ខេត្តពោធិ៍សាត់ ៖ យុវជនម្នាក់ក្នុងចំណោម៣នាក់ ត្រូវក្រុមក្មេងទំនើងមួយក្រុមផ្សេងទៀតស្ទាក់វាយ បណ្តាលឱ្យស្លាប់តាមផ្លូវភ្លាមៗនៅនឹងកន្លែងកើតហេតុ ពេលជនរងគ្រោះកំពុងជិះម៉ូតូត្រឡប់ទៅផ្ទះ។ ករណីឃាតកម្មនេះបានកើតឡើងកាលពីវេលាម៉ោង៥និង២០នាទីល្ងាចថ្ងៃទី២១ ខែមករា ឆ្នាំ២០១៩ លើផ្លូវជាតិលេខ៥…
ខេត្តពោធិ៍សាត់ ៖ យុវជនម្នាក់ក្នុងចំណោម៣នាក់ ត្រូវក្រុមក្មេងទំនើងមួយក្រុមផ្សេងទៀតស្ទាក់វាយ បណ្តាលឱ្យស្លាប់តាមផ្លូវភ្លាមៗនៅនឹងកន្លែងកើតហេតុ ពេលជនរងគ្រោះកំពុងជិះម៉ូតូត្រឡប់ទៅផ្ទះ។
ករណីឃាតកម្មនេះបានកើតឡើងកាលពីវេលាម៉ោង៥និង២០នាទីល្ងាចថ្ងៃទី២១ ខែមករា ឆ្នាំ២០១៩ លើផ្លូវជាតិលេខ៥ ស្ថិតក្នុងភូមិព្រៃផ្ដៅ ឃុំបឹងខ្នារ ស្រុកបាកាន ។
លោកវរសេនីយ៍ឯក នាង វុធ អធិការនគរបាលស្រុកបាកានបានឲ្យដឹងថា នៅល្ងាចថ្ងៃកើតហេតុ ក្រុមជនរងគ្រោះមានគ្នា៣នាក់ បានជិះម៉ូតូ២គ្រឿងចេញពីរោងម៉ាស៊ីនកិនស្រូវជាប់ផ្លូវជាតិលេខ៥ សំដៅទៅផ្ទះ។
ប្រភពដដែលបានបន្តថា ពេលជនរងគ្រោះទើបតែចេញដំណើរបានប្រហែល២០០ម៉ែត្រ ស្រាប់តែមានក្មេងស្ទាវមួយក្រុមគ្នា៦នាក់ជិះម៉ូតូ៣គ្រឿងប្រដាប់ដោយដាវ និងដំបង មកស្ទាក់កាប់និងវាយទៅលើក្រុមជនរងគ្រោះទាំង៣នាក់ បណ្ដាលឲ្យម្នាក់ស្លាប់នៅនឹងកន្លែងកើតហេតុ ចំណែកជនរងគ្រោះ២នាក់ទៀតរត់គេចខ្លួនទាន់។
បន្ទាប់ពីធ្វើសកម្មភាពរួច ក្រុមជនដៃដល់បានរត់គេចខ្លួនបាត់អស់ លុះស្អែកឡើងវេលាម៉ោង១០និង២០នាទីព្រឹកថ្ងៃទី២២ មករា ទើបសមត្ថកិច្ចស្រាវជ្រាវឃាត់ខ្លួនបានម្នាក់។
លោកអធិការបានឱ្យដឹងថា ជនរងគ្រោះដែលស្លាប់ឈ្មោះ ហែល ប្រុសពៅ ភេទប្រុស អាយុ១៨ឆ្នាំ រស់នៅភូមិឃុំកើតហេតុខាងលើ ជាកម្មកររោងម៉ាស៊ីនកិនស្រូវ ។ ចំណែកជនសង្ស័យម្នាក់ដែលឃាត់ខ្លួនបានឈ្មោះ ម៉ៅ ម៉ាច ហៅអ៊ុយ ភេទប្រុស អាយុ១៨ឆ្នាំ រស់នៅភូមិត្រពាំងជង ឃុំត្រពាំងជង ស្រុកបាកាន។
នៅចំពោះមុខសមត្ថកិច្ច ជនសង្ស័យឈ្មោះម៉ៅ ម៉ាច ហៅអ៊ុយ បានសារភាពថា ខ្លួនពិតជាបានវាយជនរងគ្រោះឈ្មោះ ហែល ប្រុសពៅ មួយដំបងចំសៀតផ្កាបណ្ដាលឲ្យស្លាប់ប្រាកដមែន ព្រោះមានគំនុំជាមួយគ្នាពីមុនមក។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការបន្តតាមនីតិវិធី ហើយក្រុមជនដៃដល់ដែលរួមគំនិត សមត្ថកិច្ចកំពុងស្រាវជ្រាវបន្តដើម្បីចាប់ខ្លួនយកមកទទួលខុសត្រូវចំពោះមុខច្បាប់ ។ ចំណែកសពជនរងគ្រោះត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ