ប្រទេសម៉ាលី ៖ អគ្គលេខាធិការអ.ស.បលោកANTONIO GUTERRES ក្នុងសេចក្ដីប្រកាសមួយគូសបញ្ជាក់ថា ទាហានមួកខៀវជាជនជាតិឆាដ១០នាក់បានត្រូវស្លាប់និងយ៉ាងតិច២៥នាក់ទៀតរងរបួស កាលពីថ្ងៃទី២០មករា ក្នុងការវាយប្រហារមួយរបស់ពួកជីហាដនាភាគឦសានប្រទេសម៉ាលី។
លោកANTONIO GUTERRES បានថ្កោលទោសយ៉ាងម៉ឺងម៉ាត់ចំពោះការវាយប្រហារនោះ ដែលលោកចាត់ទុកថាជាការវាយប្រហារដ៏ស្មុគស្មាញប្រឆាំងមូលដ្ឋានរបស់អ.ស.ប នៅAGUELHOKជិតKIDAL ជាតំបន់មួយនៅមានការគំរាមកំហែងខ្លាំងរបស់ក្រុមជីហាដ ទោះបីមានអន្តរាគមន៍ ចាប់តាំងពីច្រើនឆ្នាំមកហើយរបស់អន្តរជាតិក្ដី។
នោះជាការវាយប្រហារយ៉ាងបង្ហូរឈាមបំផុតមួយរបស់ពួកជីហាដ ប្រឆាំងអ.ស.បនៅម៉ាលី។ នាវេលាព្រឹកព្រលឹមកងទាហានមួកខៀវឆាដដែលមានទីតាំងនៅAGUELHOKភាគឦសានប្រទេស ចម្ងាយ២០០គីឡូម៉ែត្រពីព្រំដែនអាល់ហ្សេរី បានវាយរុញច្រានការវាយប្រហារដ៏ស្មុគស្មាញមួយរបស់ពួកជីហាដ ដែលលើកមកតាមរថយន្តបំពាក់អាវុធជាច្រើនគ្រឿង។ ទោះបីកងទាហានមួកខៀវនោះអាចកម្ទេចសត្រូវជាច្រើននាក់ ហើយដេញតាមពួកនេះពេលបាក់ទ័ពក្ដី ក៏កងទាហានរក្សាសន្តិភាពរងការបាត់បង់ធ្ងន់ធ្ងរ។
ដាក់ពង្រាយចាប់តាំងពីឆ្នាំ២០១៣មកក្រោយភាគខាងជើងម៉ាលី ធ្លាក់ក្រោមការកាន់់កាប់របស់ពួកជីហាដ មានទំនាក់ទំនងជាមួយអាល់កៃដា បេសកកម្មអ.ស.បនៅម៉ាលីMINUSMA មានទាហាន និងប៉ូលិសប្រមាណជា១២៥០០នាក់។ កងកម្លាំងនោះបានបាត់បង់មនុស្សជាង១៦០នាក់រួចហើយ ក្នុងនោះជាង១០០នាក់ក្នុងអំពើប្រទូស្តរាយគ្នា គឹស្មើនឹងជាងពាក់កណ្ដាលនៃទាហានអ.ស.បដែលស្លាប់ក្នុងដំណាក់កាលនោះលើពិភពលោក។
ការវាយប្រហារដ៏អាក្រក់មួយមុននេះគឹកាលពីខែតុលាឆ្នាំ២០១៤ បណ្ដាលឲ្យទាហានមួកខៀវនីហ្សេរីយ៉ា៩នាក់ស្លាប់។ រួចកាលពីខែឧសភាឆ្នាំ២០១៦ទាហានមួកខៀវតូហ្គោ៥នាក់ក៏ត្រូវស្លាប់ដោយសារការវាយប្រហារនៅម៉ាលីដែរ៕
ចែករំលែកព័តមាននេះ