ម្តងនេះអាជ្ញាធរ និងសមត្ថកិច្ចដំណើរការតាមច្បាប់ហើយក្នុងថ្ងៃបុណ្យទន្លេខាងមុខ
- កំពង់ឆ្នាំង
ខេត្តកំពង់ឆ្នាំង ៖ ដើម្បីត្រៀមរៀបចំបុណ្យទន្លេរយៈពេល៣ថ្ងៃ នៅក្នុងខែមីនា ខាងមុខនេះ នៅថ្ងៃទី១៧ និង១៨ ខែមករា ឆ្នាំ២០១៩ អាជ្ញាធរ…
ខេត្តកំពង់ឆ្នាំង ៖ ដើម្បីត្រៀមរៀបចំបុណ្យទន្លេរយៈពេល៣ថ្ងៃ នៅក្នុងខែមីនា ខាងមុខនេះ នៅថ្ងៃទី១៧ និង១៨ ខែមករា ឆ្នាំ២០១៩ អាជ្ញាធរ និងសមត្ថកិច្ចបានសហការគ្នាចុះរៀបចំសណ្ដាប់ធ្នាប់លក់ដូរអោយមានរបៀបរបបនៅក្នុងផ្សារលើក្រុងកំពង់ឆ្នាំង ។
លោក លន់ ថា អនុប្រធានគណៈកម្មការផ្សារលើក្រុងកំពង់ឆ្នាំងបាននិយាយអោយដឹងថា យោងតាមសេចក្តីជូនដំណឹង និងការណែនាំរបស់សាលាខេត្តកំពង់ឆ្នាំង ក្រុមការងារចម្រុះរួមមានគណៈកម្មការផ្សារលើ និងសមត្ថកិច្ចនគរបាលសណ្ដាប់ធ្នាប់ខេត្តកំពង់ឆ្នាំងបានសហការគ្នាចុះរៀបចំសណ្ដាប់ធ្នាប់លក់ដូរនៅក្នុងផ្សារលើក្រុងកំពង់ឆ្នាំង ដើម្បីអោយមានរបៀបរៀបរយល្អ ខណៈដែលការលក់ដូរសព្វថ្ងៃនៅសងខាងផ្លូវកៀនផ្សារក្នុងផ្សារ និងនៅមុខផ្សារលើមានភាពអាណាធិបតេយ្យ ឥតសណ្តាប់ធ្នាប់ គ្មានរបៀបរៀបរយ និងធ្វើអោយបាត់បង់សោភ័ណភាពក្រុងកំពង់ឆ្នាំង ។
ជាក់ស្ដែងពេលចុះរៀបចំសណ្ដាប់ធ្នាប់នេះក្រុមការងារបានពិនិត្យឃើញអ្នកមួយចំនួនដាក់ទំនិ ញលក់ដូរ និងគ្រែលក់ដូរ លៀនលយចេញមកលើផ្លូវដើរ ដែលធ្វើអោយផ្លូវដើរតូចចង្អៀត អ្នកលក់ដូរមួយចំនួនទៀតក្នុងផ្សារលើបានដាក់ព្យួរទំនិញនៅលើផ្លូវដើរចេញចូលតែម្តង និងមួយចំនួនទៀតមានកន្លែងលក់ដូរស្រាប់ នៅខាងក្រោយផ្សារ ហើយបែរជានាំគ្នាយកទំនិញមកដាក់លក់ដូរតាមផ្លូវសងខាងផ្លូវខាងត្រូង និងខាងជើងកៀនផ្សារ និងនៅមុខផ្សារទៅវិញ ។
ជុំវិញការរៀបសណ្តាប់ធ្នាប់នេះក្រុមការងារបានចាក់ផ្សាយច្បាប់ និងសេចក្តីណែនាំរបស់គណៈកម្មការរៀបចំសណ្តាប់ខេត្តកំពង់ឆ្នាំង និងបានណែនាំដោយផ្ទាល់ថែមទៀត ដោយមិនអនុញ្ញាតអោយប្រជាពលរដ្ឋលក់ដូរតាមចិញ្ចើមផ្លូវសាធារណៈនៅក្នុងខេត្តឡើយ ។
ដោយឡែកនៅមុខផ្ទះល្វែងក្នុងទីប្រជុំជនផ្សារលើអាជ្ញាធរបានកំណត់អោយដាក់ទំនិញលក់ដូរចេញពីជញ្ជាំងផ្ទះតែ១ម៉ែត្រប៉ុណ្ណោះ ចំណែកនៅក្នុងផ្សារវិញ កន្លងមកក្រុមកាងារចម្រុះបានចុះបាញ់គំនូសទុកផ្លូវដើរ សងខាងផ្សារ មុខផ្សារ និងនៅក្នុងផ្សាររួចអស់ហើយ ។ ករណីប្រជាពលរដ្ឋជាអ្នកលក់ដូរមិនអនុវត្តន៍តាមសេចក្តីជូនដំណឹងនេះសមត្ថកិច្ចចម្រុះ និងចុះដកហូតទំនិញយកទៅរក្សាទុកនៅសាលាក្រុង ឬអធិការនគរបាលក្រុងកំពង់ឆ្នាំងដោយមិនទទួលខុសត្រូវលើការបែកបាក់ទំនិញទាំងនោះឡើយ ដើម្បីធ្វើការផាកពិន័យតាមផ្លូវច្បាប់ ។ ករណីមិនព្រមរៀងចាល សមត្ថកិច្ច និងត្រូវធ្វើការផាកពិន័យយ៉ាងតឹងរឹង ទ្វេដងតាមបញ្ញត្តិច្បាប់ ។
ជាមួយគ្នានេះ អាជ្ញាធរក្រុង និងខេត្តកំពង់ឆ្នាំង សូមអំពាវនាវដល់អាជីវករ ប្រជាពលរដ្ឋទាំងអស់នៅក្នុងខេត្តកំពង់ឆ្នាំង សូមមេត្តាយោគយល់ដោយចូលរួមត្រូវសហការជាមួយអាជ្ញាធរ ក្រុង ស្រុក រៀបចំកន្លែងលក់ដូរឲ្យមានសណ្ដាប់ធ្នាប់ មានបរិស្ថាន និងមានអនាម័យល្អ ដើម្បីរួមគ្នាធ្វើអោយទីក្រុង ទីប្រជុំជនរបស់យើង មានសោភ័ណភាពល្អ ទាក់ទាញភ្ញៀវគ្រប់ជាន់ថ្នាក់ ដែលនឹងមកចូលរួមលេងកម្សាន្តក្នុងពិធីបុណ្យទន្លេដែលមានរយៈពេល៣ថ្ងៃ ចាប់ថ្ងៃទី១៥ ដល់១៧ ខែមិនា ឆ្នាំ២០១៩ ខាងមុខនេះ នៅក្នុងក្រុងកំពង់ឆ្នាំង ៕
ចែករំលែកព័តមាននេះ