រាជធានីភ្នំពេញ ៖ ការអប់រំ គឺជាមូលដ្ឋានគ្រឹះដែលជួយកសាងសង្គមជាតិ ហើយដើម្បីចូលរួមអភិវឌ្ឍប្រទេសកម្ពុជា «ណាហ្គាវើលដ៍បេះដូងសប្បុរស» ដែលជាក្រុមការងារសង្គមរបស់ក្រុមហ៊ុនណាហ្គាវើលដ៍ បានសហការជាមួយអង្គការ Cambodia Outreach…
រាជធានីភ្នំពេញ ៖ ការអប់រំ គឺជាមូលដ្ឋានគ្រឹះដែលជួយកសាងសង្គមជាតិ ហើយដើម្បីចូលរួមអភិវឌ្ឍប្រទេសកម្ពុជា «ណាហ្គាវើលដ៍បេះដូងសប្បុរស» ដែលជាក្រុមការងារសង្គមរបស់ក្រុមហ៊ុនណាហ្គាវើលដ៍ បានសហការជាមួយអង្គការ Cambodia Outreach នៅក្នុងគម្រោង Children@Risk ដែលបានចាប់ផ្តើមក្នុងឆ្នាំ ២០០៣ ដើម្បីឧបត្ថម្ភសម្រាប់ការសិក្សាអប់រំរបស់កុមារដែលមកពីគ្រួសារក្រខ្សត់។
យោងទៅតាមរបាយការណ៍ស្ទង់មតិសេដ្ឋកិច្ចសង្គមកម្ពុជា ដែលបានបោះផ្សាយក្នុងពេលថ្មីៗនេះ មានប្រជាជន ១១,៨% ប៉ុណ្ណោះ នៃចំនួនប្រជាជនកម្ពុជាសរុបអាយុ២៥ឆ្នាំ និងលើសពីនេះ បានបញ្ចប់មធ្យមសិក្សាបឋមភូមិ។
លោក Wayne Hester នាយកប្រតិបត្តិអង្គការ Cambodia Outreach បានឱ្យដឹងថា មូលហេតុចម្បងមួយក្នុងចំណោមមូលហេតុជាច្រើននៃការបោះបង់ការសិក្សាដ៏ខ្ពស់នេះ គឺបណ្តាលពីបញ្ហាហិរញវត្ថុ។ លោកមានប្រសាសន៍ថា៖ «ឪពុកម្តាយចង់ឱ្យកូនៗរបស់ពួកគេរកការងារធ្វើនៅខាងក្រៅ ឬធ្វើស្រែចម្ការដើម្បីរកប្រាក់ចំណូលមកទ្រទ្រង់ជីវភាពគ្រួសារ។ ស្ថានភាពនេះនៅតែជាឧបសគ្គចម្បងដែលរារាំងកុមារមិនឱ្យទទួលបានការសិក្សាអប់រំក្នុងប្រទេសកម្ពុជា»។
លោក Pern Chen នាយកគ្រប់គ្រងណាហ្គាវើលដ៍ បានមានប្រសាសន៍ថា៖ «ការសហការនេះ នឹងជួយកុមារក្រីក្រឱ្យទទួលបានការអប់រំដូចកុមារដទៃ។ យើងមានមោទនភាពដែលបុគ្គលិករបស់យើងបានឧបត្ថម្ភថវិកាផ្ទាល់ខ្លួនគាំទ្រដល់គំនិតផ្តួចផ្តើមនេះបន្ថែមទៅលើការឧបត្ថម្ភរបស់ក្រុមហ៊ុន។ ថវិកានេះ នឹងជួយធ្វើឱ្យកុមារក្រីក្រដែលគួរឱ្យអាណិតរបស់យើងបញ្ចប់ការសិក្សារបស់ពួកគេ ហើយយើងសង្ឃឹមថា ពួកគេនឹងទទួលបានចំណេះដឹង ដើម្បីរកការងារធ្វើ និងចាកឆ្ងាយពីភាពក្រីក្រ ហើយពួកគេនឹងផ្តល់ផលប្រយោជន៍បន្តដល់ក្មេងៗជំនាន់ក្រោយថែមទៀតផង»។
ថវិកាដែលបានមកពីការឧបត្ថម្ភរបស់ក្រុមហ៊ុនណាហ្គាវើលដ៍ និងបុគ្គលិកណាហ្គាវើលដ៍ នឹងត្រូវឧបត្ថម្ភដល់សិស្សានុសិស្សថ្នាក់ទី១០ ដល់ថ្នាក់ទី១២ សម្រាប់បង់ថ្លៃសិក្សា សម្ភារសិក្សា អាហារ ឯកសណ្ឋាន និងសម្ភារផ្សេងៗទៀតសម្រាប់រយៈពេល៣ឆ្នាំ។ វឌ្ឍនភាពនៃការសិក្សារបស់សិស្សកម្សត់ទាំងនេះ នឹងត្រូវតាមដានយ៉ាងទៀងទាត់។ សិស្សដែលមានសមត្ថភាព នឹងទទួលបានការបណ្តុះបណ្តាល និងក្លាយជាបុគ្គលិកហាត់ការនៅក្រុមហ៊ុនណាហ្គាវើលដ៍។
ណាហ្គាវើលដ៍បេះដូងសប្បុរស តែងតែរៀបចំសកម្មភាពលើកកម្ពស់ការអប់រំយ៉ាងទៀងទាត់ រួមមានការចែកសៀវភៅអាន និងសម្ភារសិក្សាដល់សិស្សបឋមសិក្សាជាដើម។ មិនតែប៉ុណ្ណោះ បុគ្គលិកសុវត្ថិភាពអគ្គិភ័យរបស់ណាហ្គាវើលដ៍ តែងតែផ្តល់ការបណ្តុះបណ្តាលស្តីអំពីវិធីបង្ការអគ្គិភ័យដល់សិស្ស និងប្រជាជននៅតាមសហគមន៍ ព្រមទាំងឧបត្ថម្ភបំពង់ពន្លត់អគ្គិភ័យយ៉ាងទៀងទាត់ផងដែរ។
ចំណែកសកម្មភាពចុះទៅតាមសហគមន៍ គឺណាហ្គាវើលដ៍បានបង្កើតនូវកម្មវិធីប្រកួតប្រជែងសាលារៀនស្អាតនៅតាមអនុវិទ្យាល័យចំនួន ៣០ ដើម្បីលើកទឹកចិត្តឲ្យសិស្សានុសិស្សរក្សាសាលារៀនរបស់ពួកគេឲ្យមានអនាម័យស្អាត និងបរិស្ថានល្អ។ សាលារៀនដែលស្អាតជាងគេ នឹងទទួលបានរង្វាន់ជាទឹកប្រាក់ ដើម្បីយកទៅប្រើប្រាស់ដើម្បីអភិវឌ្ឍសាលារៀនរបស់ទាំងអស់គ្នា៕ ដោយសហការ
ចែករំលែកព័តមាននេះ