រាជធានីភ្នំពេញ ៖ តារាចម្រៀងអ្នកនាង ម៉ៅ ស៊ីណាត ធ្លាប់បាក់ទឹកចិត្តខ្លាំងចំពោះការផ្សាយពីរឿងរ៉ាវអាក្រក់ និងវាយប្រហារលើរូបនាង ។ ស៊ីណាត ចាត់ទុកការចុះផ្សាយព័ត៌មានអាក្រក់ពីរូបនាងកន្លងមកធ្វើឲ្យនាងហាក់ខ្លាចរអាក្នុងការបន្តប្រឡូកក្នុងវិថីសិល្បៈ ដ្បិតនាងធ្លាប់ទទួលសម្ពាធផ្លូវចិត្តខ្លាំង ក្នុងពេលដែលអ្នកនាងទើបបែកពីស្វាមីដំបូង ។
ការអះអាងរបស់អ្នកនាងម៉ៅ ស៊ីណាត ពីបញ្ហានេះ បន្ទាប់ពី នាពេល ថ្មីៗកន្លងមកមានសារព័ត៌មានអេឡិចត្រូនិកមួយចុះផ្សាយពីរឿងរបស់នាងដោយបញ្ជាក់ថានាងមានមុខកាន់តែអាក្រក់ឡើង បន្ទាប់ពីកែសម្រស់អស់ខ្ទង់ពាន់ដុល្លារ ។ ព័ត៌មាននេះត្រូវគេចែកចាយតាមហ្វេសប៊ុក ជាហេតុធ្វើឲ្យម៉ៅ ស៊ីណាត សម្តែងការមិនសប្បាយ ដ្បិតការចុះផ្សាយនោះជាព័ត៌មានមិនពិត និងមិនបានសួរនាំនាងសូម្បីមួយម៉ាត់។
អ្នកនាងម៉ៅ ស៊ីណាត បានចាត់ទុកការចុះផ្សាយនូវព័ត៌មាននោះធ្វើឲ្យនាងបាក់ទឹកចិត្តយ៉ាងខ្លាំង ខណៈពេលដែលបញ្ហាស្រដៀងគ្នានេះនាងក៏ធ្លាប់ជួបប្រទះម្តងហើយកាលពីពេលកន្លងទៅ ។
បើតាមអ្វីដែលអ្នកនាង ម៉ៅ ស៊ីណាត បានសរសេរបង្ហោះតាមហ្វេសប៊ុកបញ្ជាក់ថា «នាងខ្ញុំ ម៉ៅ ស៊ីណាត សូមលើកដៃសំពះអង្វរពីចម្ងាយ ដោយក្តីមេត្តាមានអ្នកសិល្បៈច្រើនណាស់រងគ្រោះដោយសារព័ត៌មានមិនពិត មិនបានដឹងរឿងច្បាស់ ធ្វើឲ្យអ្នកសិល្បៈមួយចំនួនខ្លាចរអា មានជំងឺបាក់ទឹកចិត្តដោយសារជាន់ពន្លិចគ្នាថែមអ្នកខ្លះក៏លែងចង់ធ្វើអ្នកសិល្បៈ ។ ដូចជារូបនាងខ្ញុំកន្លងមក និងថ្មីៗនេះត្រូវបានសារព័ត៌ចុះយ៉ាងច្រើនដោយមិនបានសួរខ្ញុំមួយម៉ាត់ បងប្អូនសារព័ត៌មានដឹងទេថាខ្ញុំប៉ះពាល់អីទេ ។
កាលច្រើនឆ្នាំមុនខ្ញុំបានបែកបាក់ស្វាមី ខ្ញុំបានរងសំពាធធ្ងន់ណាស់ តែកាន់តែធ្ងន់ជាងនោះទៀតគឺសារព័ត៌មានវ៉ៃប្រហារខ្ញុំរហូត ធ្វើឲ្យខ្ញុំមានជំងីផ្លូវចិត្ត ខ្ញុំខ្លាចគេងមិនចង់ងើប ប្រាប់ខ្លួនឯងថាស្អែកស្លាប់ហើយទ្រាំទៅ លេងចង់ច្រៀង និងញ៉ាំ លែងចង់ធ្វើអ្វីទាំងអស់ ។ លុយរាប់លែងដឹង ដឹង តែខ្លាច និងដេករង់ចាំស្លាប់។
ដូចជាថ្មីៗនេះចុះពីខ្ញុំមហាសែនអាក្រក់ សួរថាមានបានសួរខ្ញុំទេ គឺអត់ទេ គ្រាន់តែចុះភ្លាមមិត្តភក្តិឆាតប្រាប់ ពីការសរសេរក្នុងអត្ថបទខ្លះ ខ្ញុំធ្វើទុក្ខបេះដូងមួយរំពេច ដែលខ្ញុំបានបន្សល់ទុកក្នុងខ្លួនតាំងពីជួបរឿងពីមុនមកម៉្លេះ ។
នេះជារឿងកើតលើខ្ញុំផ្ទាល់ តើអ្នកសារព័ត៌មានសប្បាយចិត្តទេស្តាប់ហើយ ? បើយល់ថាធ្វើត្រូវ ហើយសប្បាយចិត្តមិនខ្វល់ពីនាក់រងគ្រោះ អ្នកសារព័ត៌មានធ្វើទៀតចុះ តែខ្ញុំជឿលើបាប បុណ្យ និងការដាក់ទំនាយណាស់ ។ សូមមេត្តាឈប់សរសេរធ្វើបាបគ្នាទៀតទៅ ខ្ញុំសូមលើកដៃអង្វរ »៕
ចែករំលែកព័តមាននេះ