ខេត្តរតនគិរី ៖ ជនជាតិដើមភាគតិចច្រាយបងប្រុសបង្កើតខឹងប្អូនយកម៉ាស៊ីនត្រង់ស៊ីន័រមិនប្រាប់លេងវាយអោយរងរបួសធ្ងន់ ដែលហេតុការណ៍នេះបានកើតឡើងនៅវេលាម៉ោង៧និង០៥នាទីយប់ ថ្ងៃទី១៧ ខែមករា ឆ្នាំ២០១៩ ស្ថិតនៅភូមិតេនសុស ឃុំយ៉ាទុង ស្រុកអូរយ៉ាដាវ ។
ជនរងគ្រោះឈ្មោះ សល់ ញើ ភេទប្រុស អាយ២៥ឆ្នាំ ជនជាតិច្រាយ បានរងរបួសចំឆ្អឹងជំនី ចំនួន២ដំបង ដោយឡែកជនបង្កជាបងបង្កើតមានឈ្មោះ សល់ ផ្ជេះ ភេទប្រុសអាយ២៨ឆ្នាំ ជនជាតិច្រាយ អ្នកទាំងពីរមានមុខរបរកសិករ រស់នៅភូមិឃុំកើតហេតុខាងលើ ។
ពាក់ព័ន្ធនឹងរឿងបង្ករបួសស្នាមខាងលើនោះ បើតាមរបាយការណ៍របស់សមត្ថកិច្ចប៉ូលិសស្រុកអូរយ៉ាដាវ បានអោយដឹងថា នៅមុនពេលកើតហេតុជនរងគ្រោះជាប្អូនបានទៅយកម៉ាស៊ីត្រង់ស៊ីន័រក្នុងផ្ទះរបស់បងយកទៅកាត់ដើមឈើ ក្នុងចម្ការដោយមិនបានប្រាប់បងរបស់ខ្លួនទើបបង្កជាជម្លោះកើតឡើងជេរគ្នាទៅវិញទៅមក បណ្តាលអោយបងប្រុសបង្កើតខឹងប្អូនយ៉ាងខ្លាំង ក៏បានហក់ទៅទាញដំបងឈើប៉ុន.កដៃប្រវែង១ម៉ែត្រ វាយចំនួន២ដំបងចំឆ្អឹងជំនី បណ្តាលអោយដេកដួលលើដី នៅមុខផ្ទះបងបង្កើតក្រោយមកទៀតត្រូវបានសាច់ញាតិប្តឹងសមត្ថកិច្ចអោយជួយអន្តរាគមន៍ និងដឹកជនរងគ្រោះមកមន្ទីរពេទ្យបង្អែកស្រុកបរកែវ ។
សមត្ថកិច្ចបានបន្តទៀតថា របួសជនរងគ្រោះហើមឆ្អឹងជំនីយ៉ាងខ្លាំង តែមិនបានគ្រោះថ្នាក់ដល់អាយុជីវិតនោះទេ ចំណែកជនបង្កជាបងបង្កើតនៅថ្ងៃទី១៨ ខែមករា ឆ្នាំ២០១៩ សមត្ថកិច្ចមិនទាន់ធ្វើការឃាត់ខ្លួននៅឡើយ មូលហេតុប្រជាពលរដ្ឋស្ទើរតែមួយភូមិបានអង្វរ និងសុំស្នើប៉ូលិសប៉ុស្តិ៍ និងប៉ូលិស្រុកអោយមានការអធ្យាស្រ័យព្រោះជម្លោះនេះបងប្អូនបង្កើត ។
សមត្ថកិច្ចប៉ូលិសស្រុកអូរយ៉ាដាវបានបញ្ជាក់ថា រឿងនេះមិនអាចអនុគ្រោះបានទេកំពុងតែសុំយោបល់ថ្នាក់លើ ដើម្បីឃាត់ខ្លួនអោយខានតែបាន ៕
ចែករំលែកព័តមាននេះ