ខេត្តស្វាយរៀង ៖ យុវជនម្នាក់បានបើកម៉ូតូលឿនដូចហោះវ៉ាជែងរថយន្តដឹកកម្មកររោងចក្រហើយក៏ជ្រុលទៅបុករថយន្តមួយគ្រឿងទៀតដែលបើកមកបញ្ច្រាសទិសគ្នាចំពីមុខពេញទំហឹងលាន់ដូចរន្ទះខ្ទាតទាំងម៉ូតូទាំងមនុស្សបោកក្បាលទៅចិញ្ចើមថ្នល់បណ្តាលឲ្យរងរបួសបែកក្បាលធ្ងន់ធ្ងរសន្លប់ស្លូកស្តឹងនៅនឹងកន្លែងផ្អើលដល់បងប្អូនប្រជាពលរដ្ឋចេញមកជួយសង្គ្រោះទាំងយប់។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧និង១០នាទីយប់ថ្ងៃទី១៧ ខែមករាឆ្នាំ២០១៩ នៅលើកំណាត់ផ្លូវជាតិលេខ១ ស្ថិតក្នុងភូមិថ្នល់កែង ឃុំកណ្តៀងរាយ ស្រុកស្វាយទាប ។
បើតាមសមត្ថកិច្ចបានឱ្យដឹងថា ជនរងគ្រោះ ឈ្មោះមឿន បារីស ភេទប្រុស អាយុ២១ឆ្នាំ មុខរបរ កម្មកររស់នៅភូមិប្រាសាទ ឃុំពោធិ៍រាជ ស្រុកស្វាយជ្រំ ខេត្តស្វាយរៀង ជាអ្នកបើកបរម៉ូតូម៉ាកហុងដាសេ១២៥ ស៊េរី២០១២ ពណ៌ខ្មៅ ពាក់ស្លាកលេខភ្នំពេញ ១I-៨៨៤៨។
ប្រភពពីសមត្ថកិច្ចបានឲ្យដឹងទៀតថា មុនពេលកើតហេតុ គេឃើញជនរងគ្រោះខាងលើបើកបរម៉ូតូតែម្នាក់ឯង ដោយធ្វើដំណើរពីទិសខាងកើតទៅលិចយ៉ាងលឿន លុះមកដល់ចំណុចកើតហេតុខាងលើបានបើកវ៉ាជែងរថយន្តដឹកកម្មករ កម្មការិនីរោងចក្រដែលធ្វើដំណើរស្របទឹសគ្នាក៏ជ្រុលចង្កូតទៅបុករថយន្តមកពីមុខបញ្ច្រាសទិសគ្នាពេញទំហឹងលាន់ដូចរន្ទះ បណ្ដាលឲ្យខ្ទាតប៉ើងទាំងម៉ូតូ ទាំងមនុស្សដួលបោកទៅលើចិញ្ចើមថ្នល់បែកក្បាលហូឈាមសន្លប់ស្តូកស្តឹងតែម្តង។
ប្រភពដដែលបានបន្តទៀតថា ក្រោយកើតហេតុរថយន្តមិនបានឈប់ទេ គឺបានបន្ថែមល្បឿនបើកគេចបាត់ពីកន្លែងកើតហេតុ បន្សល់ទុកតែជនរងគ្រោះដេកសន្លប់ស្តូកស្តឹងនៅលើចិញ្ចើមថ្នល់ ត្រូវបានពលរដ្ឋ និងសមត្ថកិច្ចជួយហៅរថយន្តសង្គ្រោះដឹកបញ្ជូនទៅសង្គ្រោះនៅមន្ទីរពេទ្យខេត្តស្វាយរៀង។
ចំពោះម៉ូតូជនរងគ្រោះ ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកស្វាយទាប ៕
ចែករំលែកព័តមាននេះ