ទីក្រុងប៉េកាំង ៖ នៅក្នុងជំនួបសំដែងការគួរសម និងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លោក ស៊ី ជីនពីង ប្រធា នាធិបតី នៃសាធារណរដ្ឋប្រជាមានិតចិន មានប្រសាសន៍ចាត់ទុកទស្សនកិច្ចផ្លូវការរបស់សម្តេចតេជោនាប្រទេសចិននៅពេលនេះ គឺពិតជាមានតម្លៃបំផុត សម្រាប់ទំនាក់ទំនងនៃប្រទេសទាំងពីរកាន់តែខ្ពស់ត្រដែតថែមទៀត ។ ជាមួយគ្នានេះដែរ ប្រទេសចិននឹងផ្តល់ជំនួយឥតសំណងចំនួន៤ពាន់លានយ័ន សម្រាប់រយៈពេល៣ឆ្នាំ ពីឆ្នាំ២០១៩ដល់ឆ្នាំ២០២១ដល់ប្រទេសកម្ពុជា ។
លោកប្រធានាធិបតី នៃសាធារណរដ្ឋប្រជាមានិតចិនបានមានប្រសាសន៍បែបនេះនារសៀលថ្ងៃទី២១ ខែមករា ឆ្នាំ២០១៩ នៅទីក្រុងប៉េកាំងក្នុងកិច្ចជំនួបសំដែងការគួរសម និងពិភាក្សាការងារ ខណៈដែលសម្តេចតេជោនាយករដ្ឋមន្ត្រីអញ្ជើញបំពេញទស្សនកិច្ចផ្លូវការនៅសាធារណរដ្ឋប្រជាមានិតចិន ។
លោកប្រធានាធិបតីមានប្រសាសន៍បន្ថែមថា គំនិតផ្តួចផ្តើមខ្យែក្រវ៉ាត់មួយ ផ្លូវមួយនឹងបន្តពង្រឹង និងពង្រីកកិច្វសហប្រតិបត្តិការជាមួយបណ្តាប្រទេសក្នុងក្របខណ្ឌខ្យែក្រវ៉ាត់មួយផ្លូវមួយ ។ ក្នុងនោះភាគីទាំងសងខាងនឹងបន្តយកចឹត្តទុកដាក់ក្នុងការពង្រីកកិច្ចសហប្រតិបត្តិការក្នុងកម្រិតតំបន់ និងអន្តរជាតិ ។
បច្ចុប្បន្ននេះ បើទោះបីទំនាក់ទំនងអន្តរជាតិមានការប្រែប្រួលក៏ពិតមែន ប៉ុន្តែទំនាក់ទំនងចិន និងកម្ពុជាគឺពិតជាបានផ្តល់នូវអត្ថប្រយោជន៍ជាច្រើនពីគ្នាទៅវិញទៅមក ។ តាមរយៈនេះចិននឹងបន្តបង្កើនកិច្ចសហប្រតិបត្តិការជាមួយកម្ពុជា ពិសេសការចូលរួមចំណែកដល់ការអភិវឌ្ឍប្រទេសកម្ពុជាកាន់តែទ្វេឡើងរឹងមាំថែមទៀត ៕
ចែករំលែកព័តមាននេះ