រាជធានីភ្នំពេញ ៖ រហូតមកទល់ពេលនេះ ប្លង់គោលអភិវឌ្ឍន៍ក្រុងបាវិត ខេត្តស្វាយរៀងបានរៀបចំប្លង់រួចហើយ ដោយមានការរៀបចំហេដ្ឋារចនាសម្ព័ន្ធជាច្រើនសមស្របតាមផែនការរបស់រាជរដ្ឋាភិបាល ដើម្បីអភិវឌ្ឍន៍ប្រែក្លាយទីក្រុងនេះជាតំបន់ពាណិជ្ជកម្ម និងឧស្សាហកម្ម។
យោងតាមឯកសារផ្លូវការដែលទើបទទួលបានកាលពីចុងសប្តាហ៍មុនបានបង្ហាញថា ក្រុងបាវិត នឹងមានការរៀបចំហេដ្ឋារចនាសម្ព័ន្ធធំៗ ដែលមានទំហំរហូតដល់៣០ម៉ែត្រ មានការរៀបចំតំបន់លំនៅឋាន ទីលានវាយកូនហ្គោល តំបន់រដ្ឋបាល ពាណិជ្ជកម្ម ឧស្សាហកម្ម តំបន់សេដ្ឋកិច្ចពិសេស សួនច្បារសាធារណៈ តំបន់កសិកម្ម តំបន់រៀបចំអាងស្តុកទឹកស្អាតជាដើម ។
បច្ចុប្បន្នក្រុងបាវិតមានទីក្រុងរណបចំនួន២ កំពុងសាងសង់យ៉ាងសកម្ម គឺទីក្រុងរណប Empire World Cityដែលគ្រោងអភិវឌ្ឍន៍លើផ្ទៃដីជាង១.១៥០ហិកតា (ដំណាក់កាលដំបូងលើផ្ទៃដី៥៧ហិកតា ) ទីក្រុងរណបហេង ហេង មានទំហំ៧ហិកតា និងតំបន់សេដ្ឋកិច្ចពិសេសចំនួន៥ ។
រាជរដ្ឋាភិបាលបានដាក់ក្រុងបាវិតជាតំបន់ឧស្សាហកម្ម ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ខណៈបច្ចុប្បន្នតំបន់សេដ្ឋកិច្ចពិសេសប្រមាណ១០ទីតាំង និងផែស្ងួតជាច្រើនបាននិងកំពុងដំណើរការយ៉ាងសកម្មនៅទីនោះ ។
លោក Eric Loo អគ្គនាយកទីក្រុងរណបEmpire World CITY បានមានប្រសាសន៍កាលពីសប្តាហ៍មុនថា ទីក្រុងបាវិតជាតំបន់មានលក្ខណៈពិសេសមួយ និងមានទីតាំងដ៏មានភាពអំណោយផល ដោយសារទីក្រុងនេះនឹងក្លាយជាមជ្ឈមណ្ឌលពាណិជ្ជកម្មកណ្តាល(Central Commercial) រវាងទីក្រុងហូជីម៉ិញ និងទីក្រុងភ្នំពេញ ។ លោកបន្តថា ៖« អ្វីកាន់តែពិសេសទីក្រុងនេះស្ថិតនៅលើគន្លងផ្លូវសូត្រ ឬខ្សែក្រវាត់មួយ ផ្លូវមួយរបស់ប្រទេសចិន ដែលបានឆ្លងកាត់ពីក្រោយទីក្រុងរណបរបស់យើង »។
លោកបន្តថា ៖« នៅកម្ពុជាមានច្រកព្រំដែនច្រើន តែច្រកព្រំដែនលំដាប់អន្តរជាតិមានពីរគឺបាវិត និងក្រុងប៉ោយប៉ែត ដែលជាច្រកតភ្ជាប់ក្នុងក្របខ័ណ្ឌអាស៊ាន »។
លោកសោម កែវម៉ាលីដា អ្នកជំនាញអចលនទ្រព្យអន្តរជាតិ បានមានប្រសាសន៍ថា ដោយសារតែវាជាទីក្រុងបែបMega City វានឹងទាក់ទាញប្រជាជនកាន់តែច្រើនចូលទៅរស់នៅទីក្រុងនេះ តាមរយៈOnline Gaming, កាស៊ីណូ សណ្ឋាគារ អាផាតម៉ិន កន្លែងកម្សាន្ដWater park ជាដើម ។ លោកបន្តថា ៖« នៅពេលគម្រោងនេះបញ្ចប់ការសាងសង់ វានឹងហុចសក្តានុពលខ្លាំងដល់តំបន់នេះ ដែលផ្តល់ឱកាសឲ្យអ្នកវិនិយោគអាចវិនិយោគបាន និងទាក់ទាញការវិនិយោគបន្ថែមទៀត »។
លោកបន្តថា ៖« អ្វីកាន់តែពិសេសនៅពេលគំរោងខ្សែក្រវាត់មួយ ផ្លូវមួយ ត្រូវបានតភ្ជាប់ជាផ្លូវការ នឹងជួយសម្រួលការដឹកជញ្ជូន និងលើកកម្ពស់សកម្មភាពពាណិជ្ជកម្ម ការដឹកជញ្ជូនកាន់តែប្រសើរថែមទៀត ដោយសារវាស្ថិតនៅជាប់នឹងច្រកព្រំដែនអន្តរជាតិដ៏ធំមួយ »។
មន្ត្រីអាជ្ញាធរក្រុងបាវិត បាននិយាយថា ក្រុងបាវិតសព្វថ្ងៃមានការអភិវឌ្ឍខ្លាំង ខុសពីមុនដូចមេឃនិងដី ពិសេសបន្ទាប់ពីជនជាតិចិនចូលមកបណ្ដាក់ទុនវិនិយោគធ្វើឲ្យសេដ្ឋកិច្ចក្នុងខេត្តរីកចម្រើនយ៉ាងលឿនគួរឲ្យកត់សម្គាល់ ។
លោក សេង សិលា អភិបាលក្រុងបាវិត បានឲ្យដឹងកាលពីពេលថ្មីៗនេះថា ៖« ដីនិងអចលនទ្រព្យមានតម្លៃហក់ឡើងខ្ពស់ គឺដោយសារមានចិនមកប្រមូលទិញ ហើយចិនទិញតែក្នុងទីប្រជុំជនក្នុងសង្កាត់បាវិតទេ ជាពិសេសជិតកាស៊ីណូក្បែរព្រំដែន ដូចជា នៅបរិវេនកាស៊ីណូម៉ុកប៉ាយ តម្លៃចាប់ពី១លានដុល្លារទៅ៣លានដុល្លារក្នុង១ហិកតា, ដីជាប់កាស៊ីណូ ឡឺម៉ាកាវ តម្លៃ៤លានដុល្លារក្នុង១ហិកតា »។
លោកបន្ថែមថា ៖« សម្រាប់ដីទំនេរ ឬដីស្រែ ក៏កើនឡើងដែរ បើធៀបនឹងឆ្នាំមុនៗ ក្នុងនោះ បើដីមិនទាន់ចាក់បំពេញ ក្នុង១ម៉ែត្រការ៉េ តម្លៃ១០ទៅ២០ដុល្លារ, ដីក្រវាត់ក្រុងតាមដងផ្លូវវាង ផ្លូវកុងតឺន័រ តម្លៃ៣០ដុល្លារ ក្នុង១ម៉ែត្រការ៉េ, ដីជាប់ផ្លូវតាមបណ្តោយផ្លូវជាតិលេខ១ តម្លៃ៨០ដុល្លារ ក្នុង១ម៉ែត្រការ៉េ និងដីជាប់ថ្នល់ជាតិលេខ១ ក្នុងសង្កាត់បាទី សង្កាត់ច្រកម្ទេស ក្នុង១ម៉ែត្រការ៉េ តម្លៃ២០ដុល្លារ ។
បច្ចុប្បន្នជនបរទេសដែលកំពុងស្នាក់នៅរកស៊ី និងវិនិយោគនៅខេត្តស្វាយរៀងមានចំនួនប្រមាណ២ម៉ឺននាក់ ក្នុងនោះមកពីជប៉ុន, កូរ៉េ, វៀតណាម, ហ្វីលីពីន, ឥណ្ឌូណេស៊ី និងចិន ជាដើម ប៉ុន្ដែការគ្រប់គ្រងនៅស្មុគស្មាញនៅឡើយ ។ ទោះបីយ៉ាងនេះក្ដី រដ្ឋបាលក្រុងបាវិតកំពុងមានផែនការជំរឿនជនបរទេសផងដែរដើម្បីងាយស្រួលក្នុងការគ្រប់គ្រង ៕
ចែករំលែកព័តមាននេះ