រាជធានីភ្នំពេញ៖មរណភាពរបស់តារាចម្រៀងខេមរៈ ស្រីពៅ អ្នកសិល្បៈជាច្រើន ពិសេសអ្នកធ្លាប់ស្និទ្ធស្នាលបានសម្តែងការសោកស្តាយ និងនឹកឃើញអនុស្សាវរីយ៍ជាមួយគ្នា ។ ជាក់ស្តែងតារាចម្រៀងមាស សុខសោភា និងតារាសម្តែងនៅ សូនីតា បានរំលឹកពីអនុស្សាវរីយ៍ជាមួយខេមរៈ ស្រីពៅ ។
ជាមួយរូបថតអនុស្សាវរីយ៍កន្លងទៅ មាស សុខសោភា បានបង្ហោះតាមហ្វេសប៊ុកជាមួយខ្លឹមសារថា «បងពិតជាមានអារម្មណ៍រន្ធត់ក្តុកក្តួល ក្រៀមក្រំជាទីបំផុត ចំពោះមរណភាពរបស់ប្អូនស្រីខេមរៈ ស្រីពៅ ។ សម្រាប់បង ! ប្អូនស្រី គឺជាក្មេងស្រីគួរឲ្យស្រលាញ់ម្នាក់ គ្រប់ពេលបងនិយាយលេងក្រោយឆាកតន្រី្ត ប្អូនតែងតែសើចសប្បាយ រីករាយ ពោរពេញដោយស្នាមញញឹម ប្អូនតែងតែគោរព បងៗសិល្បៈរៀមច្បង ទោះប្អូនមិនសូវចេះនិយាយច្រើនតែប្អូនចូលចិត្តការសប្បាយជាមួយ បងៗសិល្បៈ… ។
នៅពេលដែលបាត់វត្តមានប្អូនពីសិល្បៈរយៈពេល៣ទៅ៤ឆ្នាំនេះ មហាជនក៏ដូចជា បងៗអ្នកសិល្បៈតែងតែបារម្ភពីសុខទុក្ខរបស់ប្អូន ចង់ជួបប្អូន តែគ្មានឱកាសនឹងបានជួប រហូតបានទទួលដំណឹងដ៏សែនក្រៀមក្រំនេះ បងស្ទើរតែមិនជឿព័ត៌មានមួយនេះ ។
ជាចុងក្រោយបងសូមចូលរួមរំលែកទុក្ខដល់ក្រុមគ្រួសារប្អូនស្រី ខេមរៈ ស្រីពៅ ហើយសូមប្អូនទៅកាន់សុគតិភព កើតជាតិ ណាៗសូមកុំឲ្យអភ័ព្វដូចជាតិនេះ … បង និងមហាជនគ្រប់រូបនឹងចងចាំប្អូនស្រីទុកក្នុងចិត្តជារៀងរហូត…»។
ចំណែកតារាសម្តែងនៅ សូនីតា បានបង្ហោះរូបភាពមួយចំនួនស្តែងពីការសម្តែងរួមគ្នានៅលើទឹកដីអាមេរិកជាមួយនឹងសារសសេរថា «ទាំងអស់នេះជារូបភាពពួកយើងទៅសម្តែងនៅអូស្ត្រាលីលើកដំបូងក្នុងឆ្នាំ២០០៩ រយៈពេល១ខែកន្លះ ដែលពួកយើងនៅទីនោះ ពួកយើងស្រលាញ់គ្នាប្រៀបដូចបងប្អូន មានទាំងពេលខ្លះ យើងបន្លាចខ្មោចគ្នា ហើយដេញធាក់គ្នាពេញបន្ទប់ ។
អ្នកណាងើបមុនតែងតែទាញភួយឲ្យភ្ញាក់ដើម្បីក្រោកស្មើគ្នា បង្អាប់គ្នា ពិតជាសប្បាយខ្លាំងណាស់ មកដល់ខ្មែរក៏យើងឧស្សាហ៍សួរសុខទុក្ខគ្នាដែរ តែ៥-៦ឆ្នាំចុងក្រោយនេះខ្ញុំលែងបានសូវជួបឯង គិតថាឯងសុខសប្បាយហើយ ប៉ុន្តែមិននឹកស្មានថាគ្នាត្រូវទទួលដំណឹង អកុសលថាឯងបានលាចាកលោកហើយ។ គ្នាពិបាកទទួលយកដំណឹងនេះណាស់ ឯងមនុស្សល្អណាស់ ម៉េចបានឆាប់ទៅចោលពួកយើងលឿនម៉្លេះ សូមឲ្យឯងបានទៅកាន់សុគតិភព មិត្តល្អរបស់ខ្ញុំ »។
នៅលើផេកហ្វេសប៊ុកផ្លូវការរបស់ផលិតកម្មសាន់ដេ បានផ្សព្វផ្សយបទចម្រៀង ចាស់ៗរបស់តារាចម្រៀងនាងខេមរៈ ស្រីពៅ ដើម្បីសម្តែងការចងចាំ និងក្តីអាឡោះអាល័យចំពោះការបាត់បង់តារាចម្រៀងរបស់ខ្លួន ។
តារាចម្រៀងនាងខេមរៈ ស្រីពៅ បានទទួលមរណភាពកាលពីថ្ងៃទី២៥ ខែមករា ឆ្នាំ២០១៩ នៅមន្ទីរពេទ្យមួយក្នុងប្រទេសឥណ្ឌា ក្នុងអាយុ២៨ឆ្នាំ បន្ទាប់ពីនាងបានតស៊ូជាមួយជំងឺអស់រយៈពេល៤ឆ្នាំ ៕
ចែករំលែកព័តមាននេះ