យោងតាមសេចក្តីរាយការណ៍របស់ភ្នាក់ងារសារព័ត៌មាន AFP ដែលបានចេញផ្សាយកាលពីថ្ងៃទី២៨ ខែមករា ឆ្នាំ២០១៩ បានឲ្យដឹងថា ការផ្អាកដំណើរការរដ្ឋាភិបាលអាមេរិកអស់៥សប្តាហ៍មកនេះបានធ្វើឲ្យ GDP របស់ប្រទេសនេះធ្លាក់ចុះអស់១១ប៊ីលានដុល្លារ ។
ការិយាល័យថវិកាសភាបាននិយាយក្នុងរបាយការណ៍មួយថា ៣ប៊ីលានដុល្លារ ឬ០.០២%នៃ GDP អាមេរិកនឹងបានមកវិញពេលដែលរដ្ឋាភិបាលចាប់ផ្តើមដំណើរការ ។ យ៉ាងណាក្តីរបាយការណ៍នេះបានឲ្យដឹងថា ផលប៉ះពាល់ដែលសំខាន់ជាងនេះទៀតគឺផលប៉ះពាល់ដល់អាជីវកម្ម និងពលករក្នុងស្រុកដែលមិនអាចរកប្រាក់ចំណូលដែលខាតបង់មកវិញបានឡើយ ។
ពួកគេបានបន្ថែមថា ការលូតលាស់សេដ្ឋកិច្ចក្នុងត្រីមាសខាងមុខនាឆ្នាំនេះអាចនឹងកើនឡើងតិចតួចប៉ុណ្ណោះដែលជួយដល់ការខាតបង់នៅត្រីមាសចុងក្រោយនាឆ្នាំ ២០១៨ និងដើមឆ្នាំ ២០១៩ បាន ។
ការផ្អាកដំណើរការរដ្ឋាភិបាលនេះជាការផ្អាកដំណើរការមានរយៈពេលយូរជាងគេក្នុងប្រវតិ្តសាស្ត្រអាមេរិក និងបានបង្កឲ្យមន្ត្រីរដ្ឋាភិបាលប្រមាណ ៨០០,០០០នាក់ធ្វើការដោយមិនមានប្រាក់បៀវត្សន៍ តែពួកគេអាចនឹងទទួលបានប្រាក់លើកទឹកចិត្តវិញនៅសប្តាហ៍នេះ ។
យ៉ាងណាក្តី មន្ត្រីជាប់កិច្ចសន្យាជាមួយនឹងរដ្ឋាភិបាលដូចជាបុគ្គលិកធ្វើការគិតម៉ោងប្រហែលជាមិនអាចទទួលបានសំណងលើកទឹកចិត្តឡើយ ។
លោកប្រធានាធិបតី ដូណាល់ ត្រាំ (Donald Trump) បានព្រមព្រៀងកាលពីថ្ងៃសុក្រ ថានឹងបើកដំណើរការរដ្ឋាភិបាលសហព័ន្ធជាបណ្តោះអាសន្នសិនដោយមិនត្រូវការថវិកាសម្រាប់ជញ្ចាំងកាត់ព្រំប្រទល់អាមេរិក និងម៉ិកស៊ិក ។
របាយការណ៍ខាងលើបានកត់សម្គាល់ទៀតថា ការព្យាករណ៍របស់ពួកគេមិនបានគិតការចំណាយផ្សេងៗដែលពិបាកក្នុងការគណនាទេ ហើយវាអាចកាន់តែធ្ងន់ធ្ងរជាងនេះទៅទៀតប្រសិនបើការផ្អាកដំណើរការរដ្ឋាភិបាលបន្តកើតមានឡើង ៕
ចែករំលែកព័តមាននេះ