ធនាគារ ប្រេដ ប៊ែង (ខេមបូឌា) បើកដំណើរការសាខាទី៣ របស់ខ្លួននៅកម្ពុជា ស្របពេលវិស័យធនាគារកំពុងមានសន្ទុះ
- ភ្នំពេញ
រាជធានីភ្នំពេញ ៖ ធនាគារ ប្រេដ ប៊ែង (ខេមបូឌា) (BRED Bank (Cambodia)) ដែលមានមូលដ្ឋាននៅប្រទេសបារាំង…
រាជធានីភ្នំពេញ ៖ ធនាគារ ប្រេដ ប៊ែង (ខេមបូឌា) (BRED Bank (Cambodia)) ដែលមានមូលដ្ឋាននៅប្រទេសបារាំង…
រាជធានីភ្នំពេញ ៖ ធនាគារ ប្រេដ ប៊ែង (ខេមបូឌា) (BRED Bank (Cambodia)) ដែលមានមូលដ្ឋាននៅប្រទេសបារាំង បានបើកដំណើរការសាខាទី៣របស់ខ្លួនជាផ្លូវការនៅប្រទេសកម្ពុជាដែលសាខានេះ បានប្រកាសដំណើរជាផ្លូវការ កាលពីថ្ងៃទី១៧ មករា ២០១៩ នៅតាមបណ្ដោយមហាវិថីម៉ៅសេទុង ក្នុងសង្កាត់បឹងកេងកង៣ ខណ្ឌចំការមន ដោយមានការចូលរួមពីសំណាក់លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា និងលោកជំទាវ Eva Nguyen Binh ឯកអគ្គរដ្ឋទូតបារាំងប្រចាំកម្ពុជាផងដែរ។
នៅក្នុងឱកាសបើកសម្ពោធជាផ្លូវការនេះ លោក Guillaume Perdon អគ្គនាយក ធនាគារ ប្រេដ ប៊ែង (ខេមបូឌា) ប្រចាំកម្ពុជា បានមានប្រសាសន៍ថា ធនាគារ ប្រេដ ប៊ែង (ខេមបូឌា) ជាធនាគារបារាំង និងអឺរ៉ុបតែមួយគត់ ដែលកំពុងធ្វើប្រតិបត្តិការ នៅក្នុងព្រះរាជាណាចក្រកម្ពុជា និងជាបុត្រសម្ព័ន្ធមួយនៃគ្រឹះស្ថានធនាគារដ៏ធំ និងរឹងមាំ។ ធនាគារ ប្រេដ ប៊ែង (ខេមបូឌា) បន្តសម្រេចបាននូវកំណើនជាបន្តបន្ទាប់ ដោយបានបើកការិយាល័យកណ្ដាលរបស់ខ្លួនកាលពីខែមីនា ២០១៧ សាខាទួលគោក កាលពីខែកញ្ញា ២០១៨ សាខាសៀមរាប កាលពីខែតុលា ២០១៨ និងសាខាថ្មីនៅលើមហាវិថីម៉ៅសេទុងនៅពេលនេះ។ រហូតមកដល់ពេលនេះ ធនាគារ ប្រេដ ប៊ែង មានអតិថិជនជិត២ពាន់នាក់ ដែលបានផ្ដល់ទំនុកចិត្តមកលើ ធនាគារ ប្រេដ ប៊ែង (ខេមបូឌា) រួចមកហើយ។
លោកបន្តថា នៅឆ្នាំ ២០២០ ធនាគារ ប្រេដ ប៊ែង (ខេមបូឌា) មានចក្ខុវិស័យពង្រីកខ្លួនអោយបាន ២០សាខា នៅទូទាំងប្រទេស ដើម្បីខិតចូលទៅកាន់តែជិតប្រជាជនរស់នៅជនបទ ដែលអនុញ្ញាតអោយពួកគេប្រើប្រាស់សេវាកម្មរបស់ធនាគារ ប្រេដ ប៊ែង បានកាន់តែងាយស្រួល ក្នុងអំឡុងម៉ោងបើកបម្រើអតិថិជន ដែលត្រូវបានពន្យារពេលវែង។
លោក Olivier Klein អគ្គនាយកនៃក្រុមធនាគារ ប្រេដ បានមានប្រសាសន៍ថា ប្រទេសកម្ពុជា គឺជាប្រទេសប្រកបដោយថាមពល ដែលមានការផ្លាស់ប្តូរយ៉ាងឆាប់រហ័ស។ ហេតុដូច្នេះហើយ យើងត្រូវតែមានសមត្ថភាពវិវត្តទៅមុខអោយបានលឿនផងដែរ។ នៅក្នុងក្របខណ្ឌនេះហើយ បានជាចាប់តាំងពីការបើកដំណើរការជាផ្លូវការ នៅក្នុងប្រទេសកម្ពុជារួចមក យើងបានដាក់ចេញ និងអនុវត្តនូវផលិតផល និងសេវាកម្មជាច្រើនសម្រាប់អតិថិជនគ្រប់ប្រភេទរបស់យើង មិនថាជាលក្ខណៈបុគ្គល សហគ្រាសខ្នាតតូច និងមធ្យម ឬ ក៏សហគ្រាសធំៗនោះទេ។
លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានមានប្រសាសន៍ផងដែរថា ការបង្កើត សាខាម៉ៅសេទុងនៃធនាគារ ប្រេដ ប៊ែង (ខេមបូឌា) នេះ នឹងផ្ដល់លទ្ធភាព ដល់ធនាគារ ក្នុងការផ្ដល់សេវាហិរញ្ញវត្ថុ ដល់អតិថិជនរបស់ខ្លួន អោយកាន់តែមានប្រសិទ្ធភាព និងឆាប់រហ័ស ព្រមទាំងចូលរួមចំណែកលើកស្ទួយជីវភាពរស់នៅរបស់ប្រជាជនកម្ពុជាផងដែរ។ ជាងនេះទៅទៀត ការសម្ពោធសាខាថ្មីនេះ ជាសក្ខីភាពបង្ហាញពីឆន្ទៈរបស់ភាគទុនិកក្នុងការដាក់ទុនវិនិយោគ រយៈពេលវែងនៅកម្ពុជា និងឆ្លុះបញ្ចាំងទំនុកចិត្តវិនិយោគិនបរទេស លើស្ថិរភាពនយោបាយ ស្ថិរភាពម៉ាក្រូសេដ្ឋកិច្ច និងជំរុញការរួមចំណែកកាន់សកម្មនៃវិស័យធនាគារ ក្នុងការអភិវឌ្ឍសេដ្ឋកិច្ចជាតិ។
លោកជំទាវបន្តថា ក្នុងបរិបទនៃការរីកចម្រើននៃវិស័យសេដ្ឋកិច្ច និងហិរញ្ញវត្ថុ ធនាគារជាតិនៃកម្ពុជា ក្នុងនាមជាអាជ្ញាធរអាណាព្យាបាល នៅតែបន្តពង្រឹងក្របខណ្ឌច្បាប់និងបទបញ្ញត្តិនានាដែលមានស្រាប់ និងបង្កើតបទបញ្ញតិ្តថ្មីៗ ដែលចាំបាច់អោយស្របតាមស្តង់ដាអន្តរជាតិព្រមទាំងពង្រឹងការត្រួតពិនិត្យ និងកិច្ចការពារអតិថិជន ដើម្បីទទួលបានជំនឿទុកចិត្ត ពីសាធារណជន មកលើប្រព័ន្ធធនាគារ។
លោកជំទាវបញ្ជាក់ថា គិតត្រឹមត្រីមាសទី៣ ឆ្នាំ ២០១៨ កន្លងទៅនេះ ទ្រព្យសកម្មរបស់ប្រព័ន្ធធនាគារ បានកើនឡើងដល់ ៣១ពាន់លានដុល្លារអាមេរិក ឥណទានបានកើនឡើងដល់ ១៧,៨៣ពាន់លានដុល្លារអាមេរិក ដើមទុនក៏បានកើនឡើងដល់ ៣,៨ពាន់លានដុល្លារអាមេរិក ខណៈប្រាក់បញ្ញើបានកើនឡើងដល់ ១៩,៣ពាន់លានដុល្លារអាមេរិក៕ ដោយសហការ
ចែករំលែកព័តមាននេះ