ខេត្តឧត្តរមានជ័យ ៖ បុរស២នាក់ត្រូវបានប៉ូលិសស្រុកចុងកាល់ធ្វើការឃាត់ខ្លួន បន្ទាប់ពីធ្វើសកម្មភាពកាច់សោ.កម៉ូតូមួយគ្រឿង ដែលហេតុការណ៍នេះកើតឡើងកាលពីវេលាម៉ោង១០និង៥០នាទីព្រឹកថ្ងៃទី២៣ មករា ២០១៩ ស្ថិតនៅតាមបណ្តោយផ្លូវជាតិលេខ៦៨ ក្នុងភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ។
ជនសង្ស័យទាំង២នាក់ដែលសមត្ថកិច្ចធ្វើការឃាត់ខ្លួន ម្នាក់ឈ្មោះហូ មករា ហៅអាម៉ី ភេទប្រុស អាយុ២៣ឆ្នាំ រស់នៅភូមិតាវ៉ូង ឃុំពន្លៃ ស្រុកភ្នំស្រុក ខេត្តបន្ទាយមានជ័យ និងម្នាក់ទៀតឈ្មោះឆេង ឆៃណា ភេទប្រុស អាយុ២៥ឆ្នាំ រស់នៅភូមិចំការចេក សង្កាត់អូរស្មាច់ ក្រុងសំរោង ខេត្តឧត្តរមានជ័យ បានធ្វើសកម្ម
ភាពកាច់សោ.កម៉ូតូពីជនរងគ្រោះឈ្មោះម៉ាន់ រ៉ាម៉ន ភេទប្រុស អាយុ៣៣ឆ្នាំ រស់នៅភូមិដងទុង សង្កាត់កូនគ្រៀល ក្រុងសំរោង ។ អ្នកទាំង៣មានមុខរបរជាកម្មករសំណង់ជាមួយគ្នា នៅក្នុងសង្កាត់អូរស្មាច់។
ប្រភពប៉ូលិសស្រុកចុងកាល់បានឱ្យដឹងថា មុនពេលធ្វើការឃាត់ខ្លួនជនសង្ស័យទាំង២នាក់នេះ គឺប៉ូលិសផ្នែកចរាចរណ៍ស្រុកចុងកាល់បានដាក់គោលដៅចុះអនុវត្តច្បាប់ចរាចរណ៍ផ្លូវគោក ដែលស្ថិតនៅចំណុចភូមិជើងទៀន ឃុំជើងទៀន ហើយបានធ្វើកាត្រួតពិនិត្យមានម៉ូតូជាច្រើនគ្រឿង បើប៉ូលិសមិនឃាត់ត្រួតពិនិត្យទេ គឺគេធ្វើដំណើរជាធម្មតា ។
ចំណែកម៉ូតូដែលជនសង្ស័យជិះធ្វើដំណើរនោះ ប៉ូលិសមិនបានឃាត់នោះទេ ស្រាប់តែជនសង្ស័យក៏បានចុះបណ្តើរម៉ូតូមួយគ្រឿងម៉ាកវ៉េវ អ.អេស.អ៊ិច ធុនសេ១១០ ពណ៌ខ្មៅក្រហម ពាក់ស្លាកលេខ ឧត្តរមានជ័យ ១B-១៦៩០ ទើបមានការសង្ស័យ ក៏ហៅសួរនាំ និងឆែកឆេររកឃើញមានវត្ថុតាងកូនសោរាងអក្សតេ និងសំភារៈសម្រាប់ធ្វើសកម្មភាពលួចជាច្រើនទៀត។
ប្រភពពីប៉ូលិសបានបន្តថា យោងទៅតាមការសាកសួរ ជនសង្ស័យបានសារភាពថា ខ្លួនពិតជាបានកាច់សោ.កម៉ូតូមួយគ្រឿងរបស់ជនរងគ្រោះខាងលើពិតប្រាកដមែន ។ យោងទៅលើវត្ថុតាង សមត្ថកិច្ចបានកសាងសំណុំរឿងបញ្ជូនជនសង្ស័យទាំង២នាក់ទៅស្នងការដ្ឋាននគបាលខេត្តឧត្តរមានជ័យដើម្បីចាត់ការបន្តទៅតាមនីតិវិធី ៕
ចែករំលែកព័តមាននេះ