រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានរំលឹករូបថតចាស់ដែលស្ទើមិនជឿថា ប្រទេសកម្ពុជាមិនអាចរីកចម្រើនលឿងដល់ពេលបច្ចុប្បន្ននេះ ។
សម្តេចបានសរសេរលើបណ្តាញសង្គមនៅថ្ងៃទី២៨ មករានេះថា« មើលរូបថតខ្ញុំ និងភរិយា គឺមិនគួរអោយជឿថា កម្ពុជាយើងបានរីកចម្រើនលឿនមកដល់ដំណាក់កាលនេះ! យើងលំបាកវេទនាខ្លាំងណាស់ទម្រាំបានឆ្លងរួចផុតពីសង្គ្រាម និងរបបប្រល័យពូជសាសន៍ប៉ុលពត» ។
អមដោយរូបថតមួយសន្លឹកជាមួយឧត្តមភរិយាសម្តេចបានបន្តថា នៅពេលនេះ«យើងឃើញស្រាប់នឹងភ្នែកហើយសំណង់អគារទាបខ្ពស់តូចធំ ផ្លូវថ្នល់ខ្វាត់ខ្វែង ស្ពានអាកាស និងរោងចក្រ សាលារៀន មន្ទីរពេទ្យ បូរី សណ្ឋាគារ និងផ្សារទំនើប…កំពុងកើតឡើងយ៉ាងច្រើនបន្តបន្ទាប់នៅក្នុងប្រទេស ។ កម្ពុជាធ្លាប់បានឆ្លងកាត់ឆ្អែតដោយសារសង្គ្រាម និងរបបប្រល័យពូជសាសន៍ដូច្នេះយើងត្រូវតែទប់ស្កាត់មិនអោយកើតមានឡើងសារជាថ្មីទៀតឡើយ»។
សម្តេចក៏បានលើកឡើងថា ខ្ញុំសប្បាយចិត្ត និងមានជំនឿជឿជាក់លើការខិតខំប្រឹងប្រែងរបស់បងប្អូន និងការចូលរួមដ៏សកម្មពីវិស័យឯកជន ដែលបានកែប្រែជីវភាពរស់នៅរបស់ពលរដ្ឋកាន់តែល្អប្រសើរ ព្រមទាំងបានជួយពង្រឹងដល់ខឿនសេដ្ឋកិច្ចជាតិរឹងមាំទៀតផង ។ ជាមួយគ្នានោះដែរសម្តេចក៏បានគូសបញ្ជាក់ថា«នៅក្រោមការដឹកនាំរបស់ខ្ញុំ គឺសូមធានាច្បាស់ថា កម្ពុជានឹងបន្តរស់នៅក្នុងម្លប់សន្តិភាពដ៏យូរអង្វែងដែលជាបំណងប្រាថ្នារបស់ប្រទេសជាតិយើងទាំងមូល» ៕
ចែករំលែកព័តមាននេះ