ខេត្តស្វាយរៀង ៖ បុរសម្នាក់បានស្លាប់នៅក្នុងស្រះទឹកស្ថិតនៅផ្ទះឪពុកម្តាយក្មេក ដោយសារតែបូមទឹកស្រះរីង ហើយក៏យកខ្សែភ្លើងមករាយដើម្បីឆក់ត្រី ប៉ុន្តែអកុសលត្រូវខ្សែភ្លើងឆក់ បណ្តាលឱ្យស្លាប់ចោលប្រពន្ធកូនខ្ចី ទើបតែសម្រាលបានជិត១០ថ្ងៃ ។ ហេតុការណ៍នេះបានកើតឡើងកាលពីវេលាម៉ោង៩និង២០នាទីព្រឹកថ្ងៃទី១៧…
ខេត្តស្វាយរៀង ៖ បុរសម្នាក់បានស្លាប់នៅក្នុងស្រះទឹកស្ថិតនៅផ្ទះឪពុកម្តាយក្មេក ដោយសារតែបូមទឹកស្រះរីង ហើយក៏យកខ្សែភ្លើងមករាយដើម្បីឆក់ត្រី ប៉ុន្តែអកុសលត្រូវខ្សែភ្លើងឆក់ បណ្តាលឱ្យស្លាប់ចោលប្រពន្ធកូនខ្ចី ទើបតែសម្រាលបានជិត១០ថ្ងៃ ។
ហេតុការណ៍នេះបានកើតឡើងកាលពីវេលាម៉ោង៩និង២០នាទីព្រឹកថ្ងៃទី១៧ ខែមករា ឆ្នាំ២០១៩នេះ នៅផ្ទះឳពុកម្តាយក្មេក ស្ថិតក្នុងភូមិត្រពាំងឈូក ឃុំខ្សែត្រ ស្រុកកំពង់រោទិ៍ ខេត្តស្វាយរៀង។
បើតាមសមត្ថកិច្ចបានឲ្យដឹងថា ជនរងគ្រោះដែលស្លាប់ឈ្មោះអ៊ុកភិរម្យ ភេទប្រុស អាយុ២៨ឆ្នាំ មានទីលំនៅភូមិបុស ឃុំស្វាយតាយាន ស្រុកកំពង់រោទិ៍ ខេត្តស្វាយរៀង។
តាមប្រភពព័ត៌មានពីក្រុមគ្រួសារជនរងគ្រោះបានឲ្យដឹងថា នៅមុនពេលកើតហេតុ គឺជនរងគ្រោះ និងបងប្អូនសាច់ញាតិបាននាំគ្នាបូមទឹកស្រះចាប់ត្រីដើម្បីយកមកធ្វើម្ហូបដែលជាថ្ងៃចូលរោងការបងថ្លៃស្រីនៅថ្ងៃកើតហេតុខាងលើ។
ប្រភពដដែលបានបន្តទៀតថា ក្រោយពីបូមទឹកចេញពីស្រះរីងអស់ហើយនោះក៏នាំគ្នាចុះចាប់ត្រីរហូតចាប់អស់ក៏នាំគ្នាឡើងលើគោក នៅសល់តែជនរងគ្រោះគិតថា ចាប់ត្រីមិនទាន់អស់ដោយមានត្រីកប់ក្នុងភក់ ហើយក៏មានទឹកជ្រាបមកក្នុងស្រះវិញឃើញមានត្រីនៅសល់ ក៏ឡើងទៅលើផ្ទះយកឧបករណ៍ច្នៃសម្រាប់ឆក់ត្រីមករួចរាយខ្សែភ្លើងដើម្បីចុះឆក់ត្រីបន្ត ដោយមានអ្នកឈរមើល និងឈរចាំទទួលត្រី ពេលនោះមិនដឹងថាជនរងគ្រោះដាក់ឧបករណ៍ឆក់ត្រីចូលក្នុងភក់ប៉ះនឹងអ្វីនោះទេ ក៏បានឆក់ខ្លួនឯង ប៉ុន្តែអ្នកឈរមើលលើគោកមិនដឹងថា ជនរងគ្រោះ ត្រូវខ្សែភ្លើងឆក់នោះទេ។
លុះជនរងគ្រោះត្រូវឆក់ខ្សែភ្លើងដួលនៅក្នុងភក់ល្បប់ប្រកាច់ ទើបដឹងថាជនរងគ្រោះត្រូវខ្សែភ្លើងឆក់ ក៏នាំគ្នារត់ទៅបិទបារ៉ែតភ្លើង ប៉ុន្តែអ្វីៗវាហួសពេលទៅហើយ ព្រោះជនរងគ្រោះបានស្លាប់ភ្លាមៗនៅកន្លែងកើតហេតុតែម្តង ហើយបងប្អូនសាច់ញាតិក៏ឆោឡោ និងរាយការណ៍ជូនសមត្ថកិច្ចភ្លាមៗផងដែរ។
សមត្ថកិច្ចប្រាប់ឲ្យដឹងថា ក្រោយពីទទួលបានសេចក្តីរាយការណ៍ពាក់ព័ន្ធករណីខាងលើ សមត្ថកិច្ចនគបាលប៉ុស្ត៍រដ្ឋបាលឃុំខ្សែត្រក៏បានចុះមកដល់កន្លែងកើតហេតុដើម្បីធ្វើកោសល្យវិច្ច័យលើសព ។
ក្រោយពីពិនិត្យរួច សមត្ថកិច្ចបានសន្និដ្ឋានថា ជនរងគ្រោះពិតជាស្លាប់ដោយខ្សែភ្លើងឆក់ ប្រាកដមែន។
សមត្ថកិច្ចក៏បានប្រគល់សពអោយទៅក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើតផងដែរ។
ក្រោយកើតហេតុ ភាពរីករាយនៅក្នុងរោងការប្រែទៅជាភាពសោកសៅ ឮតែសម្លេងស្រែកទ្រហោទ្រហោយំ ហើយសពត្រូវសាច់ញាតិដឹកយកទៅធ្វើបុណ្យនៅឯស្រុកកំណើត ។ ចំពោះរោងការនៅតែបន្តរៀបចំដំណើរការដដែល៕
ចែករំលែកព័តមាននេះ