ឪពុកម្ដាយគ្រប់រូបគប្បីធ្វើជាគំរូដល់កូនត្រូវប្រព្រឹត្តធ្វើតែអំពើល្អៗ មានចិត្តជាសម្មាទិដ្ឋិ ជួយទំនុកបម្រុងចិញ្ចឹមឪពុកម្ដាយដែលកំពុងមានជីវិត បើអាចគួរអញ្ជើញគាត់មករស់នៅជាមួយ ដើម្បីបានគោរព និងចិញ្ចឹមថែរក្សាគាត់រាល់ថ្ងៃ ។
កាលបើយើងចេះដឹងគុណឪពុកម្ដាយ កូនដែលនៅជាមួយយើងតែងតែឃើញផ្ទាល់នឹងភ្នែក ឮផ្ទាល់នឹងត្រចៀកពេលកូនទាំងអស់នោះធំឡើងកាលណា នឹងដឹងគុណយើង ដូចយើងដឹងគុណឪពុកម្ដាយយើងយ៉ាងនោះដែរ។
តែផ្ទុយទៅវិញ បើយើងមាត់តូចមាត់ធំដាក់ឪពុកម្ដាយយើងប្រើពាក្យមិនពីរោះចំពោះគាត់ កូនយើងឃើញគំរូនេះនឹងមិនដឹងគុណយើង ដូចយើងធ្វើចំពោះឪពុកម្ដាយយើងយ៉ាងនោះដែរ នេះលោកហៅថាធម៌ត គឺតពីម៉ែឪទៅកូននិងបន្តរហូតដល់ចៅៗ…។
នៅពេលមានបុណ្យទានធំៗនៅទីវត្តអារាម ឪពុកម្តាយត្រូវនាំកូនទៅចូលរួមតាមការគួរ ពេលទៅដល់មិនត្រូវឲ្យកូនដើរលេងឥតប្រយោជន៍នោះទេ ត្រូវបង្រៀនកូនឲ្យចេះថ្វាយបង្គំព្រះពុទ្ធរូប សំពះព្រះសង្ឃ ហើយនាំកូនទៅចូលបុណ្យតាមកម្លាំងសទ្ធាជ្រះថ្លា និងត្រូវពន្យល់អំពីអានិសង្សនៃបុណ្យតាមដែលខ្លួនចេះដឹង។
បើឪពុកម្តាយឆ្លាតត្រូវនាំកូនចូលទៅក្នុងព្រះវិហារដើម្បីមើលគំនូរតាមជញ្ជាំង ហើយត្រូវពន្យល់ប្រាប់ដំណើររឿងនីមួយៗដល់កូន រហូតកូនអាចចងចាំរឿងនោះបាន ។ ចំណុចនេះសំខាន់ណាស់ អាចធ្វើឲ្យកូនយើងមានសម្មាទិដ្ឋិជឿបាបបុណ្យ គុណទោស និងជាអ្នកមានគុណធម៌ដុះក្នុងខ្លួនជាប់ជានិស្ស័យទៅជាមនុស្សល្អរហូតដល់ចាស់ ។
ចែករំលែកព័តមាននេះ