ខេត្តឧត្តរមានជ័យ ៖ ស្ត្រីម្នាក់បានដើរបាត់ពីផ្ទះអស់រយៈពេល២យប់២ថ្ងៃ ត្រូវបានគេប្រទះឃើញយកក្រមាចងកសម្លាប់ខ្លួននៅក្នុងរណ្តៅដីមួយកន្លែង កាលពីវេលាម៉ោង១២ថ្ងៃត្រង់ថ្ងៃទី២១ មករា ២០១៩ ស្ថិតនៅក្នុងភូមិថ្នល់កែង ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។
ជនរងគ្រោះដែលស្លាប់ឈ្មោះឡូញ ចិន្តា ភេទស្រី អាយុ៣៩ឆ្នាំ រស់នៅក្នុងភូមិ-ឃុំកើតហេតុខាងលើ។
តាមសម្តីបុរសម្នាក់ឈ្មោះឡូញ ថុន ត្រូវជាប្អូនបង្កើតរបស់ជនរងគ្រោះ និងយោងតាមសម្តីបុរសម្នាក់ទៀតឈ្មោះមឿន ថេត ភេទប្រុស អាយុ៤២ឆ្នាំ ត្រូវជាអ្នកជិតខាងផ្ទះជាប់របងគ្នាបានឱ្យដឹងថា ស្ត្រីរងគ្រោះមានប្តីលើកទី១បានបែកគ្នា លុះពេលបានប្តីលើកទី២ក៏បែកគ្នាផងដែរ ។
ប្រភពដដែលបានបន្តថា តាំងពីពេលនោះមក គេបានសង្កេតឃើញស្ត្រីរងគ្រោះបានកើតជំងឺផ្លូវចិត្ត ជួនកាលដើរនិយាយតែម្នាក់ឯងកាលពីអំឡុងឆ្នាំ២០១៦មកម្ល៉េះ ក្រោយមកទៀតគេបានសង្កេតឃើញស្ត្រីរងគ្រោះឈានដល់មានជំងឺសរសៃប្រសាទដោយមិនដឹងខុសត្រូវនោះទេ។
ប្រភពដដែលបានបញ្ជាក់បន្តទៀតថា កាលពីវេលាម៉ោង១០ព្រឹកថ្ងៃទី១៩ មករា ២០១៩ ស្ត្រីរងគ្រោះបានបាត់ពីផ្ទះ ដោយមិនដឹងថាទៅទីកន្លែងណានោះទេ ហើយបងប្អូន និងអ្នកជិតខាងបាននាំគ្នាជួយដើរកគ្រប់ទីកន្លែងដែរ តែរកមិនឃើញ ។ លុះនៅវេលាម៉ោង១២ថ្ងៃត្រង់ថ្ងៃទី២១ មករា ២០១៩ ទើបប្រទះឃើញស្ត្រីរងគ្រោះយកក្រមាចងកនៅជាប់នឹងឈើដែលគងមាត់រណ្តៅដីមានជំរៅជាង២ម៉ែត្រស្ថិតនៅខាងក្រោយផ្ទះជនរងគ្រោះចំងាយ៤០ម៉ែត្រស្លាប់បាត់បង់ជីវិតទៅហើយ។
ប៉ូលិសស្រុកត្រពាំងប្រាសាទបានឱ្យដឹងថា ក្រោយពីបានទទួលនូវពាក្យបណ្តឹងពីក្រុមគ្រួសាជនរងគ្រោះបានរាយការណ៍មកថា បានបាត់សមាជិកគ្រួសារម្នាក់ ពេលនោះសមត្ថកិច្ចក៏បានធ្វើការស្រាវជ្រាវរកផងដែរ ។
បន្ទាប់មកក្រុមគ្រួសារជនរងគ្រោះបានរាយការណ៍មកសមត្ថកិច្ចជាថ្មីថា បានប្រទះឃើញជនរងគ្រោះធ្វើអត្តឃាតដោយចងកស្លាប់បាត់ទៅហើយ ភ្លាមនោះសមត្ថកិច្ចក៏បានចុះទៅដល់កន្លែងកើតហេតុ និងធ្វើការពិនិត្យនៅជុំវិញកើតហេតុ និងពិនិត្យទៅលើសព ពុំឃើញមានស្លាកស្នាមអ្វីគួរឱ្យកត់សម្គាល់នោះឡើយ សមត្ថកិច្ចបានសន្និដ្ឋានថា ស្ត្រីរងគ្រោះពិតជាស្លាប់ដោយសារចងកធ្វើអត្តឃាតប្រាកដមែន និងបានប្រគល់សពទៅឱ្យក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ