ខេត្តស្វាយរៀង ៖ មានដំណាំស្វាយចន្ទីជិតដល់រដូវទទួលផលជួបសត្វល្អិតបំផ្លាញធ្វើឲ្យម្ចាស់ចម្ការព្រួយបារម្ភអំពីលការខាតបង់ ដោយសារសត្វល្អិតបំផ្លាញ និងបារម្ភពីគ្មានទីផ្សារលក់ចេញ ដោយសារមានកំណើននៃការដំដុះស្វាយចន្ទីកាន់តែច្រើនឡើងពីមួយឆ្នាំទៅមួយឆ្នាំហើយជួបសត្វល្អិតបំផ្លាញដោយកសិករខ្វះបច្ចេកទេសដាំដុះ និងការថែទាំ ។
ហើយបានអំពាវនាវសុំឲ្យក្រសួងកសិកម្ម និងមន្ត្រីមន្ទីរកសិកម្មរុក្ខាប្រម៉ាញ់ និងនេសាទខេត្តមេត្តាចុះជួយបណ្តុះបណ្តាលពីបច្ចេកទេសដាំដុះ និងថែទាំការពារសត្វល្អិតបំផ្លាញ ដើម្បីបានទិន្និផលខ្ពស់ និងមានស្តង់ដារអាចរកទីផ្សារលក់បានតម្លៃខ្ពស់ ។ ការអំពាវនាវនេះធ្វើឡើងនៅព្រឹក ថ្ងៃទី១៦ ខែមករា ឆ្នាំ២០១៩ នៅភូមិត្រស់ ឃុំត្រស់ ស្រុករមាសហែក ។
បើតាលោក សុខជា ដាលីន តំណាងប្រជាពលរដ្ឋរស់នៅឃុំត្រស់ ស្រុករមាសហែកបានអំពាវនាវ និងស្នើដល់ក្រសួងកសិកម្ម និងមន្ទីរកសិកម្មរុក្ខាប្រមាញ់ និងនេសាទមេត្តាជួយចុះធ្វើការបណ្តុះបណ្តាលបច្ចេកទេសដាំដុះ និងថែទាំដំណាំស្វាយចន្ទី ដើម្បីទទួលបានទិន្នផលខ្ពស់បន្តិច និងជួយរកទីផ្សារទទួលទិញឲ្យច្បាស់លាស់ផង ខណៈដែលប្រជាពលរដ្ឋដាំបានហើយក៏ប៉ុន្តែជួបបញ្ហាសត្វល្អិតបំផ្លាញបណ្តាលឲ្យបាត់បង់ទិន្នផលពេលប្រមូលផលគ្មានទីផ្សារ បើលក់ឲ្យឈ្មួញដើរប្រមូលទិញឲ្យតម្លៃទាប ខាតតម្លៃដើមដែលចំណាយ ។
លោកបានបន្តទៀតថា បច្ចុប្បន្នការដាំដំណាំស្វាយចន្ទីនៅក្នុងឃុំត្រស់ និងស្រុករមាសហែកមានការកើនឡើងច្រើនជាងបណ្តាឆ្នាំមុនៗ រីឯការថែទាំលើដំណាំមិនសូវមានបច្ចេកទេស ត្រឹមត្រូវទេ ដូច្នេះសូមអំពាវនាវដល់មន្ទីរកសិកម្មរុក្ខាប្រមាញ់ និងនេសាទខេត្ត និងក្រសួងកសិកម្មមេត្តាចុះអប់រំផ្សព្វផ្សាយពីវិធីថែទាំបច្ចេកទេសដាំ និងថែទាំដល់ប្រជាកសិករ ដើម្បីពួកគាត់ទទួលបានបច្ចេកទេសយកទៅអនុវត្តដាំឲ្យទទួលបានទិន្នផលខ្ពស់ និងតម្លៃបានខ្ពស់ជាងនេះបន្តិច ពីព្រោះសព្វថ្ងៃពុំទាន់មានក្រុមហ៊ុនណាមួយមកទទួលទិញនោះទេ ដោយធ្វើបានផលហើយត្រូវដឹកទៅលក់ឈ្មួញដែលបានបន្ទាបតម្លៃស្ទើរពុំរួចដើមផង ។
ទាក់ទិនការអំពាវនាវរបស់ប្រជាកសិករនេះលោក ថាច់ រតនា ប្រធានមន្ទីរកសិកម្មរុក្ខាប្រម៉ាញ់និងនេសាទខេត្តស្វាយរៀងបានមានប្រសាសន៍តាមទូរស័ព្ទថា សំណើដែលពលរដ្ឋស្នើឲ្យមន្ទីរជួយបណ្តុះបណ្តាលនោះមន្ទីរនឹងទទួលចុះផ្សព្វផ្សាយអប់រំបច្ចេកទេស និងរបៀបថែទាំនៅពេលខាងមុខ ខណៈដែលមន្ត្រីជំនាញចុះស្វែងយល់ពីទិន្នន័យដំណាំទាំងនោះ តែទោះជាយ៉ាងណាមន្ទីរបានចុះស្វែងយល់ដំណាំកសិឧស្សាហកម្មនេះញឹកញាប់ណាស់ ហើយព្រមទាំងជំរុញចលនាដាំបន្ថែមឲ្យអស់លទ្ធភាពដី ដើម្បីបំរើការនាំចេញ ។
ជុំវិញការស្នើសុំរកទីផ្សារប្រមូលទិញផលិតផល (គ្រាប់ស្វាយចន្ទី) ដែលផលិតបាននោះមន្ទីរនិងសហការជាមួយផ្នែកពាក់ព័ន្ធ ដើម្បីស្វែងរកនៅពេលណាមួយសមស្រប បន្ទាប់ពីផលិតផលយើងសម្រេចផលិតបានច្រើន និងតម្រូវការរោងចក្រសហគ្រាសណាមួយ ៕
ចែករំលែកព័តមាននេះ