រាជធានីភ្នំពេញ ៖ ទីបំផុតជនជាប់សង្ស័យតែម្នាក់គត់ដែលជាជនជាតិចិន នារសៀលថ្ងៃទី១៦ មករា ត្រូវបានកម្លាំងសមត្ថកិច្ចនគរបាលខណ្ឌទួលគោកចាត់បញ្ជូនទៅកាន់សាលាដំបូងរាជធានីភ្នំពេញពាក់ព័ន្ធ និងរឿងអាស្រូវលើការបង្ខាំងអ្នកជំងឺទុក ដើម្បីទារយកប្រាក់រាប់ពាន់ដុល្លារ ។
ជនសង្ស័យរូបនោះមានឈ្មោះ A zhi ភេទប្រុស អាយុ៤៣ឆ្នាំ ជាជនជាតិចិន មុខរបរជាអ្នកគិតលុយនៅមន្ទីរពេទ្យ «វ៉ិចតូរៀ» ដែលសំណុំរឿងនេះបានស្ថិតនៅដៃលោក វង្ស ប៊ុនវិសុទ្ធ ព្រះរាជអាជ្ញារងកំពុងធ្វើការសាកសួរ ។
គួបញ្ជាក់ថា ក្រោយផ្ទុះរឿងអាស្រូវមួយនេះកើតឡើងនៅពេលជនរងគ្រោះអត់លុយឱ្យទៅខាងមន្ទីរពេទ្យ វ៉ិចតូរៀ ក៏ត្រូវបានគណៈកម្មការចម្រុះចុះស្រាវជ្រាវ និងសាកសួរដល់បុគ្គលិកចំនួន២៣នាក់ ហើយសម្រេចបិទឃ្លុំបេជាបណ្តោះអាសន្នព្រមទាំងឃាត់ខ្លួនជនជាតិចិនជាអ្នកគិតលុយម្នាក់ពាក់ព័ន្ធគំរាមកំហែងទារលុយ និងចាក់សោបង្ខាំងលើអ្នកជំងឺ ។ ការចុះពិនិត្យសាកសួរ និងធ្វើការបិទមន្ទីរពេទ្យ«វ៉ិចតូរៀ» នេះបានធ្វើឡើង តាំងពីវេលាម៉ោង១០និង៣០នាទីព្រឹក ថ្ងៃទី១៤ មករា ដែលដឹកនាំដោយលោក ឯក ឃុនឌឿន អភិបាលខណ្ឌទួលគោក និងមានការសម្របសម្រួលពីលោក វង្ស ប៊ុនវិសុទ្ធ ព្រះរាជអាជ្ញារងអមសាលាដំបូងរាជធានីភ្នំពេញ និងមានការចូលរួមពីមន្ត្រីសាលារាធានីភ្នំពេញ ក្រសួងសុខាភិល មន្ទីរសុខាភិបាលរាជធានីភ្នំពេញ និងការិយាល័យអន្តោប្រវេសន៍នៃស្នងការនគរបាលរាជធានីភ្នំពេញ ។
គួបញ្ជាក់ទៀតថា មន្ទីរពេទ្យ «វ៉ិចតូរៀ» ស្ថិតនៅលេខ៦១A ផ្លូវ៣១៥ ក្រុម២៧ភូមិ៦ សង្កាត់បឹងកក់២ ខណ្ឌទួលគោក ដែលមានលោកស្រីវេជ្ជបណ្ឌិតសៀង សុគន្ធ អាយុ៦៥ឆ្នាំ ជនជាតិខ្មែរ ជាអ្នកឈរឈ្មោះ លើអាជ្ញាប័ណ្ណអោយជនជាតិចិន ដែលជាអ្នកគ្រប់គ្រងសហគ្រាសឈ្មោះLI GUO ដែលធ្វើសកម្មភាពអាជីវកម្មមន្ទីរព្យាបាលជំងឺ ។ នៅក្នុងការត្រួតពិនិត្យសមត្ថកិច្ចចម្រុះបានធ្វើការត្រួតពិនិត្យសាកសួរបុគ្គលិកទាំងអស់ចំនួន២៣នាក់ ក្នុងនោះមានបុគ្គលិកពេទ្យចំនួន១៩នាក់ ជនជាតិខ្មែរ១៣នាក់ ជនជាតិចិនចំនួន៦នាក់ និងសន្តិសុខចំនួន៤នាក់ ។
បន្ទាប់ពីសាកសួរនៅវេលាម៉ោង១០និង៣០នាទីយប់ក៏បានបញ្ចប់ប្រតិបត្តិការដោយឃាត់ខ្លួន ជនជាតិចិនជាអ្នកគិតលុយម្នាក់ ឈ្មោះA zhi អាយុ៤៣ឆ្នាំ នាំបញ្ជូនទៅអធិការដ្ឋានខណ្ឌទួលគោក ដើម្បីសាកសួរព្រមទាំងបិទឃ្លុំបេទីតាំងមន្ទីរពេទ្យតែម្តង ។
តាមព័ត៌មានបានឱ្យដឹងថា ការបិទមន្ទីរពេទ្យ «វ៉ិចតូរៀ» នេះយោងតាមសេចក្តីសម្រេចរបស់ក្រសួងសុខាភិបាលលេខ០០៣អប ស/ ប ព ចុះថ្ងៃទី១៤ ខែមករា ឆ្នាំ២០១៩ សម្រេចបិទមន្ទីរពេទ្យវ៉ិចតូរៀ ជាស្ថាពរចាប់ពីថ្ងៃទី១៤ ខែមករា ឆ្នាំ២០១៩ និងយោងតាមពាក្យបណ្តឹងរបស់ជនរងគ្រោះភឿន មួយហ៊ាង ភេទស្រី អាយុ១៩ឆ្នាំ មានលំនៅសង្កាត់ជ្រោយចង្វារ ខណ្ឌជ្រោយចង្វារ ៕
ចែករំលែកព័តមាននេះ