រាជធានីភ្នំពេញ ៖ រថយន្តកូរ៉េដឹកឥវ៉ាន់មួយគ្រឿង បើកកៀរជាមួយម៉ូតូមួយគ្រឿង បណ្តាលអោយខូចខាតតិចតួច មិនព្រមឈប់ដោះស្រាយ បែរជាព្យាយាមបើករត់គេចក៏ត្រូវប្រជាពលរដ្ឋនាំគ្នាជួយដេញតាម ហើយស្វាគមន៍ម្នាក់មួយដៃម្នាក់មួយជើង បណ្តាលឲ្យបុរសជាព្រូរងរបួសបែកក្បាលហូរឈាមស្រោចពេញខ្លួន ។…
រាជធានីភ្នំពេញ ៖ រថយន្តកូរ៉េដឹកឥវ៉ាន់មួយគ្រឿង បើកកៀរជាមួយម៉ូតូមួយគ្រឿង បណ្តាលអោយខូចខាតតិចតួច មិនព្រមឈប់ដោះស្រាយ បែរជាព្យាយាមបើករត់គេចក៏ត្រូវប្រជាពលរដ្ឋនាំគ្នាជួយដេញតាម ហើយស្វាគមន៍ម្នាក់មួយដៃម្នាក់មួយជើង បណ្តាលឲ្យបុរសជាព្រូរងរបួសបែកក្បាលហូរឈាមស្រោចពេញខ្លួន ។
ហេតុការណ៍នេះដែលបានកើតឡើងកាលពីវេលាម៉ោង៩យប់ ថ្ងៃទី១៦ ខែមករា នេះ នៅតាមបណ្ដោយផ្លូវ៣៨៨កែងនឹងផ្លូវ១៩៩ ស្ថិតនៅសង្កាត់ទួលស្វាយព្រៃ២ ខណ្ឌចំការមន ។
រថយន្ដបង្កជាប្រភេទរថយន្តកូរ៉េដឹកឥវ៉ាន់ ពណ៌ស ពាក់ស្លាកលេខភ្នំពេញ 2AB-4340 បើកបរដោយតៃកុងឈ្មោះ និត អាយុ២១ ស្នាក់នៅភូមិទួលសំបូរ ឃុំដំណាក់រាំងស្រុកឧដុង្គ ខេត្តកំពង់ស្ពឺ រងរបួសស្រាល ។ អ្នករួមដំណើរដោយបុរសម្នាក់ទៀតជាព្រូមិនស្គាល់អត្តសញ្ញាណ រងរបួសបែកក្បាលហូរឈាមស្រោចពេញខ្លួន ដោយសារប្រជាពលរដ្ឋខឹងនាំគ្នាព្រួតវាយបណ្តាលអោយរងរបួស ។
ចំណែករថយន្តរងគ្រោះម៉ាកmazada CX5 ពណ៌ទឹកប៊ិច ពាក់ស្លាកលេខភ្នំពេញ 2AD- 3166 រងការខូចខាតខ្ទេចមួយកំណាត់មុខទាំងស្រុង ចំណែកអ្នកបើកបរមិនមានរងរបួសទេ គឺខូចខាតតែរថយន្ត ។
តាមប្រភពព័ត៌មានពីតៃកុងរថយន្តបង្កបានប្រាប់អោយដឹងថា មុនកើតហេតុ គឺរូបគាត់បានដឹក ពិដានជ័រពីខេត្តកំពង់ស្ពឺ មកទម្លាក់នៅម្តុំវត្តទួលទំពូង រួចបើករថយន្តត្រឡប់ទៅវិញគោលបំណងត្រឡប់ទៅកំពង់ស្ពឺវិញ ដោយធ្វើដំណើរតាមដងផ្លូវ១៤៣ សង្កាត់ទួលទំពូង ក៏ប៉ះគ្នាជាមួយនឹងម៉ូតូមួយគ្រឿងមិនចាំម៉ាកបណ្តាលអោយដួលរងការខូចខាតតិចតួច ហើយភ្លាមៗគាត់មិនឈប់ដោះស្រាយទេ ដោយព្យាយាមបើករត់គេច ក៏ត្រូវប្រជាពលរដ្ឋដែលឃើញហេតុការណ៍បានដេញតាមរថយន្ត គាត់ឃើញដូច្នោះគាត់ភ័យក៏បន្ថែមល្បឿនកាន់តែលឿន ដើម្បីរត់គេចយករួចខ្លួន ក៏បើករត់រហូតមកដល់ផ្លូវ៣៨៨ ក្នុងទិសដៅពីត្បូងទៅជើង មកដល់ចំនុចកើតហេតុ ក៏មានរថយន្តរងគ្រោះខាងលើធ្វើដំណើរតាមបណ្ដោយផ្លូវ១៩៩ក្នុងទិសដៅពីលិចទៅកើតក្នុងល្បឿនធម្មតា កាត់ទទឹងផ្លូវគ្នា ក៏ត្រូវរថយន្តបង្កបុកចំហៀងក្បាលរថយន្តខាងស្តាំ បណ្តាលអោយខ្ទេចមួយកំណាត់មុខ វិលរថយន្តមួយជុំត្រឡប់ក្បាយមកក្រោយវិញខ្ទាតទៅប៉ះនឹងសួនច្បារការ៉ាសសាំងរងការខូចខាតតិចតួច ។
ចំណែករថយន្តបង្ករងការខូចខាតមួយចំហៀងខាងស្ដាំហើយរថយន្តបង្ក បើកហួសទៅមុខ២០ម៉ែត្រ ក៏ឈប់រថយន្តនាំគ្នាចុះរត់គេចខ្លួន ក៏ត្រូវប្រជាពលរដ្ឋដែលនៅកន្លែងកើតហេតុខឹងសម្បារក៏នាំចាប់ឃាត់ទុក ហើយស្វាគមន៍ម្នាក់មួយដៃម្នាក់មួយជើង បណ្តាលបុរសជាព្រូរងរបួសបែកក្បាលហូរឈាមស្រោចពេញខ្លួន ត្រូវបានបញ្ជូនទៅសង្គ្រោះនៅមន្ទីរពេទ្យ ។ រីឯតៃកុងរថយន្តរងរបួសស្រាលត្រូវបានកម្លាំងសមត្ថកិច្ចមូលដ្ឋានឃាត់ខ្លួនយកទៅសួរនាំប្រគល់ទៅខាងសមត្ថកិច្ចជំនាញចរាចរណ៍ចាត់ការបន្ត ។
ក្រោយកើតហេតុរថយន្តទាំងពីរត្រូវបានខាងកម្លាំងសមត្ថកិច្ចជំនាញចរាចរណ៍ធ្វើការវាស់វែងនឹងស្ទូចយកទៅរក្សាទុកបណ្តោះអាសន្ននៅស្នងការដ្ធាននគបាលចរាចណ៏ផ្លូវគោករាជធានីភ្នំពេញរងចាំដោះស្រាយគ្នានៅពេលក្រោយ ៕
ចែករំលែកព័តមាននេះ