កាលពីការចុះផ្សាយលើកមុន យើងបានដឹងពីការងារណាខ្លះ ដែលនឹងបាត់បង់នៅ២០ឆ្នាំខាងមុខ ដោយសារតែមានការជំនួសដោយគ្រឿងយន្ត និងបច្ចេកវិទ្យាឆ្លាតវៃសិប្បនិម្មិត (AI) ។ នៅពេលនេះ យើងងាកមកមើលថាការងារណាខ្លះ ដែលអាចនឹងត្រូវប៉ាន់ បើទោះបីជាមានការវាយលុករបស់បច្ចេកវិទ្យាក៏ដោយ។ ខាងក្រោមនេះ គឺជាការងារទាំង៥ប្រភេទដែលគេត្រូវការខ្លាំងនៅពេលអនាគត ៖
១. អ្នកផលិតមនុស្សយន្ត ៖ ដោយសារតែពេលខាងមុខ តម្រូវការមនុស្សយន្តនឹងមានការកើនឡើងជាលំដាប់សម្រាប់ការប្រើប្រាស់ក្នុងវិស័យការងារ អាជីពជាអ្នកផលិតមនុស្សយន្ត គឺជាអ្វីដែលមនុស្សត្រូវការ។ នេះគឺជាហេតុផលងាយស្រួលយល់បំផុត។ អ្វីដែលសំខាន់ មនុស្សយន្តក៏អាចខូចបានដែរ។ ដូចនេះ ក្នុងនាមជាអ្នកផលិត ក៏ចេះជួសជុលដែរ។ រកលុយបានគ្រប់ច្រក !
២. អ្នកគ្រប់គ្រងវត្ថុធាតុដើម ៖ គ្រឿងយន្ត និងមនុស្សយន្ត មិនមែនចេះកើតមកដោយខ្លួនវានោះទេ ។ គេត្រូវការវត្ថុធាតុដើមជាច្រើន ទម្រាំតែអាចផលិតចេញជារូបរាងបាន ។ ដូចនេះយើងគ្មានអ្វីឆ្ងល់ទេថា ហេតុអ្វីបានជាការងារគ្រប់គ្រងវត្ថុធាតុដើមត្រូវប៉ាន់ ។
៣. អ្នកបណ្តុះអវយវៈសិប្បនិម្មិត ៖ បើនិយាយទៅគឺដូចជានៅក្នុងរឿងវិទ្យាសាស្ត្រ តែតាមការប៉ាន់ស្មានរបស់អ្នកស្រាវជ្រាវ ការងារជាអ្នកបណ្តុះអវយវៈសិប្បនិម្មិត គឺជាការងារពេញនិយមនៅសតវត្សរ៍ទី២២ ។ នៅពេលបច្ចុប្បន្ននេះ អ្នកពិការដៃជើង ត្រូវប្រើជើងឬដៃជ័រជំនួស ហើយអ្នកខូចគ្រឿងក្នុង ត្រូវចាំទទួលយកការបរិច្ចាគពីគេ តែថ្ងៃមុខទៅ គេអាចបណ្តុះទាំងអវយវៈ និងគ្រឿងក្នុងសម្រាប់អ្នកដែលមានបញ្ហា ។
៤. អ្នកពាក់ព័ន្ធនឹងកីឡាអេឡិចត្រូនិក (ហ្គេម) ៖ នេះគឺទាំងអ្នកផលិត អ្នកវិនិយោគ និង អ្នកលេងផ្ទាល់ គឺនឹងសុទ្ធតែត្រូវប៉ាន់ ឱ្យតែពាក់ព័ន្ធជាមួយនឹងការលេងកីឡាអេឡិចត្រូនិក។ មិនបាច់ទៅមើលនៅទីណាច្រើនទេ ពេលនេះគឺគេចាប់ផ្តើមមានការប្រកួតតាមកុំព្យូទ័រ ដែលមានប្រាក់រង្វាន់រាប់សិបម៉ឺនដុល្លារហើយ។
៥. ចិត្តវិទូ និង គ្រូពេទ្យព្យាបាលផ្លូវចិត្ត ៖ បញ្ហាផ្លូវចិត្តនាពេលនេះ កំពុងតែត្រូវបាននិយាយដោយមហាជនជាច្រើន។ នៅពេលមនុស្សចាប់ផ្តើមមានអ្វីៗគ្រប់ហើយ គេចាប់ផ្តើមគិតគូរពីសុខភាពផ្លូវចិត្តរបស់ខ្លួន។ ដោយសារតែការងារនៅពេលខាងមុខកាន់តែមានសម្ពាធ ភាពតានតឹងក្នុងអារម្មណ៍កាន់តែកើនឡើង។ គេពិតជាត្រូវការអ្នកដែលអាចពិភាក្សា ផ្តល់ប្រឹក្សា និង ព្យាបាលបញ្ហាទាំងនេះណាស់ ។
តើនៅមានការងារអ្វីទៀត ដែលលោកអ្នកគិតថា នឹងត្រូវប៉ាន់នៅថ្ងៃខាងមុខ ? សូមជួយបន្ថែម !
ចែករំលែកព័តមាននេះ