សហរដ្ឋអាមេរិក ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃពុធ ថាមនុស្សយន្តមួយដែលមានឈ្មោះថា Marty បានចាប់ផ្តើមធ្វើការក្នុងហាងទំនិញប្រមាណ៥០០កន្លែងនៅសហរដ្ឋអាមេរិក ។…
សហរដ្ឋអាមេរិក ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃពុធ ថាមនុស្សយន្តមួយដែលមានឈ្មោះថា Marty បានចាប់ផ្តើមធ្វើការក្នុងហាងទំនិញប្រមាណ៥០០កន្លែងនៅសហរដ្ឋអាមេរិក ។
លោក Tim Rowland ដែលជានាយកប្រតិបត្តិរបស់ Badger Technologies បាននិយាយថា មនុស្សយន្តដែលមានភ្នែកជាកាមេរ៉ានេះនឹងឈប់ពេលដែលប្រទះឃើញការកំពប់ផលិតផលណាមួយលើឥដ្ឋ ។ ប៉ុន្តែដើម្បីឲ្យដឹងច្បាស់ មនុស្សដែលធ្វើការនៅកន្លែងបញ្ជាក្នុងប្រទេសហ្វីលីពីននឹងត្រួតពិនិត្យរូបភាពជាមុនសិន ។
លោកបានបន្ថែមថា មានមនុស្សយន្តចំនួន២៥កំពុងធ្វើការក្នុងហាងទំនិញ Giant, Martin’s និង Stop & Shop ខណៈដែលមាន៣០ទៀតនឹងមកដល់ជារៀងរាល់សប្តាហ៍ ។ មនុស្សយន្តទាំងនេះប្រើ Sensor បែប Lidar ក្នុងការស្កេនបរិយាកាសជុំវិញហើយវានឹងឈប់ពេលដែលអតិថិជនដើរកាត់ពួកគេ ។
ភ្នែកធំៗរបស់ពួកវាជាភ្នែកក្លែងក្លាយទេ ប៉ុន្តែមនុស្សយន្តទាំងនេះមានកាមេរ៉ាទាំងអស់៨ដោយមានកាមេរ៉ាខ្លះបែរទៅឥដ្ឋ និងខ្លះទៀតបែរទៅធ្នើដាក់ទំនិញ ។ លោក Rowland បានបន្តថា មនុស្សយន្តរបស់លោកអាចនឹងត្រូវបានកែច្នៃឲ្យជួយត្រួតពិនិត្យទំនិញក្នុងស្តុករបស់ហាងថែមទៀតផង ។
មនុស្សយន្តខាងលើនឹងផ្តល់ដំណឹងដល់អ្នកធ្វើការក្នុងហាងទំនិញដទៃប្រសិនបើផ្លាកតម្លៃបានជ្រុះ ឬមានការកំពប់ផលិតផលណាមួយ ។ ពួកគេនឹងរងចាំនៅកន្លែងដែលមានការកំពប់រហូតដល់មានបុគ្គលិកចុចប៊ូតុងមួយបង្ហាញថាពួកគេបានដឹងនិងបានសម្អាត ។
Marty មិនមែនជាមនុស្សយន្តតែមួយដែលក្លាយជាជំនួយការអតិថិជននៅអាមេរិកក្នុងឆ្នាំនេះទេ។ ក្រុមហ៊ុន Walmart Inc និង Schnucks ក៏បានប្រើមនុស្សយន្តដើម្បីត្រួតពិនិត្យទំនិញក្នុងស្តុកដែរ ។
សហជីពមួយដែលតំណាងបុគ្គលិកហាងទំនិញ Giant និង Stop & Shop បាននិយាយថាពួកគេកំពុងតែតាមដាន Marty ។
លោក Marc Perrone ដែលជាប្រធានសហជីពនេះបាននិយាយថា «ការលូតលាស់យ៉ាងលឿននៃការធ្វើស្វ័យប្រវត្តិកម្មក្នុងហាងទំនិញគឺជាការគម្រាមកំហែងសម្រាប់បុគ្គលិកជនជាតិអាមេរិករាប់លាននាក់ដែលជំរុញដល់វិស័យ និងអតិថិជនដែលពួកគេបម្រើផងដែរ» ៕
ចែករំលែកព័តមាននេះ