ខេត្តកណ្តាល ៖ គំនរខ្សាច់ដាក់លក់មួយកន្លែងនៅជាប់បណ្តោយផ្លូវជាតិលេខ១១០ ស្ថិតក្នុងភូមិឈើទាល ឃុំឈើទាល ស្រុកកៀនស្វាយ ខេត្តកណ្តាល ដោយគ្មានឃើញដាក់ស្លាកសញ្ញាយីហោអ្វីសោះ ដែលគេសង្ស័យថា អត់មានច្បាប់ទម្លាប់នោះហើយបានធ្វើការដឹកជញ្ជូនដាក់ហៀៗទ្រុងជ្រុះរប៉ាត់រប៉ាយពាស់ពេញលើតាមដងផ្លូវសាធារណបង្កការប៉ះពាល់ដល់អ្នកធ្វើដំណើរយ៉ាងធ្ងន់ធ្ងរ ។
បើប្រភពព៌តមានបានបង្ហើបប្រាប់ឲ្យដឹងថា ដេបូលក់ខ្សាច់មួយកន្លែងនេះ គឺមានម្ចាស់គ្រប់គ្រងឈ្មោះ ហេងដោយបានបូមខ្សាច់ពីទន្លេមកដាក់តាំងលក់ទើបតែបានពីរបីខែប៉ុណ្ណោះ ។ ហើយក៏ពុំឃើញមានដាក់ស្លាកសញ្ញាយីហោសម្គាល់ដេបូនោះទេ ដែលធ្វើឲ្យគេសង្ស័យថា គ្មានច្បាប់ទម្លាប់នោះឡើយ ។ ប្រភពបន្តទៀតថាសព្វថ្ងៃម្ចាស់ដេបូលក់ខ្សាច់នេះបានធ្វើសកម្មភាពដឹកជញ្ជូនមិនគោរពទៅតាមការណែនាំរបស់ក្រសួងរ៉ែ និងថាមពលនោះឡើយ គឺដឹកគ្មានពេលវេលាកំណត់ បើកបរល្បឿនលឿនដាក់ហៀរៗទ្រុង បណ្តាលឲ្យជ្រុះដីខ្សាច់រប៉ាត់រប៉ាយពាស់ពេញដងផ្លូវសាធារណៈធ្វើឲ្យផ្លូវកៅស៊ូជាតិក្លាយទៅជាផ្លូវដីខ្សាច់បង្កការប៉ះពាល់យ៉ាងធ្ងន់ធ្ងរ ដល់អ្នកធ្វើដំណើរដែលអាចប្រឈម និងកើតមានករណីគ្រោះថ្នាក់ចរាចរណ៍ដោយយថា ហេតុជាពិសេសនាំឲ្យខូចសុខភាពដល់ប្រជាពលរដ្ឋរស់នៅអមសងខាងផ្លូវជាតិទៀតផង ។
ប្រភពបានបញ្ជាក់បន្ថែមថា ផ្លូវកៅស៊ូជាតិមួយខ្សែនេះប្រវែងប្រហែលពីរគីឡូដី គឺចាប់ពីភូមិឈើទាលរហូតទៅដល់ព្រំប្រទល់ឃុំកំពង់ស្វាយកំពុងរង់ការខូចខាតក្លាយទៅជាក្រហុកក្រហេងក្រហូងធំៗដូចរុន្ធបាយខុមពិតជាលំបាកធ្វើដំណើរណាស់ ។ ហើយផ្លូវនេះខូចខាតក៏ដោយសារ តែពួកក្រុមរថយន្តដឹកដីដឹកខ្សាច់លក់បូករួមជាមួយរថយន្តធំៗដឹកទំនិញគ្រប់ប្រភេទចេញពីប្រទេសវៀតណាម តាមច្រកទ្វារជ្រៃធំយ៉ាងគគ្រឹកគគ្រេងទាំងយប់ទាំងថ្ងៃ ដោយភាគច្រើន គឺសុទ្ធតែផ្ទុកលើសទម្ងន់តែម្តង ។
ពាក់ព័ន្ធបញ្ហានេះលោកនេត វាសនា ប្រធានការិយាល័យរ៉ែ និងថាមពល ស្រុកកៀនស្វាយក៏ធ្លាប់បានប្រាប់ឲ្យភ្នាក់ងារយើងដឹងតាមទូរស័ព្ទថា ដេបូខ្សាច់នេះ គឺគេបានទិញខ្សាច់ពីក្រុមហ៊ុនបូមខ្សាច់នៅខាងស្រុកមុខកំពូលមក ។ រីឯអាជីវកម្មកន្លែងទីតាំងលក់ខ្សាច់ម្ចាស់គេបានដាក់ទៅខេត្តហើយ ប៉ុន្តែមិនទាន់ធ្លាក់មកទេ ។
ចំពោះការដឹកជញ្ជូនលើសម៉ោងកំណត់ហើយអត់ក្របបើកលឿនបង្កការប៉ះពាល់ដល់អ្នកធ្វើដំណើរ និងអ្នករស់នៅជិតសងខាងផ្លូវនោះ ម្ចាស់អាជីវកម្មត្រូវតែទទួលខុសត្រូវមុខច្បាប់បានកំណត់ ។ ចំណែកបញ្ហាប៉ះពាល់ឲ្យខូចផ្លូវសាធារណភ្នាក់ងារយើងមិនអាចទំនាក់ទំនងសូមការបំភ្លឺពីលោកប្រធានការិយាល័យស្រុក និងលោកប្រធានមន្ទីរសាធារណការ និងដឹកជញ្ជូនខេត្តកណ្តាលបានទេ ៕
ចែករំលែកព័តមាននេះ