ខេត្តស្ទឹងត្រែង ៖ សេចក្តីរាយការណ៍ឱ្យដឹងថា ស្ត្រីម្នាក់បានធ្លាក់ប្រឡាយទឹកបណ្តាលឱ្យលង់ស្លាប់យ៉ាង
អាណោចអាធ័ម ។ ហើយអ្វីដែលកាន់តែធ្វើឱ្យសង្វេគចិត្តទៀតនោះ គឺបានបន្សល់កូនស្រីអាយុ១៣ឆ្នាំម្នាក់ ដែលនាងមិនដឹងទៅទីពឹងអ្នកណា ខណៈឪពុកមិនបាននៅជិតថែទាំទៀត ។ ហេតុការណ៍ដ៏រន្ធត់នេះ កើតឡើង កាលពីវេលាម៉ោងជាង៦យប់ថ្ងៃទី២៥ មករា ស្ថិតនៅឃុំស្រែក្រសាំង ស្រុកសៀមបូក ខេត្តស្ទឹងត្រែង ។
សេចក្តីរាយការណ៍បន្តថា ស្ត្រីដែលស្លាប់ឈ្មោះអួយ ឆេង អាយុ៤៧ឆ្នាំ ជាស្ត្រីមេម៉ាយ មានកូនស្រីអាយុ១៣ឆ្នាំម្នាក់ឈ្មោះស្រី រ័ត្ន សព្វថ្ងៃរស់នៅជាមួយគ្នា ។ ប្រភពបន្តថា មុនកើតហេតុ នៅវេលាម៉ោងជិត៦យប់ថ្ងៃនោះ ស្ត្រីជាម្តាយបានប្រាប់កូនឱ្យយកប៉ោតនិងខោអាវប្រឡាក់ៗទៅបោកគក់ ។ គាត់រកចង់បោកខោអាវនោះនៅមាត់ទន្លេទេ តែពេលវេលាមិនអំណោយផល គាត់មកបោកនៅប្រឡាយទំនប់ទឹកនេះវិញ (ទីតាំងកើតហេតុ) ព្រោះនៅជិតផ្ទះផង ។
កូនស្រី១៣ឆ្នាំរូបនេះ បានឱ្យដឹងទាំងទឹកភ្នែកទៀតថា ពេលម្តាយកំពុងអង្គុយបោកគក់ខោអាវនៅទីនោះ បានប្រមាណជា១០នាទី ស្រាប់តែធ្លាក់ផ្កាប់មុខទៅក្នុងប្រឡាយទឹកតែម្តង ។ ហើយនាងភ័យណាស់ បានខំចាប់ទាញម្តាយមកវិញ តែទាញមិនបាននោះទេ ទើបរត់ទៅភូមិវិញ ដើម្បីហៅអ្នកស្រុកឱ្យមកជួយ ។ នាងបន្តថា តែពេលនាងត្រឡប់មកវិញ អ្វីៗបានហួសពេលអស់ ដោយម្តាយបានឈ្លក់ទឹកលង់ស្លាប់បាត់ទៅហើយ ។
ចែករំលែកព័តមាននេះ