រាជធានីភ្នំពេញ ៖ ម៉ូតូដឹកសាំងមួយគ្រឿងដែលបើកបោះពួយក្នុងល្បឿនលឿន បានជ្រុលទៅប៉ះជាមួយរថយន្តមួយគ្រឿង ដួលអូសកកិតនឹងថ្នល់ បណ្តាលឲ្យឆេះយ៉ាងសន្ធោរសន្ធៅ ហើយអ្នកបើកម៉ូតូក៏ត្រូវភ្លើងឆេះស្លាប់យ៉ាងអាណោចអាធ័មដូចគេដុតទាំងរស់ ។ ករណីនេះ ក៏បណ្តាលឲ្យឆេះរាលទៅដល់រថយន្តឡិចស៊ីសមួយគ្រឿង…
រាជធានីភ្នំពេញ ៖ ម៉ូតូដឹកសាំងមួយគ្រឿងដែលបើកបោះពួយក្នុងល្បឿនលឿន បានជ្រុលទៅប៉ះជាមួយរថយន្តមួយគ្រឿង ដួលអូសកកិតនឹងថ្នល់ បណ្តាលឲ្យឆេះយ៉ាងសន្ធោរសន្ធៅ ហើយអ្នកបើកម៉ូតូក៏ត្រូវភ្លើងឆេះស្លាប់យ៉ាងអាណោចអាធ័មដូចគេដុតទាំងរស់ ។
ករណីនេះ ក៏បណ្តាលឲ្យឆេះរាលទៅដល់រថយន្តឡិចស៊ីសមួយគ្រឿង ដែលចតនៅលើចិញ្ចឹមផ្លូវនិងឆេះបង្គោលភ្លើងរងការខូចខាតផងដែរ ។ ហេតុការណ៍ខាងលើ បង្កឱ្យមានការភ្ញាក់ផ្អើលឡើងកាលពីវេលាម៉ោង៩ និង៤០នាទីព្រឹកថ្ងៃទី២៤ ខែមករា នៅចំណុចកែងរវាងផ្លូវលេខ ៣៣៧និងផ្លូវលេខ៥២៨ ក្នុងសង្កាត់បឹងកក់ទី១ ខណ្ឌទួលគោក ។
យុវជនដែលត្រូវភ្លើងឆេះស្លាប់នេះ ត្រូវបានគេស្គាល់ថា ឈ្មោះ ស៊ីម សម្ផស្ស ហៅហ៊ាង អាយុ១៦ឆ្នាំ មានទីលំនៅក្នុងភូមិដំណាក់ពង្រ ឃុំមៀន ស្រុកព្រៃឈរ ខេត្តកំពង់ចាម ជាកម្មករដឹកប្រេងឱ្យស្ថានីយប្រេង លីហ៊ាង ។ តាមអ្នកឃើញហេតុការណ៍ឱ្យដឹងថា គេឃើញជនរងគ្រោះបានជិះម៉ូតូ១គ្រឿងម៉ាក MD ពណ៌ក្រហម គ្មានផ្លាកលេខ ដឹកសាំងចំនួន៤ប៊ីដុង ធ្វើដំណើរតាមផ្លូវលេខ៣៣៧ ក្នុងទិសដៅពីខាងលិចទៅខាងកើត ។ នៅពេលមកដល់ចំណុចខាងលើ បានគេចរ៉ឺម៉កមួយគ្រឿងក៏ប៉ះក្បាលរថយន្តមួយគ្រឿងមិនស្គាល់ម៉ាក ធ្វើដំណើរតាមផ្លូវលេខ៥២៨ ក្នុងទិសដៅពីខាងជើងទៅខាងត្បូងឆ្លងផ្លូវ។
តាមព័ត៌មានឱ្យដឹងទៀតថា គ្រោះថ្នាក់នេះ បណ្តាលឱ្យម៉ូតូដឹកសាំងដួល និងអូសជាច្រើនម៉ែត្រកកិតនឹងថ្នល់ ជាហេតុធ្វើបែកផ្កាភ្លើងហើយឆាបឆេះសាំងយ៉ាងសន្ធោសន្ធៅចំនួន២ប៊ីដុងរួមទាំងបើកបរម៉ូតូផង ដូចគេដុតមនុស្សទាំងរស់បណ្តាលឲ្យស្លាប់យ៉ាងអាណោចអាធ័ម ។ នៅពេលនោះដែរ ភ្លើងក៏បានឆេះរាលទៅដល់រថយន្តឡិចស៊ីស RX៣០០ មួយគ្រឿងពណ៌ស្ករ ពាក់ផ្លាកកលេខ ភ្នំពេញ ២2AT–៣៧០២ ដែលម្ចាស់ចតលើចិញ្ចើមផ្លូវហើយចូលទៅផឹកកាហ្វេ ព្រមទាំងឆេះបង្គោលភ្លើងបណ្តាលឱ្យរងការខូចខាតផងដែរ ។ ដោយឡែករថយន្តមួយគ្រឿង ដែលប៉ះជាមួយម៉ូតូដឹកប្រេងនោះ បានគេចទៅបាត់ ។
នៅពេលមានភ្លើងឆាបឆេះនេះ ប្រជាពលរដ្ឋ ក៏បាននាំគ្នាយកបំពង់ពន្លត់អគ្គិភ័យទៅបាញ់ពន្លត ់តែពុំអាចទប់ស្កាត់បាន ព្រោះសាំងចំនួន២ប៊ីដុងកំពុងឆាបឆេះ នៅសល់តែសម្បកប៊ីដុងប៉ុណ្ណោះ ។ តាមនគរបាលឱ្យដឹងថា នៅពេលកើតហេតុនោះ រថយន្តពន្លត់អគ្គិភ័យចំនួន៥គ្រឿងបានទៅជួយអន្តរាគមន៍បាញ់ទឹកពន្លត់ ហើយភ្លើងបានរលត់វិញ នៅវេលាម៉ោងប្រមាណ១០ព្រឹក ។
តាមនគរបាលមូលដ្ឋានបានឱ្យដឹងថា ឧបទ្ទវហេតុនេះ បណ្តាលឱ្យយុវជនជាអ្នកបើកម៉ូតូដឹកសាំងត្រូវភ្លើងឆេះស្លាប់នៅនឹងកន្លែង និងម៉ូតូដឹកសាំងខូចខាតទាំងស្រុង ។ ចំណែករថយន្តឡិចស៊ីសឆេះអស់មួយកំណាត់មុខ និងបង្គោលភ្លើង រួមទាំងខ្សែភ្លើងរាប់សិបសរសៃក៏ត្រូវឆេះដាច់ដែរ។តាមនគរបាលដឹងទៀតថា ការកើតមានគ្រោះថ្នាក់នេះ បណ្តាលមកពីម៉ូតូដឹកសាំងបើកបរក្នុងល្បឿនលឿន ទៅប៉ះជាមួយរថយន្តហើយដួលអូរកកិតលើថ្នល់ទើបបង្កឱ្យឆាបឆេះ ឡើង ។ សពត្រូវបាននគរបាលចាត់ចែងនាំយកទៅតម្កល់នៅឈាបនដ្ឋានវត្តទឹកថ្លា ដើម្បីរង់ចាំបងប្អូនមកទទួលយកទៅធ្វើបុណ្យ ។
ចែករំលែកព័តមាននេះ