ខេត្តតាកែវ៖ ពិតជាមិននឹកស្មានដល់ទេ នៅរមនីយដ្ឋាន«ភ្នំតាម៉ៅ» គឺមានការរៀបចំបានយ៉ាងល្អ និងស្អាតខុសពីមុន ដោយមានរបៀបតាមកន្លែងនីមួយៗដែលខុសពីប៉ុន្មានឆ្នាំមុន ។ គេសង្កេតឃើញការរៀបចំបានល្អជាងមុន ចាប់តាំងពីមាត់ខ្លោងទ្វារច្រកចូលឡើងទៅលើដល់លើភ្នំ ហើយសល់តិចតួចប៉ុណ្ណោះ មិនទាន់បានល្អនៅឡើយ ។
អ្នកទៅលេងភ្នំតាម៉ៅ នៅពេលនេះមានការភ្ញាក់ផ្អើលនឹងការរៀបចំបានល្អប្រសើរជាងមុន បូករួមទាំងទេសភាព ទឹកស្រះថ្លាឆ្វង់ គួរឱ្យគយគន់ និងចង់ថតរូបស្វែលហ្វីនូវសម្រស់ធម្មជាតិបៃតងពិតៗនេះ ។
អ្នកនាងវណ្ណា ដែលបានទៅលេងភ្នំតាម៉ៅថ្មីៗនេះបាននិយាយថា «ខ្ញុំពិតជាមានការភ្ញាក់ផ្អើលហើយសប្បាយចិត្ត ដោយឃើញថា ភ្នំតាម៉ៅពេលនេះរៀបចំបានល្អជាងមុនច្រើន» ។
បើសិនជាអ្នកខានទៅទីនោះយូរ អ្នកអាចនឹងអាចជិះវង្វេងផ្លូវបាន ដោយសារផ្លូវមានការចាក់បេតុងស្អាតភ្លឹងៗ និងមានផ្លូវ២ ទៅ៣ច្រកឯណោះមុនជិះចូលដល់ភ្នំ ។ ប៉ុន្តែគេក៏បានឃើញដាក់ផ្លាកជាសញ្ញាសម្គាល់ច្រកចេញ-ច្រកចូលដែរ ។ យើងពិតជាដឹងហើយថា រមណីយដ្ឋានភ្នំតាម៉ៅ គឺស្ថិតក្នុងទឹកដីខេត្តតាកែវ ដោយយើងអាចជិះតាមបណ្តោយផ្លូវជាតិលេខ២ ក្នុងភូមិកណ្តឹងធំ ឃុំកណ្តឹង ស្រុកបាទី ។
នៅពីខាងមុខខ្លោងទ្វារច្រកចូលទៅភ្នំ ពលរដ្ឋដាក់តាំងលក់នំចំណីអាហារ និងមានលក់ភេសជ្ជៈពីខាងមុខខ្លោងទ្វារ ។ បើយើងជិះចូលគឺនឹងឃើញផ្លូវចាក់បេតុងស្អាត ងាយស្រួលឱ្យបងប្អូនធ្វើដំណើរងាយស្រួលទាំងរថយន្ត ម៉ូតូ ដែលវាខុសពីកាលប៉ុន្មានឆ្នាំមុន ផ្លូវមានខូចនិងគន្លុកធំៗជាច្រើនកន្លែង ។ចំណែកការសុំលុយ តាមដងផ្លូវក៏មិនសូវ ឃើញមានផងដែរ ។
ស្រមៃកាលពីជំនាន់មុនវិញ នៅទីតាំងសួនសត្វចម្រុះ គឺគេរៀបចំដាក់តែមួយកន្លែងទេ ដើម្បីឱ្យបងប្អូនដើរលេង និងមើលកម្សាន្ត ។ ប៉ុន្តែពេលនេះ គឺគេបានរៀបចំប្លែកហើយទីតាំងធំទូលាយជាងមុនទៀតផង ដោយមានទ្រុងសត្វគ្រប់ប្រភេទ ដែលគេយកមកដាក់ចិញ្ចឹមក្នុងទ្រុងសត្វនីមួយៗ គឺមានដាក់ជាអក្សរខ្មែរនិងបរទសបញ្ជាក់ពីឈ្មោះសត្វនោះ ឱ្យភ្ញៀវទេសចរខ្មែរនិងបរទេសបានដឹងនិងស្គាល់ ។
ជាក់ស្តែងក្នុងទ្រុងសត្វនីមួយៗ គឺឃើញមានសត្វក្រពើធំ-តូច២ទៅ៤ក្បាល, សត្វពស់, សត្វប្រើសតូច-ធំ, សត្វអណ្តើកធំ-តូច, សត្វស្វា, ខ្លាឃ្មុំព្រៃ, ក្តាន់, សត្វទោច និងដំរី ។ល។….ឱ្យបងប្អូនយើងដើរទស្សនាតាមទីតាំងកន្លែងនីមួយៗ ។ ចំពោះសត្វណាដែលកាចៗនោះ គឺដាក់របងការពារយ៉ាងមាំទាំ ដើម្បីកុំឱ្យបង្កគ្រោះថ្នាក់ដល់បងប្អូនដែលកំពុងដើរមើល ។
ក្រឡេកមកមើលក្បែរជណ្តើរឡើង ទៅកាន់លើភ្នំតាម៉ៅវិញ គឺឃើញបងប្អូនមួយចំនួនកាន់ធូប ទៀន ឡើងទៅអុជនៅលើភ្នំបន់ ស្រន់ពីរូបសំណាកតាម៉ៅ ដើម្បីសុំសេចក្តីសុខ ។ ឯខ្លះទៀត បានដើរទៅទិញម្ហូប នំ ចំណី អាហារ ដែលគេដាក់តាំងលក់ មានដូចជាមាន់ដុត, ត្រីអាំង, ក្តាមបំពង និងខ្លាញ់ក្តាមអាំងជាដើម ក្នុងតម្លៃសមរម្យអាចទទួលយកបាន ។
បងប្អូនខ្លះ បានមកកម្សាន្តជាលក្ខណៈគ្រួសារ ពេលគាត់ទិញចំណីអាហារួចហើយ ក៏ក្រាលកន្ទេលក្រោមម្លប់ដើមឈើធំៗ ញ៉ាំអាហារ និងផឹកជុំបងប្អូនយ៉ាងសប្បាយរីករាយ ។ ឯខ្លះទៀត បានទៅសម្រាកក្នុងតូបដែលគេសង់ដោយមានអង្រឹងចង ឱ្យសម្រាក និងអាចកុម្មង់ម្ហូបបានតាមដែលយើងត្រូវការ ដោយមិនមានគិតថ្លៃតូបនោះទេ ។
សរុបមក គឺពិតជាមានការប្រែប្រួលខ្លាំង នៅក្នុងរមនីយដ្ឋានភ្នំតាម៉ៅនាពេលបច្ចុប្បន្ន ។ ស្របពេលដែលប្រទេសកម្ពុជាពីមួយថ្ងៃទៅមួយថ្ងៃ គឺកំពុងបានអភិវឌ្ឍន៍ជាប្រចាំ ឱ្យទាន់សម័យកាលដ៏ស៊ីវិល័យនិងកាន់តែទំនើប ។
បងប្អូនខ្មែរសង្ឃឹមទៀតថា នៅថ្ងៃមុខ តាមរមណីយដ្ឋានទាំងអស់នៅក្នុងប្រទេសកម្ពុជា នៅតែអាចរក្សារូបរាង សម្រស់ និងភាពទាក់ទាញបាន ដើម្បីទុកឱ្យកូនចៅខ្មែរជំនាន់ក្រោយបានស្គាល់ បានដឹង ពីប្រវត្តិនៃតំបន់រមណីដ្ឋាននីមួយៗ ឱ្យបានច្បាស់លាស់ និងដើម្បីការកម្សាន្ត ។
បើបងប្អូនចង់ដឹងថា តើភ្នំតាម៉ៅពេលនេះបានប្រែប្រួលអ្វីខ្លះនោះ តោះនាំគ្នាទៅលេងលំហែអារម្មណ៍ជាមួយទេសភាពធម្មជាតិ បៃតងស្រស់ត្រកាល និងខ្យល់អាកាសបរិសុទ្ធម្តងមើល៍….!!!!
(ដោយ៖ ស្រីណា)
ចែករំលែកព័តមាននេះ