ប្រទេសវៀតណាម ៖ ភ្នាក់ងារសារព័ត៌មាន Vietnam News បានឲ្យដឹងកាលពីថ្ងៃចន្ទ កន្លងមកថា តម្លៃជ័រកៅស៊ូពិភពលោកបានកើនឡើងយ៉ាងខ្លាំងក្នុងរយៈពេលប៉ុន្មានសប្តាហ៍កន្លងមកនេះ ។
យោងទៅតាមសារព័ត៌មាន Bloomberg តម្លៃជ័រកៅស៊ូលើ Tokyo Commodity Exchange (TOCOM) បានកើនឡើង ០.៨% កាលពីថ្ងៃសុក្រមកស្មើ ១.៧ ដុល្លារក្នុងមួយគីឡូក្រាម ឬកើនឡើង ៩.៤% តាំងពីចុងឆ្នាំ២០១៨ មក ។
អង្គការជាច្រើនបានឲ្យដឹងដែរថា កំណើនតម្រូវការក្នុងឆ្នាំ២០១៩ នេះនឹងបង្កើនតម្លៃកៅស៊ូកាន់តែខ្លាំងឡើងទៀត ។ ជាមួយគ្នានេះផងដែរ សមាគមន៍ប្រទេសផលិតជ័រកៅស៊ូធម្មជាតិ (ANRPC) បានឲ្យដឹងមកថា ទិន្នផលជ័រកៅស៊ូធម្មជាតិជុំវិញពិភពលោកនឹងកើនឡើង ៥.៨% បើធៀបនឹងឆ្នាំមុនមកស្មើ ១៤.៦៩ លានតោនក្នុងឆ្នាំ២០១៩ ខណៈដែលតម្រូវការនឹងកើនឡើង ៣.៦% មកស្មើ ១៤.៧៣ លានតោនផងដែរ ។
តម្លៃជ័រកៅស៊ូធម្មជាតិនឹងទទួលរងឥទ្ធិពលពីតម្លៃប្រេងឆៅដែលនឹងកើនឡើង ។ កាលពីថ្ងៃសុក្រ តម្លៃប្រេងរបស់ក្រុមហ៊ុន Brent បានកើនឡើង ២.៥% មកស្មើ ៦២.៧០ ដុល្លារក្នុងមួយធុង ។
លើទីផ្សារភាគហ៊ុនរបស់ប្រទេសវៀតណាមវិញ ភាគហ៊ុនរបស់ក្រុមហ៊ុនជ័រកៅស៊ូបានកើនឡើងយ៉ាងខ្លាំងក្នុងកំឡុងពេល៣សប្តាហ៍ដំបូងនាឆ្នាំនេៈព្រោះតែកំណើននៃការធ្វើពាណិជ្ជកម្ម ប៉ុន្តែភ្នាក់ងារមួយចំនួនបានឲ្យដឹងថា ប្រទេសវៀតណាមបាននាំចេញច្រើនជាងមុន ប៉ុន្តែប្រាក់ចំណូលបានពីការនាំចេញបែរជាធ្លាក់ចុះទៅវិញ ។
នាយកដ្ឋានពន្ធដារវៀតណាមបានឲ្យដឹងមកថា ការនាំចេញជ័រកៅស៊ូរបស់ប្រទេសនេះបានធ្លាក់ចុះ ៣.៨%មកស្មើ ១៧២,៨០០តោន កាលពីខែធ្នូ ខណៈដែលប្រាក់ចំណូលបានពីការនាំចេញធ្លាក់ចុះអស់ ៥.៨%មកស្មើ ២១០.៥២លានដុល្លារផងដែរ ។ ប៉ុន្តែការនាំចេញសរុបប្រចាំឆ្នាំ ២០១៨បានកើនដល់ ១.៥៦លានតោន ឬស្មើ ២.០៩ប៊ីលានដុល្លារ ៕
ចែករំលែកព័តមាននេះ