រាជធានីភ្នំពេញ ៖ ជនសង្ស័យជាចោរឆក់កាបូបលុយ២នាក់ កាលពីថ្ងៃទី១៤ មករានេះ ត្រូវបានកម្លាំងសមត្ថកិច្ចការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញបានធ្វើការស្រាវជ្រាវ និងឈានដល់ការចាប់ឃាត់ខ្លួន នៅចំណុចផ្លូវលេខ៥ ១…
រាជធានីភ្នំពេញ ៖ ជនសង្ស័យជាចោរឆក់កាបូបលុយ២នាក់ កាលពីថ្ងៃទី១៤ មករានេះ ត្រូវបានកម្លាំងសមត្ថកិច្ចការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញបានធ្វើការស្រាវជ្រាវ និងឈានដល់ការចាប់ឃាត់ខ្លួន នៅចំណុចផ្លូវលេខ៥ ១ សង្កាត់ចតុមុខ ខណ្ឌដូនពេញ បន្ទាប់ពីពួកគេបានប្រព្រឹត្តបទល្មើស អំពើលួចមានស្ថានទម្ងន់ទោស (ឆក់កាបូបស្ពាយ ពណ៌ខ្មៅ) ពីអ្នកដំណើរ ។
ជនសង្ស័យម្នាក់ឈ្មោះ ហុង ម៉េងហ៊ត់ ភេទប្រុស អាយុ២៧ឆ្នាំ មុខរបរជាងទង ស្នាក់នៅផ្ទះមិនចាំលេខ ផ្លូវលេខ៥៩៨ សង្កាត់ទួលសង្កែ២ ខណ្ឌឬស្សីកែវ រាជធានីភ្នំពេញ និងម្នាក់ឈ្មោះ ធឿន ជា ភេទប្រុស អាយុ២៤ឆ្នាំ មុខរបរ និងស្នាក់នៅមិនពិតប្រាកដ ។
វត្ថុតាងដែលសមត្ថកិច្ចដកហូតមាន១- ម៉ូតូម៉ាកស៊ុយហ្សុយគីឡេត ពណ៌ស គ្មានស្លាកលេខ១គ្រឿង ចាប់យកពីឈ្មោះ ហុង ម៉េងហ៊ត់ ២- ម៉ូតូម៉ាកស៊ុយហ្សុយគីឡេត ពណ៌ទឹកប្រាក់ ពាក់ស្លាកលេខ ១HJ-៥៦៩៤ ៣- ទូរសព្ទ័ដៃចំនួន២គ្រឿង ម៉ាកអាយហ្វូន 6S ពណ៌ទឹកប្រាក់១គ្រឿង និងម៉ាក LG ពណ៌ទឹកមាស១គ្រឿង ៤- ចិញ្ចៀនលោហធាតុ ពណ៌លឿងស្លេក ចំនួន០២វង់ ៥- ខ្សែក ចំនួន០១ខ្សែ ៦- បណ្តោងរូបឆ្កែ ចំនួន០១ ចាប់យកពីឈ្មោះ ធឿន ជា ភស្តុតាងជារបស់ជនរងគ្រោះដែលឆក់យកបាន ៧- នាឡិកាដៃម៉ាក CARTIER ខ្សែស្បែក ពណ៌សូកូឡាដាំត្បូង ពណ៌ស ចំនួន១៣៤គ្រាប់១គ្រឿង ៨- ខ្សែក លោហធាតុ ពណ៌លឿងស្លេក មានបន្តោងរូបព្រះចំនួន០១ ដាំត្បូង ពណ៌ស ចំនួន២៥គ្រាប់ និង៩- ប្រាក់ដុល្លារចំនួន២៥០០ ដុល្លារអាមេរិក ។
គួរបញ្ជាក់ថា កាលពីវេលាម៉ោង៩និង៣០នាទីយប់ ថ្ងៃទី២៦ ធ្នូ ជនសង្ស័យ២នាក់បានជិះម៉ូតូធ្វើសកម្មភាពភាពឆក់កាបូប នៅចំណុចមុខស្តូបកម្ពុជាវៀតណាម ផ្លូវសុធារស សង្កាត់ចតុមុខ ខណ្ឌដូនពេញ រាជធានីភ្នំពេញ ពីជនរងគ្រោះឈ្មោះ ទូ សុទ្ធា ភេទប្រុស អាយុ៣៥ឆ្នាំ ស្នាក់នៅផ្ទះលេខ៦២ ផ្លូវលេខ៨ សង្កាត់ឬស្សីកែវ ខណ្ឌឬស្សីកែវ មុខរបរជាអ្នកលក់ដូរ ។
ជនរងគ្រោះបាត់បង់សម្ភារៈកាបូបស្ពាយ ពណ៌ខ្មៅ ចំនួន០១ លិខិតឆ្លងដែនវៀតណាមឈ្មោះ PHAN THI THANH HOAN ចំនួន០១ អត្តសញ្ញាណបណ្ណ័សញ្ជាតិវៀតណាមចំនួន០១ ខ្សែកមាសទម្ងន់៣តម្លឹងកន្លះចំនួន០១ខ្សែ នាឡិកាដៃស្រីចំនួន០១ ប្រាក់វៀតណាម៤លានដុង ប្រាក់ដុល្លារ៤៦០០០ដុល្លារអាមេរិក និងទូរសព្ទ័ដៃម៉ាក IPhoneX ចំនួន១ ។
ទីបំផុតលទ្ធផលបានត្រឹមឆក់ តែមិនមានវាសនាបានចាយប្រាក់ក្នុងអំពើទុច្ចរិតនោះទើបជនសង្ស័យ និងវត្ថុតាងត្រូវបានត្រូវបាននគរបាលកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធី ៕
ចែករំលែកព័តមាននេះ