រាជធានីភ្នំពេញ ៖ ក្រោមកិច្ចសហប្រតិបត្តិការល្អជាប្រពៃណី មន្ត្រីជំនាញរបស់ធនាគារកណ្តាលទាំងពីរ កម្ពុជា-ឡាវ បានបន្តការផ្លាស់ប្តូរទស្សនកិច្ចទៅវិញទៅមក ដែលបង្ហាញពីភាពជោគជ័យមួយនៃកិច្ចសហប្រតិបត្តិការទ្វេភាគីក្នុងវិស័យធនាគារ ។ ថ្លែងក្នុងកិច្ចប្រជុំទ្វេភាគី ដែលធ្វើឡើងនៅសណ្ឋាគារសូហ្វីតែល…
រាជធានីភ្នំពេញ ៖ ក្រោមកិច្ចសហប្រតិបត្តិការល្អជាប្រពៃណី មន្ត្រីជំនាញរបស់ធនាគារកណ្តាលទាំងពីរ កម្ពុជា-ឡាវ បានបន្តការផ្លាស់ប្តូរទស្សនកិច្ចទៅវិញទៅមក ដែលបង្ហាញពីភាពជោគជ័យមួយនៃកិច្ចសហប្រតិបត្តិការទ្វេភាគីក្នុងវិស័យធនាគារ ។
ថ្លែងក្នុងកិច្ចប្រជុំទ្វេភាគី ដែលធ្វើឡើងនៅសណ្ឋាគារសូហ្វីតែល ភ្នំពេញ ភូគីត្រា កាលពីថ្ងៃទី១៥ មករា ម្សិលមិញ លោក ជាចាន់តូ ទេសាភិបាលធនាគារជាតិនៃកម្ពុជា មានប្រសាសន៍ថា តាមរយៈការធ្វើទស្សនកិច្ចនាពេលកន្លងមក មន្ត្រីកម្ពុជាបានផ្លាស់ប្តូរចំណេះដឹងនិងបទពិសោធន៍ល្អៗដែលមានសារសំខាន់ក្នុងការពង្រឹងសមត្ថភាពជំនាញ ព្រមទាំងលើកម្ពស់សាមគ្គីភាព និងភាតរភាពរវាងមន្ត្រី ក៏ដូចជាស្ថាប័នទាំងពីរឲ្យកាន់តែមានភាពជិតស្និទ្ធបន្ថែមទៀត ។
លោកទេសាភិបាលថ្លែងថា ៖« ការជួបជុំនាពេលនេះ នឹងផ្តល់ឱកាសដល់ថ្នាក់ដឹកនាំនៃធនាគារកណ្តាលទាំងពីរកម្ពុជា-ឡាវក្នុងការផ្លាស់ប្តូរមតិយោបល់ទៅលើវឌ្ឍនភាពថ្មីៗទាក់ទងនឹងស្ថានភាពម៉ាក្រូសេដ្ឋកិច្ច និងវិស័យធនាគារ បញប្រឈមនានា និងជាពិសេសដើម្បីស្វែងរកលទ្ធភាពក្នុងការពង្រីកកិច្ចសហប្រតិបត្តិការនាឆ្នាំ២០១៩ និងនាពេលអនាគត សំដៅអភិវឌ្ឍន៍វិស័យធនាគារប្រកបដោយភាពរឹងមាំ និងគាំទ្រដល់ការរីកចម្រើននៃទំនាក់ទំនងសេដ្ឋកិច្ចប្រទេសទាំងពីរ »។
លោកបន្តថា ៖« ខ្ញុំមានជំនឿយ៉ាងមុតមាំថាក្រោមការដឹកនាំរបស់លោក Sonexay SITPHAXAY ធនាគារកណ្តាលឡាវ នឹងបន្តទទួលបានការរីកចម្រើន និងសម្រេចបានសមិទ្ធផលគាប់ប្រសើរថ្មីៗនាពេលអនាគត ហើយកិច្ចសហប្រតិបត្តិការធនាគារកណ្តាលយើងទាំងពីរនឹងបន្តមានភាពជិតស្និទ្ធរឹងមាំ »។
លោក Sonexay SITPHAXAY ទេសាភិបាលធនគារកណ្តាលឡាវ មានប្រសាសន៍ថា ៖« យើងដឹងហើយថា ប្រទេសយើងទាំងពីរ ឡាវ និងកម្ពុជាមានទំនាក់ទំនងលើកិច្ចសហប្រតិបត្តិការទៅវិញទៅមកតាំងពីយូរលង់ណាស់មកហើយ ពិសេសកិច្ចសហការរវាងធនគារឡាវ និងធនគារជាតិនៃកម្ពុជា »។
លោកបញ្ជក់ថា៖« អ្វីដែលលេចធ្លោ និងគួរឱ្យកត់សម្គាល់នៃកិច្ចសហប្រតិបត្តិការនេះគឺចាប់តាំងពីធនាគារទាំងពីរបានចុះអនុស្សរណៈយោគយល់គ្នាតាំងពីឆ្នាំ២០០៩មក ធនាគារកណ្តាលទាំងពីរបានផ្តាស់ប្តូរបច្ចេកទេសលើប្រធានបទផ្សេងៗជាប្រចាំ និងមានការរៀបចំជំនួបរវាងថ្នាក់ដឹកជាន់ខ្ពស់របស់ធនាគារទាំងពីរជារៀងរាល់ឆ្នាំ ហើយខ្ញុំមានការជឿជាក់យ៉ាងមុតមាំថា កិច្ចប្រជុំលើកនេះនឹងក្លាយជាឱកាសនៃការផ្លាស់ប្តូរ មតិយោបល់ដែលគួរឱ្យចាប់អារម្មណ៍រួមគ្នា ព្រមទាំងទទួលលទ្ធផលតាមការគ្រោងទុក »៕
ចែករំលែកព័តមាននេះ