ស្រែស្រូវប្រជាពលរដ្ឋប្រហែល1000ហិកតាឯណោះអាចនឹងប៉ះពាល់បើមិនបានចុះជួយទាន់ពេល

ថ្ងៃទី ២១ ខែ មករា ឆ្នាំ ២០១៩

ម៉ោង ១៥:៥៥

ខេត្តសៀមរាប ៖ នាថ្ងៃទី២០ ខែមករា ឆ្នាំ២០១៩ លោក ពៅ ប៊ុន ធឿន អភិបាលស្រុកជីក្រែងដឹកនាំក្រុមការងាររួមមាន អាជ្ញាធរស្រុកជីក្រែង ក្រុមប្រឹក្សាឃុំអន្លង់សំណរ និងប្រជាកសិករបានរៀបចំបូមទឹកសង្គ្រោះស្រែប្រាំង នៅឃុំអន្លង់សំណរ ត្រៀមបង្ការទុកស្រោច ស្រពផ្ទៃដីប្រមាណ១០០០ហិកតា ដើម្បីស្រោចស្រពស្រែប្រាំងសងខាងស្ទឹងក្រោមទំនប់៧៨ ក្នុងភូមិសាស្ត្រឃុំអន្លង់សំណរ ដើម្បីរក្សាទឹកទុក ព្រោះតំបន់នេះអាចប្រឈមខ្វះទឹកប្រហែល១០០០ហិកតានាពេលខាងមុខ ។

លោក ពៅ ប៊ុន ធឿន អភិបាលស្រុកជីក្រែងបានមានប្រសាសន៍ថា ដោយអនុវត្តតាមសារាចរណែនាំរបស់រដ្ឋបាលខេត្ត និងការចង្អុលបង្ហាញពីលោក ទៀ សីហា អភិបាលនៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយថ្នាក់ខេត្ត អាជ្ញាធរ គ្រប់លំដាប់ថ្នាក់ ត្រូវបន្តយកចិត្តទុកដាក់ជាប្រចាំចំពោះបញ្ហាការស្តុកទឹក ទុកសម្រាប់ប្រើប្រាស់ និងស្រោចស្រព ព្រោះរដូវប្រាំងឆ្នាំនេះមានអាកាសធាតុក្តៅហួតហែង ។

លោកបានបញ្ជាក់ថា ជាក់ស្តែងនៅស្រុកជីក្រែងដោយមើលឃើញពីអាកាសធាតុក្តៅខ្លាំងខុសប្លែកពីធម្មតាទើបលោកបានដឹកនាំក្រុមការងារចុះរៀបចំបូមទឹកសង្គ្រោះស្រែប្រាំងនៅក្នុងភូមិសាស្ត្រឃុំអន្លង់សំណរ ស្រុកជីក្រែង ជូនប្រជាពលរដ្ឋ ដើម្បីស្រោចស្រពស្រែប្រាំងសងខាងស្ទឹងក្រោមទំនប់៧៨ ក្នុងភូមិសាស្ត្រឃុំអន្លង់សំណរដើម្បីរក្សាទឹកទុកព្រោះតំបន់នេះអាចប្រឈមខ្វះទឹកប្រហែល១០០០ហិកតានាពេលខាងមុខនេះ ៕