រាជធានីភ្នំពេញ ៖ បុរសជាអ្នករត់ម៉ូតូឌុបម្នាក់ត្រូវជនដៃដល់ម្នាក់ទៀតនាំយកទៅចាក់សម្លាប់៩កាំបិតប្រឡាក់សុទ្ធតែឈាម ដើម្បីប្លន់យកម៉ូតូនៅក្នុងផ្ទះសំណាក់ បង្កឱ្យមានការភ្ញាក់ផ្អើលកាលពីម៉ោង៧យប់ ថ្ងៃទី២៧ ខែមករា ឆ្នាំ២០១៩ នៅក្នុងផ្ទះសំណាក់យីហោ «ចន្ធូ ត្រជាក់» ជាន់ទី៣ បន្ទប់លេខ៣ ផ្លូវបេតុងសូនី ស្ថិតក្នុងភូមិឬស្សី ខណ្ឌមានជ័យ ។
សពជនរងគ្រោះខាងលើឈ្មោះ យ៉ាន ជឿន ភេទប្រុស អាយុ៣៧ឆ្នាំ មុខរបររត់ម៉ូតូឌុប មានស្រុកកំណើតនៅភូមិព្រែកសំបួរ ឃុំអង្គរបុរី ស្រុកអង្គរបុរី ខេត្តតាកែវ ចំណែគម៉ូតូដែលជនសង្ស័យប្លន់យកទៅម៉ាក់ហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1FL 9986 និងជញ្ជៀន១វង់ ។
តាមប្រភពពីអ្នកមើលការខុសត្រូវបានឱ្យដឹងថា មុនកើតហេតុ នៅម៉ោង៥ល្ងាច គឺមានបុរស២នាក់ក្នុងនោះមានជនរងគ្រោះ និងជនសង្ស័យ បានជិះម៉ូតូម៉ាកហុងដាឌ្រីមមួយគ្រឿងមកជួលបន្ទប់ផ្ទះសំណាក់ដេក លុះពួកគេចូលផ្ទះសំណាក់មួយសន្ទុះ ស្រាប់តែមានបុរសម្នាក់ជាជនសង្ស័យចុះមកក្រោមយកម៉ូតូជិះចេញទៅ ពេលនោះម្ចាស់ផ្ទះសំណាក់សួរថា ទៅណា បុរសរូបនោះប្រាប់ថា ទៅយកស្រីមកដេក ហើយក៏ជិះម៉ូតូចេញបាត់ទៅ ។
ប្រភពដដែលបន្តទៀតថា បន្ទាប់ពីរង់ចាំបុរសជាជនសង្ស័យយូរពេក ហើយណាមួយមានការសង្ស័យផងនោះ រូបគាត់ក៏ឡើងទៅមើលបន្ទប់ជនសង្ស័យឃើញបន្ទប់ចាក់សោ ហើយរូបគាត់បានយកកូនសោមកចាក់រកមើល ស្រាប់តែឃើញជនរងគ្រោះដេកស្លាប់នៅក្នុងបន្ទប់ទឹកដោយខ្លួនប្រឡាក់សុទ្ធតែឈាម ព្រមទាំងឃើញកូនកាំបិតចិត្តបន្លែ១នៅក្បែរជនរងគ្រោះផងដែរ។
ប្រភពដដែលបន្តថា បន្ទាប់ពីហេតុការណ៍បែបនេះ រូបគាត់ក៏ទៅផ្តល់ដំណឹងដល់សមត្ថកិច្ចប៉ុស្តិ៍នគរបាលស្ទឹងមានជ័យ៣ ឱ្យចុះទៅមើលកន្លែងកើតហេតុ ថា ពិតមានមនុស្សស្លាប់មែន តែមិនទាន់ដឹងថា ករណីអ្វីឱ្យប្រាកដនោះទេ បន្តិចក្រោយមកសមត្ថកិច្ចមូលដ្ឋានក៏ទំនាក់ទំនងទៅខាងជំនាញគ្រប់ជាន់ថ្នាក់ ដើម្បីពិនិត្យ និងធ្វើកោសល្យវិច័យលើសពជនរងគ្រោះតែម្តង ។ ក្នុងការពិនិត្យសមត្ថកិច្ចរកឃើញកាត់គ្រីម៉ូតូ២សន្លឹក ទូរស័ព័្១គ្រឿងជារបស់ជនរងគ្រោះ ហើយជនរងគ្រោះគឺមានស្នាមចាក់ចំនួន៩កាំបិត ទើបសមត្ថកិច្ចដាក់បន្ទុកថា ជាករណីចាក់សម្លាប់ប្លន់យកម៉ូតូ ។
ក្រោយពេលកើតហេតុ សមត្ថកិច្ចបានទំនាក់ទំនង់ហៅក្រុមគ្រួសារឱ្យទទួលយកសពជនរងគ្រោះយកទៅធ្វើបុណ្យនៅស្រុកកំណើតខេត្តតាកែវ ៕
ចែករំលែកព័តមាននេះ