ខេត្តកំពង់ឆ្នាំង៖ «បឹងល្មុស» គឺជាបឹងមួយស្ថិតនៅក្នុងភូមិកំពង់អូស ឃុំកំពង់អូស ស្រុកជលគិរី មានទំហំផ្ទៃ៤៣ហិកតា ។ កាលដើមឡើងបឹងមួយនេះស្ទើរតែគ្មានត្រីទាល់តែសោះដោយសារការនេសាទដោយសេរី និងមាននេសាទដោយប្រើឧបករណ៍ខុសច្បាប់ធ្វើអោយវិនាសត្រីតូចធំគ្មានសល់ ។…
ខេត្តកំពង់ឆ្នាំង៖ «បឹងល្មុស» គឺជាបឹងមួយស្ថិតនៅក្នុងភូមិកំពង់អូស ឃុំកំពង់អូស ស្រុកជលគិរី មានទំហំផ្ទៃ៤៣ហិកតា ។ កាលដើមឡើងបឹងមួយនេះស្ទើរតែគ្មានត្រីទាល់តែសោះដោយសារការនេសាទដោយសេរី និងមាននេសាទដោយប្រើឧបករណ៍ខុសច្បាប់ធ្វើអោយវិនាសត្រីតូចធំគ្មានសល់ ។
ប៉ុន្តែក្រោយការបង្កើតសហគមន៍នេសាទភូមិកំពង់អូស និងបានចាប់ផ្តើមដាក់បឹងនេះជាកន្លែងអភិរក្ស រយៈពេលតែ២ឆ្នាំសោះ ត្រីតូចធំបានកើត និងកើនឡើងគួរកត់សំគាល ព្រោះដាក់មងក្រឡា១តឹកក៏ជាប់ត្រីដែរដែលអាចផ្គត់ផ្គង់ជីវភាពប្រជាពលរដ្ឋនៅក្នុងមូលដ្ឋានបានប្រសើរឡើង ។
លោកស្រី សំរិត ណុន ប្រធានសហគមន៍នេសាទភូមិកំពុងអូសក្នុងពេលចុះល្បាតការពារបឹងអភិរក្សខាងលើបានអោយដឹងថា សហគមន៍នេសាទភូមិកំពង់អូសទើបនឹងបង្កើតឡើងនៅក្នុងឆ្នាំ២០១៧នេះទេដោយមានគណៈកម្មការសហគមន៍ចំនួន១៥នាក់ និងសមាជិកសហគមន៍ចំនួន២៥៥គ្រួសារ ស្មើនឹង៩៥ភាគរយ នៃចំនួនប្រជាពលរដ្ឋក្នុងភូមិសរុប ។ ទន្ទឹមនឹងការបង្កើតសហគមន៍នេសាទនេះដែរ បឹងល្មុស ក៏ត្រូវបានដាក់បញ្ចូលជាបឹងអភិរក្សផងដែរដោយមានទំហំ៤៣ហិកតា ។
ក្នុងរយៈពេល២ឆ្នាំកន្លងមកនេះសហគមន៍បានសហការជាមួយអជ្ញាធរ ប្រជាពលរដ្ឋ យកចិត្តទុកដាក់ថែរក្សាការពារបានយ៉ាងល្អ ធ្វើអោយផលត្រីនេសាទបានកើនឡើងគួរអោយពេញចិត្ត គឺខុសប្លែកកាលពី២ឆ្នាំមុនពេលមិនទាន់បង្កើតសហគមន៍នេសាទនៅដែននេសាទជុំវិញតំបន់អភិរក្សនេះត្រូវបានគេនេសាទយ៉ាងអាណាធិបតេយ្យ គឺសូម្បីតែការដាក់មងក្រឡាតែ២ហ៊ុនក៏ចាប់ត្រីមិនបានដែរគឺអស់ត្រីតែម្តង ។
បច្ចុប្បន្នសហគមន៍បានដាក់កម្លាំងយាមកាមផ្លាស់ប្តូរវេនគ្នាជាប្រចាំទាំងយប់ទាំងថ្ងៃការពាបឹងអភិរក្សនេះយ៉ាងម៉ឺងម៉ាត់ ទើបធ្វើអោយត្រីមេពូជបានកើនឡើងយ៉ាងច្រើនហើយអ្នកនេសាទនៅជុំវិញបឹងអភិរក្សក្បែរៗនេះក៏ដាក់មងចាប់ត្រីបានច្រើនដែលអាចផ្គត់ផ្គង់ជីវភាពប្រជាពលរដ្ឋនៅក្នុងមូលដ្ឋានបានធូរធាផងដែរ ៕
ចែករំលែកព័តមាននេះ