ការប្រកួតប្រជែងគ្នាឆ្ពោះទៅរកអនាគតនៃភាពបើកបរគ្មានតៃកុង កំពុងតែកើនឡើងជាលំដាប់ ហើយក្រុមហ៊ុនផលិតរថយន្តកំពុងតែនាំគ្នាជះលុយយ៉ាងសស្រាក់សស្រាំ ដើម្បីឱ្យសុបិនរបស់គេក្លាយជាការពិត ។ នេះបានជំរុញឱ្យក្រុមហ៊ុន Volkswagen ជួលអតីតថ្នាក់ដឹកនាំរបស់ក្រុមហ៊ុន Apple គឺ…
ការប្រកួតប្រជែងគ្នាឆ្ពោះទៅរកអនាគតនៃភាពបើកបរគ្មានតៃកុង កំពុងតែកើនឡើងជាលំដាប់ ហើយក្រុមហ៊ុនផលិតរថយន្តកំពុងតែនាំគ្នាជះលុយយ៉ាងសស្រាក់សស្រាំ ដើម្បីឱ្យសុបិនរបស់គេក្លាយជាការពិត ។
នេះបានជំរុញឱ្យក្រុមហ៊ុន Volkswagen ជួលអតីតថ្នាក់ដឹកនាំរបស់ក្រុមហ៊ុន Apple គឺ លោក Alexander Hitzinger ដើម្បីជួយដល់ក្រុមអភិវឌ្ឍន៍ការបើកបរដោយគ្មានតៃកុង ។ លោកក៏នឹងធ្វើការដោយផ្ទាល់ជាមួយនឹងផ្នែកបច្ចេកទេសនៃរថយន្តពាណិជ្ជកម្ម ក៏ដូចជាដឹកនាំគំនិតផ្តួចផ្តើមរបស់ក្រុមហ៊ុន Volkswagen’s Mobility ដែលជាកម្មវិធីមួយសម្រាប់អនាគត ។
លោក Hitzinger ដែលមកពីប្រទេសអាល្លឺម៉ង់ គឺជាផ្នែកមួយនៃគម្រោង Titan ដែលជាការប៉ុនប៉ងលើកទីមួយរបស់ក្រុមហ៊ុន Apple ក្នុងការចូលទៅក្នុងវិស័យរថយន្តបើកបរដោយគ្មានតៃកុង ។
គម្រោងនេះត្រូវបានបិទ បន្ទាប់ពីក្រុមហ៊ុនផលិតទូរស័ព្ទ iPhone មានភាពលំបាកជាខ្លាំងក្នុងការចូលក្នុងវិស័យថ្មី ក្រៅពីផលិតរបស់អេឡិចត្រូនិក ។ មុនពេលទៅកាន់ក្រុមហ៊ុន Apple លោក Hitzinger បានបម្រើការឱ្យក្រុមហ៊ុន Porsche (ដែលស្ថិតនៅក្រោម VW Group) ក៏ដូចជាជាមួយ Red Bull Technology ដែលធ្វើការជាមួយរថយន្តប្រភេទ Formula One ។
អ្វីដែលគួរឱ្យចាប់អារម្មណ៍នោះគឺក្រុមហ៊ុន VW និង Apple មានទំនាក់ទំនងជិតស្និទ្ធជាមួយគ្នា ដោយបានចុះកិច្ចព្រមព្រៀងមួយកាលពីខែឧសភា ដែលនឹងឃើញក្រុមហ៊ុន Apple ប្រើប្រាស់រថយន្ត VW ពាណិជ្ជកម្មក្នុងការបើកបរដោយខ្លួនឯង ។
ទោះជាយ៉ាងណាក៏ដោយក្រុមហ៊ុន Volkswagen បានទទួលស្គាល់ថា វាមានរយៈពេលប្រហែលពីរឆ្នាំ បន្ទាប់ពីដៃគូប្រកួតប្រជែងរបស់ខ្លួនក្នុងការអភិវឌ្ឍបច្ចេកវិទ្យាសម្រាប់វិស័យរថយន្តស្វយ័ត ។
ក្រុមហ៊ុន Volkswagen មានបំណងនាំយករថយន្តស្វយ័តដំបូងរបស់ខ្លួន ឱ្យមានបើកតាមដងផ្លូវនៅឆ្នាំ២០២១ ដែលរថយន្តនោះធ្លាប់មានមុខនៅក្នុងការដាក់តាំងពិព័រណ៍រថយន្ត Frankfurt ម្តងហើយកាលពីឆ្នាំ២០១៧ ។ រថយន្តនេះមានបំពាក់នូវបច្ចេកវិទ្យាបើកបរដោយគ្មានតៃកុង កម្រិតទី៥ (ខ្ពស់បំផុតក្នុងពេលនេះ) ដែលមានន័យថាវាអាចបើកដោយគ្មានត្រូវការតៃកុង១០០% ៕
ចែករំលែកព័តមាននេះ