ខេត្តមណ្ឌលគិរី ៖ បុរសម្នាក់បានស្លាប់ភ្លាមៗយ៉ាងអាណោធអាធ័មនៅកណ្តាលទ្រូងផ្លូវ ខណៈកំពុងជិះម៉ូតូកែច្នៃដឹកឈើជាច្រើនកំណាត់ ស្រាប់តែជួបគ្រោះអកុសលដួលម៉ូតូ ធ្វើឱ្យកំណត់ឈើសង្កត់ពីលើ បណ្តាលឱ្យស្លាប់។
តាមសេចក្តីរាយការណ៍បានឲ្យដឹងថា កាលពីវេលាម៉ោង៥ល្ងាចថ្ងៃទី២៦ មករា ២០១៩ គេឃើញបុរសម្នាក់បានជិះម៉ូតូមួយគ្រឿងមានដឹកឈើចេញពីតំបន់ការពារសត្វព្រៃកែវសីមា ឆ្ពោះទៅស្រុកស្នូល ខេត្តក្រចេះ លុះមកដល់ចំណុចមុខផ្ទះសំណាក់ស៊ីមប៉ោហៀក លើបណ្តោយផ្លូវជាតិលេខ៧៦ ក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ស្រាប់តែដួលម៉ូតូធ្វើឲ្យឈើដែលដឹកពីក្រោយសង្កត់ពីលើចំក្បាល បណ្តាលឱ្យស្លាប់មួយរំពេច។
ជនរងគ្រោះដែលស្លាប់ឈ្មោះ ឡឹក ភេទប្រុស ស្នាក់នៅក្នុងភូមិអូររណា ឃុំស្រែខ្ទុម ស្រុកកែវសីមា។
គិតត្រឹមសប្តាហ៍ទី៤ចុងខែមករា ២០១៩នេះ មានបុរសចំនួន២នាក់ហើយដែលបានស្លាប់ដោយសារការដឹកជញ្ជូនឈើតាមម៉ូតូ ហើយកាលពីអំឡុងឆ្នាំ២០១៨ មានករណីបែបនេះកើតឡើងស្ទើររាប់មិនអស់ ។
ក្រុមអ្នកតាមដានបរិស្ថានបាននិយាយថា ប្រជាពលរដ្ឋក្រីក្ររកស៊ីដឹកឈើតាមម៉ូតូបានស្លាប់ជាបន្តបន្ទាប់ ព្រោះតែជំនួញឈើបានកក្រើកឡើងវិញក្នុងតំបន់ស្រុកកែវសីមា ៕
ចែករំលែកព័តមាននេះ