ខេត្តកំពង់ធំ ៖ សេចក្តីរាយការណ៍ឱ្យដឹងថា ករណីគ្រោះថ្នាក់ចរាចរណ៍ដ៏រន្ធត់ រវាងរថយន្តម៉ាកឡិចស៊ីសRx-300 ពាក់ស្លាកលេខភ្នំពេញ2AQ-7684 ជាមួយរថយន្តធុនធ្ងន់ម៉ាកហ៊ីយ៉ាន់ដាយ ពាក់ស្លាកលេខភ្នំពេញ3C-3075 ក្នុងទិសដៅផ្ទុយគ្នាបុកយ៉ាងទំហឹង បណ្តាលឱ្យមានមនុស្សរងរបួសធ្ងន់-ស្រាល៤នាក់ កើតឡើងលើផ្លូវជាតិលេខ៦ (ចន្លោះគីឡូម៉ែត្រលេខ២០២-២០៣) វេលាម៉ោង០១ និង៣០រសៀលថ្ងៃទី២៥ មករា ភូមិក្រសាំង(ខ) ឃុំសានគរ ស្រុកកំពង់ស្វាយ ខេត្តកំពង់ធំ ។
សេចក្តីរាយការណ៍បន្តថា អ្នកបើកបររថយន្តឡិចស៊ីសត្រូវគេស្គាល់មានឈ្មោះ សែ ពន្លឺ ភេទប្រុស អាយុ១៩ឆ្នាំ មុខរបរអ្នកបើកបររថយន្ត រស់នៅភូមិគោកឃ្លាំង សង្កាត់គោកឃ្លាំង ខណ្ឌសែនសុខ រាជធានីភ្នំពេញ តែរបួសស្រាល បច្ចុប្បន្នត្រូវសមត្ថកិច្ចនាំខ្លួនទៅកាន់អធិការដ្ឋាននគរបាលស្រុកកំពង់ស្វាយដើម្បីសាកសួរ ។ ដោយឡែក អ្នករួមដំណើ២នាក់ ១-ឈ្មោះ ADAM WOJCIECH ភេទប្រុស អាយុ៥៤ឆ្នាំ(ជនជាតិហូឡង់) (របួសធ្ងន់បានបញ្ជូនទៅមន្ទីរពេទ្យភ្នំពេញ) និង២-ឈ្មោះAGNIESZKA ភេទស្រី អាយុ៤៦ឆ្នាំ(ជនជាតិហូឡង់)(របួសធ្ងន់បញ្ជូនទៅមន្ទីរពេទ្យភ្នំពេញ) ។
រីឯខាងអ្នកបើកបររថយន្តហ៊ីយ៉ាន់ដាយវិញ មានឈ្មោះឈួន រតនា មុខរបរអ្នកបើកបររថយន្តដែរ ភេទប្រុស អាយុ៤១ឆ្នាំ រស់នៅភូមិពន្លាជ័យ ឃុំបន្ទាងស្ទោង ស្រុកស្ទោង ខេត្តកំពង់ធំ (គ្មានរបួស) ។ អ្នករួមដំណើរ២នាក់ទៀត ១-ឈ្មោះកន ផានិត ភេទប្រុស អាយុ២៥ឆ្នាំ (របួសធ្ងន់) រស់នៅភូមិចេក ឃុំកំពង់ចិនជើង ស្រុកស្ទោង ខេត្តកំពង់ធំ និង២-ឈ្មោះ អ៊ាង វណ្ណនី ភេទប្រុស អាយុ២៩ឆ្នាំ (របួសធ្ងន់) រស់នៅភូមិឈើទាល ឃុំកំពង់ចិនត្បូង ស្រុកស្ទោង ខេត្តកំពង់ធំ ។
ចំពោះមូលហេតុ ត្រូវនគរបាលចរាចរណ៍បានឱ្យដឹងបឋមថា គឺបង្កឡើងភាគីរថយន្តឡិចស៊ីស ដែលព្យាយាមបើកជែងក្នុងស្ថានភាពគ្រោះថ្នាក់ ។
ចែករំលែកព័តមាននេះ