រាជធានីភ្នំពេញ ៖ ទីតាំងបើកល្បែងស៊ីសងតាមប្រព័ន្ធអនឡាញមួយកន្លែង ត្រូវបានគណៈបញ្ជាការឯកភាពខណ្ឌឫស្សីកែវដឹកនាំដោយលោកជា ពិសី អភិបាលខណ្ឌចុះបង្ក្រាបកាលពីវេលាម៉ោង១១ព្រឹកថ្ងៃទី១៦ ខែមករា ឆ្នាំ ២០១៩ ដោយដកហូតបានកុំព្យូទ័រចំនួន១២គ្រឿង…
រាជធានីភ្នំពេញ ៖ ទីតាំងបើកល្បែងស៊ីសងតាមប្រព័ន្ធអនឡាញមួយកន្លែង ត្រូវបានគណៈបញ្ជាការឯកភាពខណ្ឌឫស្សីកែវដឹកនាំដោយលោកជា ពិសី អភិបាលខណ្ឌចុះបង្ក្រាបកាលពីវេលាម៉ោង១១ព្រឹកថ្ងៃទី១៦ ខែមករា ឆ្នាំ ២០១៩ ដោយដកហូតបានកុំព្យូទ័រចំនួន១២គ្រឿង បញ្ជូនទៅកាន់សាលាខណ្ឌឫស្សីកែវ ។
ទីតាំងបើកល្បែងស៊ីសងខាងលើដែលត្រូវអាជ្ញាធរបង្ក្រាបស្ថិតនៅផ្ទះលេខ១អា ផ្លូវលំ ភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ ដែលមានម្ចាស់ជាជនជាតិម៉ាឡេស៊ី។
តាមព័ត៌មានបានអោយដឹងថា ទីតាំងនេះបានបើកលេងល្បែងតាមអនឡាញរួមមានបៀ, បាល់ និងមានស្លុតម៉ាស៊ីនជាដើម ហើយអ្វីដែលគួរឱ្យចាប់អារម្មណ៍នោះគឺនៅខាងក្នុង និងមុខ ផ្ទះបើកល្បែងស៊ីសងនោះ ក៏មានដាក់ស្លាកដែលសរសេរថា «មានអាហារ និងភេសជ្ជៈឥតគិតថ្លៃ» «ចាញ់១០០ដុល្លារ អ្នកនឹងបាន៧ភាគរយវិញក្នុងមួយខែ» «អ្នកដែលនាំមិត្តភក្តិមកបង្កើតAccountនឹងមានឱកាសផ្សងសំណាងចាប់ឆ្នោត» ព្រមទាំងមានដាក់សញ្ញារូបបាល់, បៀ និងគ្រាប់ឡុកឡាក់ផងដែរ។
លោក ជា ពិសី អភិបាលខណ្ឌឫស្សីកែវ បានអោយដឹងថា ទីតាំងនេះបានបើកល្បែងស៊ីសង ជាច្រើនប្រភេទតាមអនឡាញ ពុំមានច្បាប់អនុញ្ញាតនោះទេ ។ លោកអភិបាលបានអោយដឹងទៀតថា ដោយមានការផ្តល់ព័ត៌មានពីប្រជាពលរដ្ឋពីទីតាំងល្បែងស៊ីសងនេះ អាជ្ញាធរក៍បានចុះមកត្រួតពិនិត្យ ហើយឃើញមានបើកលេងល្បែងស៊ីសងពិតប្រាកដមែន ក៍បានចាប់ដកហូតតែម្តង ។
លោកអភិបាលខណ្ឌក៍បានអំពាវនាវដល់អ្នករកស៊ីបើកល្បែងស៊ីសងគ្រប់ប្រភេទត្រូវបញ្ឈប់សកម្មភាពជាបន្ទាន់ ព្រោះអាជ្ញាធរនឹងចុះបង្ក្រាបដូចភ្លៀងរលឹម ។
លោកអភិបាលក៏បានសំណូមពរដល់ប្រជាពលរដ្ឋ មេត្តាជួយសហការ និងរាយការណ៍ពីសកម្មភាពបទល្មើសមកអាជ្ញាធរ និងសមត្ថកិច្ច ដើម្បីឈានចុះបង្ក្រាបអោយបានទាន់ពេល ។ ក្រោយការចុះបង្ក្រាប កំព្យូទ័រចំនួន១២គ្រឿងត្រូវបានអាជ្ញាធរដកហូត និងបញ្ជូនទៅកាន់សាលាខណ្ឌ តែម្ចាស់ពុំត្រូវបានឃាត់ខ្លួនឡើយ ៕
ចែករំលែកព័តមាននេះ