ក្នុងសង្គមគ្រួសារមួយបើឪពុកម្តាយរវល់តែឈ្លោះប្រកែកគ្នា រវល់តែប្រព្រឹត្តអំពើពាលា តើវាសនាអនាគតរបស់កូននឹងទៅជាយ៉ាងណា?
ពិតណាស់កូនៗប្រាកដជានឹងជួបការលំបាកក្រៃលែង មើលចុះនៅក្នុងប្រទេសមានក្មេងស្រីប្រុសប៉ោឡែអាវ៉ាសែមិនតិចទេ ក៏ព្រោះបញ្ហាក្នុងសង្គមគ្រួសារដូចជា ម៉ែឪខ្វែងគំនិតគ្នា ដើរផឹកស៊ី ប្រព្រឹត្តអបាយមុខ រហូតឈានទៅបែកបាក់លែងលះចែកកូនគ្នា ធ្វើឲ្យពួកគេរស់នៅក្នុងសភាពក្រលំបាក បរិភោគមិនគ្រប់គ្រាន់ ទន់ខ្សោយស្មារតី កូនប្រុសស្រីទាំងនោះនឹងខូចចិត្តខ្លាំង ។
ឯគ្រួសារខ្លះព្រោះវិបត្តិម៉ែឪគ្រប់គ្រងផ្ទះមិនបានល្អ ដោយសារម៉ែឪរវល់ខ្វល់តែនឹងដើរផឹកស៊ី ប្រព្រឹត្តអំពើអាវ៉ាសែ ចំណែកកូនៗកាលបើឃើញសកម្មភាពម៉ែឪបែបនេះ ជួនកាលក៏លែងស្ដាប់ដំបូន្មានក៏ទៅប្រព្រឹត្តតាមទំនើងចិត្ត ។
ការដែលកូនលែងគោរព លែងធ្វើតាមសម្តីម៉ែឪ គឺមកអំពីម៉ែឪប្រព្រឹត្តឡេះឡោះខ្លួនឯងដូចជា ឪប្រមឹកផឹកទាំងយប់ទាំងថ្ងៃវង្វេងផ្ទះសម្បែងលែងគ្រប់គ្រងប្រពន្ធកូនកើត ធ្វើឲ្យក្នុងផ្ទះរយីករយាកអាប់ឥតរស្មី។ ចំណែកម៉ែខូចមារយាទប្រព្រឹត្តអបាយមុខសំកុកតែនឹងវង់ល្បែងនាំឲ្យខ្មោចព្រាយគឺអពមង្គលចូលមកដល់ក្នុងផ្ទះ។
ម៉ែអាងជេរឪ វាជារឿងអាក្រក់អាក្រីក្រៃលែង គឺជាបាបដ៏ជ្រៅខ្មៅកខ្វក់ក្នុងសង្គមគ្រួសារ ជះឥទ្ធិពលមិនល្អដល់ប្រទេសជាតិជាការទម្លាយវឌ្ឍនភាពសង្គម ។
សរុបមកគឺជាបាបគ្រោះគួរចៀសវាងកុំឲ្យកើតមាននៅក្នុងគ្រួសារ សូមឲ្យមាតាបិតាជាគំរូដ៏ល្អរបស់កូនប្រុសស្រី ។
ចែករំលែកព័តមាននេះ