ប្រទេសអង់គ្លេស ៖ ព្រះអង្គម្ចាស់ហ្វីលីប ព្រះជន្ម៩៧ព្រះវស្សា ស្វាមីរបស់ព្រះមហាក្សត្រីយានីអេលីហ្សាបែតទី២ នៃចក្រភពអង់គ្លេស កាលពីថ្ងៃទី១៧ ខែមករា ឆ្នាំ២០១៩ ជួបប្រទះគ្រោះថ្នាក់រថយន្តបុកគ្នា…
ប្រទេសអង់គ្លេស ៖ ព្រះអង្គម្ចាស់ហ្វីលីប ព្រះជន្ម៩៧ព្រះវស្សា ស្វាមីរបស់ព្រះមហាក្សត្រីយានីអេលីហ្សាបែតទី២ នៃចក្រភពអង់គ្លេស កាលពីថ្ងៃទី១៧ ខែមករា ឆ្នាំ២០១៩ ជួបប្រទះគ្រោះថ្នាក់រថយន្តបុកគ្នា បណ្ដាលឲ្យរថយន្តទ្រង់ក្រឡាប់ នៅជិត SANDRINGHAM តំបន់ NORFOLK ភាគខាងកើតអង់គ្លេស តែសំណាងល្អទ្រង់ពុំរងរបួសអ្វីឡើយ។
តាមសេចក្ដីប្រកាសមួយ អ្នកនាំពាក្យព្រះបរមរាជវាំង BUCKINGHAM បានថ្លែងថា ព្រះអង្គម្ចាស់ហ្វីលីប ជួបគ្រោះថ្នាក់ចរាចរណ៍នោះ ជាមួយរថយន្តមួយគ្រឿងទៀត នារសៀលថ្ងៃទី១៧ មករា។ ទ្រង់គេចផុតពីគ្រោះថ្នាក់ដោយពុំមានរបួសឡើយ។ ព្រះអង្គម្ចាស់ហ្វីលីប ទ្រង់កាន់ចង្កូតរថយន្តខ្លួនឯងពេលជួបគ្រោះថ្នាក់ចរាចរណ៍នេះ ដែលបណ្ដាលឲ្យមនុស្ស២នាក់រងរបួសស្រាល។ ដើម្បីជាការប្រុងប្រយ័ត្នទុកមុន ទ្រង់ទទួលការពិនិត្យរបស់គ្រូពេទ្យម្នាក់ ហើយគ្រូពេទ្យរូបនោះអះអាងថា ទ្រង់ពុំមានរបួសអ្វីទេ។
យោងតាមសាក្សីម្នាក់ដែលទូរទស្សន៍ BBC បានសាកសួរថា ព្រះអង្គម្ចាស់ហ្វីលីប ពិតជាភ័យខ្លាំងណាស់។ ប៉ូលិសតំបន់ NORFOLK បាននិយាយថា ទទួលសេចក្ដីរាយការណ៍ពីគ្រោះថ្នាក់ចរាចរណ៍រថយន្តបុកគ្នានោះ មុនម៉ោង១៥ម៉ោងក្នុងស្រុកបន្តិច។ មនុស្ស២នាក់ជិះក្នុងរថយន្តមួយទៀតរងរបួសស្រាល។ ការស៊ើបអង្កេតមួយត្រូវបានបើកធ្វើ ដើម្បីកំណត់ពីមូលហេតុនៃគ្រោះថ្នាក់នោះ។
ព្រះអង្គម្ចាស់ហ្វីលីប បានចូលនិវត្តន៍កាលពីខែសីហា ឆ្នាំ២០១៧ ដោយទ្រង់កាន់តែជរា ក្រោយទ្រង់ចូលរួមក្នុងសកម្មភាពសាធារណៈផ្លូវការជាង២២.០០០លើក ចាប់តាំងពីព្រះមហេសីទ្រង់ឡើងគ្រងរាជ្យសម្បត្តិពីឆ្នាំ១៩៥២មក។ ព្រះមហាក្សត្រីយានីអេលីហ្សាបែតទី២ និងព្រះអង្គម្ចាស់ហ្វីលីប នាខែវិច្ឆិកាឆ្នាំ២០១៧ បានប្រារព្ធខួបអភិសេកនៅឯវិមាន WINDSOR ចម្ងាយប្រមាណជា៣០គីឡូម៉ែត្រពីទីក្រុងឡុងដ៏៕ ប្រភពវីដេអូពី BBC
ចែករំលែកព័តមាននេះ