រាជធានីភ្នំពេញ ៖ នៅក្នុងរដូវត្រីប្រហុក ខែបុស្ស ត្រូវនឹងខែមករា ឆ្នាំ២០១៩នេះ គេសង្កេតឃើញថា ត្រីសំបូរ តែនៅស្កាត់(ឡូត៍ដាយ)ខ្លះផ្នែកខាងលើក្នុងស្រុកពញាឮ ខេត្តកណ្តាលប៉ុណ្ណោះ…
រាជធានីភ្នំពេញ ៖ នៅក្នុងរដូវត្រីប្រហុក ខែបុស្ស ត្រូវនឹងខែមករា ឆ្នាំ២០១៩នេះ គេសង្កេតឃើញថា ត្រីសំបូរ តែនៅស្កាត់(ឡូត៍ដាយ)ខ្លះផ្នែកខាងលើក្នុងស្រុកពញាឮ ខេត្តកណ្តាលប៉ុណ្ណោះ ។ ចំណែក«គន្លង»នានានៅក្នុង«ស្កាត់» នៃរាជធានីភ្នំពេញ ត្រីពុំសូវសំបូរទេ ធ្វើឲ្យប្រជានេសាទ ដែលដាក់ដាយចាប់ត្រីត្អូញត្អែរពីមុខរបររបស់ខ្លួន ។ ទោះបីជាយ៉ាងណាក្តី រដ្ឋបាលជលផលបានជូនដំណឹងដល់ប្រជាពលរដ្ឋឱ្យនាំគ្នាទៅធ្វើប្រហុក ដោយអះអាងថា ត្រីឆ្នាំនេះសំបូរជាងឆ្នាំមុនៗ ។
នៅព្រឹកថ្ងៃទី១៦ មករា ឆ្នាំ២០១៩ ត្រូវនឹងថ្ងៃ១១កើត ខែបុស្ស កោះសន្តិភាពបានទៅផ្ទាល់ នៅស្កាត់ទី
៤(ឡូត៍ដាយលេខ៤) ក្នុងសង្កាត់ច្រាំងចំរេះទី២ ខណ្ឌឫស្សីកែវ ព្រំប្រទល់សង្កាត់ព្រែកតាសេក ខណ្ឌជ្រោយចង្វា និងបានផ្តិតយករូបភាពជាក់ស្តែងសង្កេតឃើញថា ត្រីពុំសូវសំបូរទេ នៅពេលលើកម្តងៗបានប្រមាណ៣០ ទៅ៥០គីឡូក្រាម ជាហេតុធ្វើឱ្យអ្នកទៅទិញត្រីប្រហុកនាំគ្នាអង្គុយចាំ និងខ្លះបានដណ្តើមគ្នារើសយកត្រីណាធំបន្តិចទៅលក់នៅតាមផ្សារនានា ។
ជួបជាមួយថៅកែដាយត្រីម្នាក់ សុំមិនបញ្ចេញឈ្មោះបានត្អូញត្អែរថា ការនេសាទឆ្នាំនេះ ជួបការលំបាក ត្រីមិនសូវសំបូរទេ ទោះបីទឹកធំក៏ដោយ វាប្រែប្រួលអស់ហើយ ។ តាមការត្អូញត្អែរនេះ ក៏បានស្តីបន្ទោសទៅលើបទល្មើសនេសាទឆក់ត្រីថា ជាការបំផ្លិចបំផ្លាញ ដោយមានការឃុបឃិតគ្នាជាលក្ខណៈប្រព័ន្ធ ។ អ្នកនេសាទរូបនោះបន្តទៀតថា លោកបានប្រកបមុខរបរនេសាទដោយដាក់ដាយចាប់ត្រីតាំងពីឆ្នាំ១៩៨០មកម្ល៉េះ ត្រីចេះតែខ្សត់ខ្សោយពីមួយឆ្នាំទៅមួយឆ្នាំ ។
នៅឆ្នាំ២០១៩ ខែត្រីប្រហុកនេះ ត្រីមិនសំបូរទេ ។ ការផ្សព្វផ្សាយព័ត៌មានថា ត្រីសំបូរមិនពិតទេ ត្រូវតែតាម«គន្លង»នៃស្កាត់នានានៅខាងលើប៉ុណ្ណោះ ។ ចំណែកតំបន់របស់គាត់ខ្សត់ណាស់ ។ ប្រៀបធៀបឆ្នាំមុន ឆ្នាំនេះរឹតតែខ្សត់ទៀត ។ អ្នកនេសាទដដែលថា នៅក្នុង១ឆ្នាំនេសាទបាន៤ខែ គឺខែតុលា, វិច្ឆិកា,ធ្នូ និងខែមករា ដែលជាខែចុងក្រោយ ហើយត្រីត្រូវតែខ្នើតទេ ។
នៅខ្នើត ខែបុស្ស ត្រូវខែមករានេះ ត្រីចាប់ផ្តើមត្រូវចាប់ពីថ្ងៃ៧កើត រហូតដល់១០កើត ហើយនៅថ្ងៃ១១កើតត្រីខ្សោយហើយ ។ បើសិនជាត្រីសំបូរ ត្រីត្រូវរហូតដល់១៥កើតថ្ងៃពេញបូណ៌មី ឬរហូតខែរនោចទៀត ក៏មានដែរ ។ នៅខែនេះ គាត់ចាប់ត្រីបានប្រមាណតែជាង១០តោនប៉ុណ្ណោះ ខុសពីខែមុនបានប្រមាណ២០តោន ។ ជាក់ស្តែង នៅថ្ងៃទី១៦ មករា គាត់លើកដាយ ម្តងៗក្នុងរយៈពេលប្រមាណ៣០ទៅ៤៥នាទី ចាប់ត្រីបានពី៥០ទៅ៦០គីឡូក្រាម តែពេលត្រូវខ្លាំងកាលពីថ្ងៃ៩កើត បានពី២០០ទៅ៣០០គីឡូក្រាមប៉ុណ្ណោះ ។
អ្នកនេសាទបានត្អូញទៀតថា អាជីវកម្មឆ្នាំនេះ ជួបការលំបាកខ្លាំង ដោយសារតែការចំណាយទៅលើកម្មករ១៨នាក់ ក្នុងម្នាក់ៗ ពី៥៥ម៉ឺនទៅ៦០ម៉ឺនរៀលក្នុង១ខែ បាយទឹកលើគាត់ និងបង់បន្ទុករដ្ឋ ក្នុង១ឆ្នាំ៤០លានរៀល ព្រមទាំងថ្លៃចំណាយលើសម្ភារជាឧបករណ៍នេសាទ ។
លោកងិន ឌី នាយខណ្ឌរដ្ឋបាលជលផលភ្នំពេញឱ្យដឹងថា «ត្រីឆ្នាំនេះ គ្រាន់បើជាងឆ្នាំមុនបន្តិច ហើយត្រីត្រូវច្រើននៅផ្នែកខាងលើក្នុងខេត្តកណ្តាល តែផ្នែកខាងក្រោមនៅភ្នំពេញមិនសូវត្រូវនោះទេ ។ ប្រហែលការត្អូញត្អែរនោះ សម្រាប់តែចំណុចដែលខ្លួនចាប់ត្រីទេ តែបើវាយតម្លៃជាទូទៅ នៅខែបុស្សនេះជាទូទៅខែត្រីប្រហុក ប៉ុន្តែទឹកស្រកលឿន ទឹកហូរខ្សោយ ចាប់ត្រីមិនសូវបាន ហើយអ្នកនេសាទចាប់បានដោយកៀរមិនមែនដោយលើកនោះទេ» ។
លោកងិន ឌី បន្តទៀតថា រាជធានីភ្នំពេញមាន៥ស្កាត់(ឡូតិ៍នេសាទ)ចាប់ពីស្ថានីយទូរទស្សន៍ស៊ីធីអិនដល់ស្ពានព្រែកព្នៅ មាន២២គន្លងដាយត្រី តែនៅសល់តែ១៩គន្លងដាយ មូលហេតុគន្លងខ្លះទឹកស្រកលឿនចាប់ត្រីអត់បាន អ្នកនេសាទអត់ដាក់ ។ ចំណែកនាយសង្កាត់ជលផលច្រាំងចំរេះ ឱ្យដឹងថា ត្រីឆ្នាំនេះត្រូវជាងឆ្នាំមុន ទៅតាមគន្លងនៅខាងដើម(ព្រែកក្តាម) ។
លោកនាយសង្កាត់ បញ្ជាក់ថា ឡូត៍ដាយចាប់ត្រីមាន១៥ស្កាត់ ដែលក្នុងនោះភ្នំពេញមាន៦ស្កាត់រាជរដ្ឋាភិបាលលុបចោលមួយ នៅសល់៥ស្កាត់ និង៩ស្កាត់ទៀត នៅស្រុកពញាឮ ខេត្តកណ្តាល ។ តាមប្រភពពីខេត្តកំពង់ឆ្នាំងឱ្យដឹងនាថ្ងៃទី១៦ មករាថា នៅពេលព្រឹកត្រីចុះមួយឈុលក៏ស្ងប់ទៅវិញ ដោយសារមេឃស្រទំ ។ ទោះបីជាបែបណាក្តី ចំពោះការវាយតម្លៃពីផលត្រីឆ្នាំនេះថាគ្មានអ្វីកត់សម្គាល់នោះទេ ៕
ចែករំលែកព័តមាននេះ