ចឹងតើ! បានកសិករនិយមដាំណាស់ ហើយបានចំណូលខ្ពស់ទៀត

ថ្ងៃទី ២៣ ខែ មករា ឆ្នាំ ២០១៩

ម៉ោង ០៧:៤០

ខេត្តកំពង់ឆ្នាំង ៖ ប្រជាកសិករនៅភូមិត្រពាំងក្រពើ ឃុំទឹកហូត ស្រុករលាប្អៀរ ក្រៅពីបង្កបង្កើនផលដំណាំស្រូវពួកគាត់បានបន្ថែមមុខរបរមួយទៀត គឺដាំដំណាំដោយការដាំស្ពៃ និងពិសេសដាំដើមខ្ទឹម ដែលកំពុងមានទីផ្សារល្អ អាចរកចំណូលពី២ទៅ៣លានរៀល ក្នុងរយៈពេលប្រមាណ២ខែលើផ្ទៃដីតែ៤០អារប៉ុណ្ណោះ ដែលចំណូលនេះអាចចាត់ទុកថា ជាចំណូលមធ្យមសម្រាប់ជីវភាពរស់នៅប្រចាំថ្ងៃរបស់ពួកគាត់។

ប្រជាកសិករនៅភូមិឃុំខាងលើបាននិយាយឱ្យដឹងថា សព្វថ្ងៃអ្នកភូមិត្រពាំងក្រពើប្រមាណ៩០%ក្នុងចំណោមប្រជាកសិករជាង៣០០គ្រួសារបាននិយមនាំគ្នាដាំដំណាំគ្រប់ប្រភេទតាមតំណាក់កាលដូចជា ពីដំបូងឡើង គឺដាំស្ពៃប្រមូលផលបាន២សារទើបងៀកមកដាំដើមខ្ទឹមវិញ ហើយការដាំខ្ទឹមប្រមូលផលបាន២សារ គឺដល់ខែវស្សាទើបបងប្អូនប្រជាពលរដ្ឋទុកចម្ការចោលទៅប្រកបរបរធ្វើស្រែវិញម្តង ។

ប្រភពដដែលបានបន្តថា សព្វថ្ងៃអ្នកមានដីសម្រាប់ធ្វើចម្ការដោយការដាំស្ពៃ និងដាំដើមខ្ទឹមទំហំ៤០អារក្នុង១រដូវ អាចដាំស្ពៃ និងដាំដើមខ្ទឹមបានពី៤ដងទៅ៥ដងអោយតែមានទឹកស្រោច ។ ដោយឡែកចំពោះការដាំដើមខ្ទឹមវិញក្នុងរយៈពេលពីចាប់ផ្តើមដាំរហូតប្រមូលផលមួយលើកៗមានរយៈពេលពី១ខែកន្លះទៅ២ខែតែប៉ុណ្ណោះ ។ ដោយត្រូវថែទាំដាក់ជីស្រោចទឹកក្នុង១ថ្ងៃ២ដង ។

ចំណែកការស្រោចទឹកទៀតសោត គឺមិនពិបាករែកស្រោចដូចពីដើមទេ គឺគ្រាន់តែបញ្ឆេះម៉ាស៊ីនបូមទឹក គឺស្រោចពេញចំការតែម្តង ។ ចំណែកក្នុងការប្រមូលផល១លើកៗបានជាង១៥០០គីឡូ គីឡូក្រាម ដោយលក់ក្នុង១គីឡូពី៣០០០រៀលទៅ៣៥០០រៀល ហើយបើទូរទាត់ថ្លៃសោហ៊ុយចំណាយលើថ្នាំលើជីធម្មជាតិ លើប្រេងចាក់ម៉ាស៊ីនបូមទឹក គឺអាចនៅសល់ចំណញបានពី២ទៅ៣លានរៀលដែលសម្រាប់ផ្គត់ផ្គង់ជីវភាពក្នុងគ្រួសារ ។

ដោយឡែកក្នុងពេលប្រមូលផល គឺមានម៉ូយដុំយករថយន្តមកទិញ និងដឹកដោយផ្ទាល់ដល់ចម្ការ ដើម្បីដឹកយកទៅលក់នៅផ្សារក្នុងក្រុងភ្នំពេញផ្សារខេត្តពោធិសាត់ និងខេត្តបាត់ដំបង ។

សូមបញ្ជាក់ថា ក្រៅពីមុខរបរដាំដើមខ្ទឹម ប្រជាពលរដ្ឋនៅក្នុងភូមិត្រពាំងក្រពើក៏បានដាំដុះបន្លែផ្សេងៗទៀងផងដែរ ទៅតាមចំណង់ចំណូលចិត្តដូចជា ដំណាំស្ពៃគ្រប់ប្រភេទ និងដើមភ្លៅកង្កែបជាដើម ។ ប៉ុន្តែនៅក្នុងខែមករានេះ ដំណាំដាំច្រើនជាងគេ គឺដាំដើមខ្ទឹមនេះតែម្តងព្រោះងាយដាំងាយថែទាំ និងទទួលបានកម្រៃច្រើន ៕