រាជធានីភ្នំពេញ ៖ ក្រុមការងារអន្តរក្រសួងបានសម្រេចលើការងារ៨ចំណុចពាក់ព័ន្ធនឹងការរុករកប្រេងនៅតំបន់ប្លុកAរបស់ក្រុមហ៊ុនKRISENERGY ដោយប្រើប្រាស់វិធីសាស្ត្រ3D Seismic ដែលជាបច្ចេកវិទ្យាថ្មីមួយក្នុងការរុករក ។
ក្នុងកិច្ចប្រជុំកាលពីថ្ងៃទី១៥ មករា កន្លងមក លោក ស្រ៊ុន ដារិទ្ធិ រដ្ឋលេខាធិការក្រសួងបរិស្ថានបានពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង(IESIA)លើគម្រោងស្វែងរុករកប្រេង និងឧស្ម័ន ដោយប្រើវិធី3D Seismic លើផ្ទៃទំហំ១.២០០គីឡូម៉ែត្រការ៉េ ស្ថិតនៅប្លុកAក្នុងដែនសមុទ្រកម្ពុជារបស់ក្រុមហ៊ុនគ្រីសអេនើជី (អប្សរា) អិលធីឌី ព្រមទាំងសិក្សា និងរៀបចំរបាយការណ៍ (IESIA) ដោយក្រុមហ៊ុន ទីប្រឹក្សា E & A CONSULTANT CO., LTD. និងក្រុមហ៊ុន ទីប្រឹក្សា ERM-Siam Co., Ltd. ។
លទ្ធផលនៃកិច្ចប្រជុំនេះបានផ្តោតសំខាន់ទៅលើការងារសំខាន់ៗចំនួន៨ចំណុចរួមមាន ៖
១-អង្គប្រជុំគាំទ្រទៅលើគម្រោងស្វែងរុករកប្រេង និងឧស្ម័ន។ ២-ត្រូវបន្ថែមព័ត៌មាន/ទិន្នន័យផ្លូវការស្តីពីរដ្ឋបាលខេត្តពាក់ព័ន្ធ ។
៣-ត្រូវជូនដំណឹងដល់អាជ្ញាធរមូលដ្ឋាន ដើម្បីធ្វើការផ្សព្វផ្សាយដល់អ្នកនេសាទ ដែលមានទូកធំៗជៀសវាងការបុកប៉ះទង្គិច ជាមួយកប៉ាល់សិក្សា ។ ៤-ត្រូវសហការជាមួយគណៈកម្មការសន្តិសុខ លំហសមុទ្រដែលពាក់ព័ន្ធនឹងបញ្ហាសន្តិសុខ ។ ៥-ត្រូវបញ្ជាក់ពីឧបករណ៍ និងកម្រិតរលកសំឡេងដែលពាក់ព័ន្ធនឹងការដេញពពួកថនិកសត្វសមុទ្រ ជៀសវាងការប៉ះពាល់នៅពេលសិក្សាតាមរលកសំឡេង ។ ៦-ត្រូវគ្រប់គ្រងសំណលរឹង និងសំណល់រាវ ដោយអនុលោមទៅតាមច្បាប់ MARPOL 73/78 ។
៧-ត្រូវបកប្រែឯកសារឧបសម្ព័ន្ធនៃរបាយការណ៍ IESIA នេះជាខេមរៈភាសា ។ ៨-ក្រុមហ៊ុនម្ចាស់គម្រោងត្រូវសហការជាមួយក្រុមហ៊ុនទីប្រឹក្សា ដើម្បីធ្វើការកែសម្រួលនូវចំណុចខ្វះខាត ដែលមាននៅក្នុងរបាយការណ៍ IESIA ទៅតាមការផ្តល់យោបល់របស់អង្គប្រជុំឱ្យបានឆាប់រហ័ស ដើម្បីដាក់ជូនក្រសួងបរិស្ថានពិនិត្យ និងសម្រេច ។ កិច្ចប្រជុំនេះបានប្រព្រឹត្តទៅដោយមានការចូលរួមពីស្ថាប័នពាក់ព័ន្ធចំនួន១៨ ដែលពាក់ព័ន្ធនឹងការធ្វើលើកិច្ចការទាំងអស់នេះ ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានមានប្រសាសន៍កាលពីពេលថ្មីៗនេះថា កម្ពុជានឹងអាចទាញយកដំណក់ប្រេងលើកដំបូងនៅអំឡុងត្រីមាសទី៣នៃឆ្នាំនេះ ដោយសារក្រសួងបានតាមដានការងារជាប់ជាប្រចាំ ជាមួយក្រុមហ៊ុនKRISENERGY ដែលទទួលបានសិទ្ធិរុករក និងធ្វើអាជីវកម្មទាញយកប្រេងពីតំបន់ប្លុកAរបស់កម្ពុជា ។ លោករដ្ឋមន្ត្រីថ្លែងថា ៖« យើងរំពឹងថាប្រេងនឹងទាញយកបាននៅចុងឆ្នាំនេះ ឬយ៉ាងយូរដើមឆ្នាំ២០២០ខាងមុខនេះ »។ តាមការប្រកាសរបស់ក្រុមហ៊ុន KRISENERGY កាលពីចុងឆ្នាំមុន កម្ពុជាអាចទាញយកដំណក់ប្រេងបាន៣ម៉ឺនបារ៉ែលក្នុងមួយថ្ងៃ ៕
ចែករំលែកព័តមាននេះ