រជាជនវ័យក្មេងជាច្រើនក្នុងប្រទេសជាដើម។ អ្នកស្រីក៏បានលើកឡើងពីការធ្វើកំណែទម្រង់មួយចំនួនដែលត្រូវបានអនុម័តដោយរដ្ឋាភិបាលអ្នកស្រីតាំងពីឆ្នាំ ២០១៦មកដែរ ។
អ្នកស្រីបាននិយាយនៅសន្និសីទវិនិយោគមួយក្នុងរដ្ឋធានីថា «ខ្ញុំឈរនៅទីនេះដើម្បីបញ្ជាក់ពីការប្តេជ្ញាក្នុងការបន្តធ្វើកំណែទម្រង់ និងកសាងបរិស្ថានដែលល្អសម្រាប់ការវិនិយោគ»។
បើទោះជាអ្នកស្រីមិនបានផ្តល់ព័ត៌មានលម្អិតពីកំណែទម្រង់ដែលបានលើកឡើងពិតមែនក្តី សន្និសីទនេះអាចផ្តល់ជាសញ្ញាបង្ហាញពីការផ្លាស់ប្តូរនៃវិធីដែលរដ្ឋាភិបាលប្រើដើម្បីទាក់ទាញសហគមន៍អាជីវកម្ម ។
មកដល់បច្ចុប្បន្ននេះ វិនិយោគិនបានរិះគន់ថា រដ្ឋាភិបាលផ្តោតសំខាន់ភាគច្រើនលើការបញ្ចប់ជម្លោះយោធាក្នុងប្រទេស និងមើលរំលងកំណែទម្រង់សេដ្ឋកិច្ច និងតម្រូវការរបស់អាជីវកម្មជាដើម ។
អ្នកស្រី Suu Kyi មិនបានលើកឡើងពីបញ្ហាជនជាតិភាគតិចក្នុងប្រទេសខ្លួន និងឥទ្ធិពលដែលបញ្ហានេះមានលើការវិនិយោគទេ ប៉ុន្តែអាជីវកម្មជាច្រើនព្រួយបារម្ភថាការដាក់ទណ្ឌកម្មសេដ្ឋកិច្ចអាចនឹងកើតមានឡើងសាជាថ្មី ។
គួរបញ្ជាក់ផងដែរថា បេសកកម្មមួយក្រោមអង្គការសហប្រជាជាតិបានឲ្យដឹងថា យោធាក្នុងប្រទេសមីយ៉ាន់ម៉ាបានប្រព្រឹត្តិការសម្លាប់ទ្រង់ទ្រាយធំ និងការរំលោភលក្ខណៈជាក្រុមទៅលើជនជាតិរ៉ូហ៊ីងយ៉ាដោយមានគោលបំណងប្រល័យពូជសាសន៍ និងបានស្នើឲ្យមានការកាត់ក្តីមេបញ្ជាការធំៗផងដែរ ប៉ុន្តែមីយ៉ាន់ម៉ាបានបដិសេធនឹងការស្វែងរកនេះ ។
ជាមួយគ្នានេះផងដែរ មូលនិធិរូបិយវត្ថុអន្តរជាតិបាននិយាយកាលពីឆ្នាំមុនមកថា វិនិយោគិនបរទេសមួយចំនួនបានពន្យាពេលគម្រោងរហូតដល់មានភាពប្រាកដប្រជាទាក់ទិននឹងស្ថានការក្នុងប្រទេសសិន។
លើសពីនេះទៅទៀត សហភាពអ៊ឺរ៉ុបកំពុងតែពិចារណាដាក់ទណ្ឌកម្មពាណិជ្ជកម្មលើប្រទេសមីយ៉ាន់ម៉ា ដែលអាចដកហូតសិទ្ធិក្នុងការនាំចេញទៅកាន់សហភាពនេះដោយមិនចាំបាច់បង់ពន្ធទាំងស្រុង។ ការសម្រេចចិត្តនេះនឹងបង្កផលប៉ះពាល់យ៉ាងខ្លាំងលើវិស័យវាយនភ័ណ្ឌ និងផ្តល់ហានិភ័យដល់ការងារជាច្រើនផងដែរ ៕
ចែករំលែកព័តមាននេះ