យោងតាមភ្នាក់ងារសារព័ត៌មាន Bangkok Post ដែលបានចេញផ្សាយកាលពីថ្ងៃទី២៦ មករា កន្លងមកនេះបានឲ្យដឹងថា លោករដ្ឋមន្ត្រីកិច្ចការសេដ្ឋកិច្ច Mohamed Azmin Ali…
យោងតាមភ្នាក់ងារសារព័ត៌មាន Bangkok Post ដែលបានចេញផ្សាយកាលពីថ្ងៃទី២៦ មករា កន្លងមកនេះបានឲ្យដឹងថា លោករដ្ឋមន្ត្រីកិច្ចការសេដ្ឋកិច្ច Mohamed Azmin Ali បាននិយាយមកថា ប្រទេសម៉ាឡេស៊ីនឹងបោះបង់ចោលគម្រោងផ្លូវរថភ្លើងឆ្នេរខាងកើតដែលមានតម្លៃ២០ប៊ីលានដុល្លារ និងមានក្រុមហ៊ុន China Communications Construction Co Ltd ជាក្រុមហ៊ុនគ្រប់គ្រងគម្រោង ។
លោក Azmin បានប្រាប់ដល់អ្នកសារព័ត៌មាននៅគូឡាឡាំពួរថា «ការសម្រេចចិត្តនេះកើតមានឡើងព្រោះគម្រោងនេះមានការចំណាយច្រើនពេក និងច្រើនជាងសមត្ថភាពហិរញ្ញវត្ថុរបស់រដ្ឋាភិបាល» ។
«ប្រសិនបើគម្រោងនេះមិនត្រូវបានបោះបង់ទេនោះ រដ្ឋាភិបាលនឹងត្រូវទប់ទល់នឹងអត្រាការប្រាល់ប្រមាណ៥០០លានរីងហ្គីត (១២១លានដុល្លារ) ជារៀងរាល់ឆ្នាំ ហើយយើងមិនមានសមត្ថភាពក្នុងការរ៉ាប់រងវាទេ ។ ដូច្នេះគម្រោងនេះត្រូវតែបោះបង់ចោលដោយមិនប៉ះពាល់ដល់ទំនាក់ទំនងជាមួយនឹងប្រទេសចិន»។
លោកបានបន្ថែមថា សំណងលើកទឹកចិត្តក្នុងការបោះបង់គម្រោងនឹងត្រូវបានគិតគូរដោយក្រសួងហិរញ្ញវត្ថុដែលកំពុងតែសិក្សាដើម្បីធានាថាការចំណាយមិនប៉ះពាល់ដល់ថវិការដ្ឋាភិបាល ។ លោកបានបន្តថា រដ្ឋាភិបាលបានទទួលបានសំណើរជាច្រើន ប៉ុន្តែពួកគេមិនទាន់សម្រេចចិត្តថាពួកគេអាចរកក្រុមហ៊ុនថ្មីសម្រាប់គម្រោងផ្លូវរថភ្លើងនេះទេ ។
កាលពីថ្ងៃព្រហស្បត្តិ៍កន្លងមក ក្រុមហ៊ុន China Communications Construction បានផ្តល់ដំណឹងដល់បុគ្គលិកខ្លួនបន្ទាប់ពីក្រសួងហិរញ្ញវត្ថុម៉ាឡេស៊ីណែនាំកាលពីឆ្នាំមុនឲ្យផ្អាករាល់កិច្ចសន្យាដែលទាក់ទិននឹង Malaysia Rail Link Sdn ។
Malaysia Rail Link ត្រូវបានចាត់តាំងឲ្យត្រួតត្រាលើគម្រោងខ្សែរថភ្លើងឆ្នេរខាងកើតដោយមានក្រុមហ៊ុន China Communications Construction ជាម្ចាស់គម្រោងធំ។ ការចំណាយសរុបសម្រាប់គម្រោងនេះត្រូវបានគិតថាស្មើប្រមាណ ១៩.៦ប៊ីលានដុល្លារ ៕
ចែករំលែកព័តមាននេះ