ខេត្តបាត់ដំបង៖ បើគិតត្រឹមព្រឹកថ្ងៃទី២៨ មករា នេះ គឺមានរយៈពេល៣យប់៣ថ្ងៃហើយ ដែលកម្លាំងកងរាជអាវុធហត្ថខេត្តបានឃាត់ខ្លួនបុរសម្នាក់ដែលអះអាងថា ខ្លួនជាមន្ត្រីយោធាថ្នាក់ឧត្តមសេនីយ៍យកមកសួរនាំនៅទីបញ្ជាការកងរាជអាវុធហត្ថខេត្ត ពាក់ព័ន្ធករណី«ឆបោក និងជ្រើសរើសកងទ័ពខុសច្បាប់»។ ប៉ុន្តែបើតាមប្រភពព័ត៌មានថា…
ខេត្តបាត់ដំបង៖ បើគិតត្រឹមព្រឹកថ្ងៃទី២៨ មករា នេះ គឺមានរយៈពេល៣យប់៣ថ្ងៃហើយ ដែលកម្លាំង
កងរាជអាវុធហត្ថខេត្តបានឃាត់ខ្លួនបុរសម្នាក់ដែលអះអាងថា ខ្លួនជាមន្ត្រីយោធាថ្នាក់ឧត្តមសេនីយ៍យកមកសួរនាំនៅទីបញ្ជាការកងរាជអាវុធហត្ថខេត្ត ពាក់ព័ន្ធករណី«ឆបោក និងជ្រើសរើសកងទ័ពខុសច្បាប់»។ ប៉ុន្តែបើតាមប្រភពព័ត៌មានថា គេនឹងបញ្ជូនជនសង្ស័យរូបនេះ ទៅប្រគល់ឱ្យតុលាការចាត់ការតាមនីតិវិធីនៅព្រឹកថ្ងៃទី២៨ មករា នេះហើយ ។
សំណុំរឿងនេះ ហាក់មិនត្រូវបានគេទម្លាយឱ្យដឹងជាសាធារណៈនោះទេ ។ ពោលគឺកម្លាំងកងរាជអាវុធហត្ថបានធ្វើឡើងយ៉ាងស្ងាត់ស្ងៀមបំផុត សូម្បីទំនាក់ទំនងតាមទូរស័ព្ទ ក៏មន្ត្រីជំនាញហាក់មានការបិទបាំងមិនផ្ដល់ព័ត៌មានដែរ ក្រោមហេតុផលផ្សេងៗធ្វើជាលេស ។
យ៉ាងនេះក្ដី បើតាមប្រភពបានឲ្យដឹងថា ជនសង្ស័យដែលត្រូវឃាត់ខ្លួននោះឈ្មោះទេព ពេជ្រ ហៅទេព វិសាល ឬរួន សឿម ភេទប្រុស អាយុ៥៩ឆ្នាំ រស់នៅភូមិដាំស្ពៃ សង្កាត់ស្លាកែត ក្រុងបាត់ដំបង ។ ជនសង្ស័យដែលមានឈ្មោះរាប់ភ្លេចរូបនេះ ត្រូវបានកម្លាំងកងរាជអាវុធហត្ថខេត្ត សហការជាមួយកម្លាំងអាវុធហត្ថស្រុកសំឡូតឃាត់ខ្លួន កាលពីរសៀលថ្ងៃទី២៥មករា នៅភូមិឆករកា ឃុំសំឡូត ស្រុកសំឡូត យោងតាមបណ្ដឹងជនរងគ្រោះប្រមាណពី៥ទៅ៦នាក់ ដែលប្ដឹងជននេះពីបទ«ឆបោក» ប្រព្រឹត្តកាលពីអំឡុងខែមិថុនា២០១៨ កន្លងទៅ។
តាមរយៈការតឺនុយឯកសណ្ឋាន និងរថយន្តដែលមានពាក់ស្លាកលេខ «ខ.ម» យ៉ាងហ៊ឺហាផង ជននេះបានតាំងនាមខ្លួនឯងជាឧត្តមសេនីយ៍យោធាម្នាក់ តែសមត្ថកិច្ចរកមិនឃើញថា ជននេះនៅអង្គភាពណាមួយឱ្យប្រាកដឡើយ ។ ប៉ុន្តែបែរជារកឃើញថា ជននេះ មានតួនាទីជាប្រធានអង្គការការពារបរិស្ថាន ដែលមានប្រវត្តិដ៏អាស្រូវបំផុតនៅក្នុងខេត្តបាត់ដំបង ។ ជាពិសេសនៅតំបន់«អណ្ដូងកន្ទូត» ក្នុងឃុំដូនបា ស្រុកគាស់ក្រឡ។
លោកគឹម ហឿង ដែលជាជនរងគ្រោះម្នាក់ បានប្រាប់កោះសន្តិភាពតាមទូរស័ព្ទ នៅព្រឹកថ្ងៃទី២៨ មករា ថា «ខ្ញុំបានចូលធ្វើយោធានេះ តាមគេតាមឯង ដែលគេចូលមុនៗធ្លាប់ស្គាល់ឈ្មោះទេព វិសាល នេះ។ ការចូលនេះ គេយកលុយពីខ្ញុំចំនួន៤,៥០០ដុល្លា ដើម្បីបានចូលក្របខណ្ឌយោធា តែក្រោយពីបានកាតសម្គាល់ខ្លួនមានគេប្រាប់ថា កាតនេះមិនប្រក្រតី ហើយខ្ញុំសួរនាំទៅអ្នកដែលចូលជាមួយគ្នា គេនិយាយដូច្នេះដែរ ទើបពួកខ្ញុំប្ដឹងទៅសមត្ថកិច្ចតែម្ដង»។ រីឯជនរងគ្រោះម្នាក់ទៀត គឺលោកឈីវ ប៊ុនឆៃ បានប្រាប់កោះសន្តិភាពដែរ ក្នុងពេលតែមួយដែរថា «ខ្ញុំអស់លុយតិចជាងគេ គឺអស់ត្រឹមតែ៤លានរៀលទេ»។
បើពិនិត្យជាក់ស្ដែងលើកាតសម្គាល់ខ្លួន យោធាចំនួន៦សន្លឹកដែលកោះសន្តិភាពទទួលបាន កាលពីថ្ងៃទី២៧មករា ដែលគេអះអាងថា សុទ្ធតែជាកាតសម្គាល់ខ្លួនជនរងគ្រោះ ដែលចាញ់បោកលោកឧត្តមសេនីយ៍ក្លែងក្លាយ ទេព វិសាល គឺគេឃើញមានចុះ «លេខ.. អត្តលេខ.. កាលបរិច្ឆេទ.. និងតួនាទី ដែលមានបោះត្រា នាយឧត្តមសេនីយ៍ ទៀ ប៉ាញ់» យ៉ាងត្រឹមត្រូវទៀតផង ។ ប៉ុន្តែសមត្ថកិច្ចបានបញ្ជាក់ថា នេះជា«ត្រាក្លែងបន្លំ» ដែលជនប្រព្រឹត្តត្រូវប្រឈមនឹងផ្លូវច្បាប់យ៉ាងធ្ងន់ធ្ងរបំផុត។
ជាមួយនឹងការឃាត់ខ្លួន ឈ្មោះទេព ពេជ្រ ហៅទេព វិសាល ឬរួន សឿម ដែលមានបទល្មើសស្ទើររាប់ភ្លេចនេះ បើតាមជនរងគ្រោះបានបញ្ជាក់ប្រាប់កោះសន្តិភាពថា ភរិយាជនសង្ស័យបានណាត់ជួបជនរងគ្រោះទាំងអស់ នៅក្នុងហាងកាហ្វេមួយកន្លែង កាលពីរសៀលថ្ងៃទី២៧ មករា ក្នុងក្រុងបាត់ដំបង ដើម្បីសម្រប
សម្រួលបង់សំណងខ្លះវិញ ដល់ជនរងគ្រោះជាថ្នូរនឹងការបញ្ចប់រឿងប្ដឹងផ្ដល់គ្នាទៅតុលាការ ។
កោះសន្តិភាព នៅមិនទាន់ទទូលបានចម្លើយបែបណា ពីជនសង្ស័យឈ្មោះទេព ពេជ្រ ហៅទេព វិសាល ឬ រួន សឿម និងភរិយារបស់ជននេះនៅឡើយទេ គិតត្រឹមរសៀលថ្ងៃទី២៨ មករា នេះ ។ ហើយក៏មិនទាន់ដឹងអំពីចំណាត់ការរបស់សមត្ថកិច្ច តើត្រូវបញ្ជូនជនសង្ស័យទៅតុលាការ ឬយ៉ាងណានោះដែរ ជុំវិញសំណុំរឿងនេះ ? ព្រោះសំណុំរឿងនេះ មន្ត្រីជំនាញហាក់ព្យាយាមបិទបាំង និងបានរុញដាក់គ្នាអំពីការផ្ដល់ព័ត៌មាន បើទោះជាអ្នកសារព័ត៌មាន បានព្យាយាមសួរនាំមន្ត្រីទទូលខុសត្រូវកិច្ចការនេះ កាលពីថ្ងៃទី២៧ មករា ជាបន្តបន្ទាប់ក្ដី ។ ប៉ុន្តែបើតាមប្រភពពីមន្ត្រីកងរាជអាវុធហត្ថដែរបានឱ្យដឹងថា មន្ត្រីជំនាញនឹងកសាងសំណុំរឿងបញ្ជូនលោកឧត្តមសេនីយ៍យោធាក្លែងក្លាយ ឈ្មោះរួន សឿម នេះ ទៅប្រគល់ជួនតុលាការ នៅព្រឹកថ្ងៃទី២៨ មករា នេះ ព្រោះមន្ត្រីជំនាញបានរាយការណ៍ជូនលោកព្រះរាជអាជ្ញាបានជ្រាបជាមុនរួចហើយ ។
ព័ត៌មានលម្អឹតនឹងមានផ្សាយជូនបន្ត ។
ចែករំលែកព័តមាននេះ