រាជធានីភ្នំពេញ ៖ យុវជនម្នាក់បានចេញពីផឹកស៊ីវិញ ស្រវឹងទោរទន់បានបើករថយន្តម៉ាកតូយូតាព្រុសរេចង្កូតជ្រុលទៅបុកបង្គោលភ្លើងដែករបស់ប្រជាពលរដ្ឋបាក់អស់មួយដើមព្រមទាំងធ្វើអោយរថយន្តរងការខូចខាតយ៉ាងដំណំ ដែលហេតុការណ៍នេះបានកើតឡើងនៅវេលាម៉ោង៦និង៣០នាទីព្រលប់ ថ្ងៃទី១៦ ខែមករា ឆ្នាំ២០១៩ ទុលមុខផ្ទះលេខ៤២ ខាងលិចផ្សារទួលទំពូង ផ្លូវ១៦៧ កែង និង៤៤៤សង្កាត់ទួលទំពូង២ ខណ្ឌចំការមន ។
តាមសម្តីប្រជាពលរដ្ឋដែលឃើញហេតុការណ៍បានអោយដឹងថា មុនពេលកើតហេតុគេបានឃើញយុវជនម្នាក់វ័យជាង២០ឆ្នាំមិនដឹងថា ចេញពីផឹកស៊ីវិញនៅកន្លែងណានោះ គឺបានបើករថយន្តម៉ាកតូយូតាព្រុស ពណ៌ស ពាក់ស្លាកលេខ ភ្នំពេញ 2AM- 1629 ធ្វើដំណើរតាមផ្លូវ១៦៧ ក្នុងទិសដៅពីជើងទៅត្បូង ក្នុងល្បឿនលឿនព្រមទាំងស្រវឹងផងនោះលុះមកដល់ចំនុចកើតហេតុអ្នកបើកបរបានបួងចង្កូតឡើងទៅផ្លូវ៤៤៤ក៏ជ្រុលទៅបុក និងបង្គោលភ្លើងដែកមួយដើមរបស់ប្រជាពលរដ្ឋនៅពីមុខផ្ទះបណ្តាលអោយរងការខូចខាតបាក់វៀចអស់មួយដើមព្រមទាំងធ្វើអោយរថយន្តរងការខូចខាតខ្ទេចផ្នែកខាងមុខយ៉ាងដំណំ តែសំណាងល្អដែរមិនមានគ្រោះថ្នាក់ដល់មនុស្ស ។
ភ្លាមៗនោះដែរភាគីបុរសរូបនោះបានដឹងខ្លួនខុសក៏ព្រមលើដៃសំពះសុំទោសម្ចាស់ផ្ទះ និងទទួលខុសលើការខាតបង់ ។
ក្រោយពេលកើតហេតុឃើញមានសមត្ថកិច្ចមូលដ្ឋាន និងបានចុះទៅកន្លែងកើតហេតុ ដើម្បីពិនិត្យមើលថា មានការខូចខាតដល់សម្បត្តិរបស់រដ្ឋដែរ ឬទេ តែការពិនិត្យអស់ផលប៉ះពាល់ដល់ទ្រព្យសម្បត្តិរបស់រដ្ឋ គឺសមត្ថកិច្ចបានអោយភាគីរថយន្តសម្របសម្រួលជាមួយ និងម្ចាស់ផ្ទះ ដោយសុខចិត្តចេញថ្លៃការជួសជុល ដើម្បីបញ្ចប់រឿង ៕
ចែករំលែកព័តមាននេះ