រាជធានីភ្នំពញ ៖ កម្លាំងនគរបាលខណ្ឌទួលគោកដាក់គោលដៅត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍បានធ្វើការឃាត់ខ្លួនសង្ស័យពីនាក់ ដកបានថ្នាំញៀន១កញ្ចប់តូច និងម៉ូតូមួយគ្រឿង។
ហេតុការណ៍នេះបានកើតឡើងកាលពីវេលាម៉ោង៩និង១០នាទីយប់ថ្ងៃទី១៧ ខែមករា ឆ្នាំ២០១៩ស្ថិតនៅចំណុចខាងត្បូងស្តុបអាងទឹកអូឡាំពិកប្រមាណ១០០ម៉ែត្រ តាមបណ្តោផ្លូវមុនីរ៉េត ស្ថិតក្នុងសង្កាត់ផ្សារដើមគ ខណ្ឌទួលគោក ។
ជនសង្ស័យទាំង២នាក់ខាងលើ ម្នាក់ឈ្មោះ ខែម លី ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅក្នុងសង្កាត់ទំនប់ទឹក ខណ្ឌចំការមន មានស្រុកកំណើតនៅខេត្តកណ្ដាល និងម្នាក់ទៀតឈ្មោះ ធា រ៉ា ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅជាមួយគ្នា និងមានស្រុកកំណើតជាមួយគ្នា។
តាមប្រភពព័ត៌មានពីកម្លាំងសមត្ថកិច្ចបានប្រាប់ឲ្យដឹងថា កម្លាំងរបស់ពួកគាត់បានធ្វើការដាក់គោលដៅត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍នៅត្រង់ចំណុចកើតហេតុខាងលើ បន្ទាប់មកក៏លេចមុខជនសង្ស័យទាំងពីរនាក់ខាងលើជិះម៉ូតូមួយគ្រឿងម៉ាកហុងដាវ៉េវ ពាក់ស្លាកលេខ ភ្នំពេញ ១M-៤៣៣៣ ដោយធ្វើដំណើរតាមបណ្តោយផ្លូវមុន្នីរ៉េត ក្នុងទិសដៅពីជើងទៅត្បូង ។
ប្រភពដដែលបានបន្តថា លុះជនសង្ស័យទាំង២នាក់ជិះម៉ូតូមកដល់ចំណុចគោលដៅខាងលើ ដោយមានការសង្ស័យ សមត្ថកិច្ចក៏ឃាត់ឲ្យឈប់ដើម្បីធ្វើការត្រួតពិនិត្យ និងឆែកឆេរខ្លួនជនសង្ស័យទាំងពីរនាក់ខាងលើ ពេលកំពុងធ្វើការឆែកឆេរ ក៏ស្រាប់តែប្រទះឃើញថ្នាំញៀនប្រភេទម្សៅក្រាមសថ្លាមួយកញ្ចប់តូចនៅលើជនសង្ស័យម្នាក់ក្នុងចំណោមពីរនាក់ខាងលើ រួចសមត្ថកិច្ចក៏ធ្វើការឃាត់ខ្លួនភ្លាមៗតែម្ដង។
បច្ចុប្បន្នសង្ស័យទាំងពីររួមនិងវត្ថុតាងត្រូវបានកម្លាំងនគរបានបញ្ជូនខ្លួនមកសួរនាំនៅអធិការដ្ឋាននគរបាលខណ្ឌទួលគោកដើម្បីកសាងសំណុំរឿងបញ្ជូនទៅតុលាការរងចាំចាត់ការទៅតាមនិតិវិធី៕
ចែករំលែកព័តមាននេះ