រាជធានីភ្នំពេញ ៖ បុរសម្នាក់ឌុបប្រពន្ធនិងកូនចេញពីកន្លែងធ្វើការជិតមកដល់ផ្ទះត្រូវក្រុមជនសង្ស័យឆក់ទូរស័ព្ទស៊េរីទំនើបមួយគ្រឿងបានសំរេច ហើយជនសង្ស័យជិះម៉ូតូគេចខ្លួនបាត់ស្រមោល បង្កអោយមានការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី១៥ ខែមករា ឆ្នាំ២០១៩ នៅមុខព្រលានយន្តហោះអន្តរជាតិភ្នំពេញពោធិ៍ចិនតុង ដែលស្ថិតនៅបណ្ដោយផ្លូវសហព័ន្ធរុស្ស៊ី ភូមិ ព្រៃទា សង្កាត់ចោមចៅទី៣ ខណ្ឌពោធិ៍សែនជ័យ ។
ជនរងគ្រោះឈ្មោះ សៅ រតនា ភេទប្រុស អាយុ២៩ឆ្នាំ មុខរបរបុគ្គលិកក្រុមហ៊ុនទេសចរណ៍ ស្នាក់នៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅ ភូមិថ្នល់បែក ឃុំរកាក្រៅស្រុក ដូនកែវ ខេត្តតាកែវ។
ចំណែកទូរស័ព្ទមួយគ្រឿងដែលជនសង្ស័យឆក់យកទៅបាត់នោះម៉ាក iPhone XS Max ពណ៌ប្រផេះ តំលៃ១៥៩៦ដុល្លារ ទើបបង់រំលោះ។
តាមប្រភពព័ត៌មានពីជនរងគ្រោះបាននិយាយប្រាប់ថា នៅមុនពេលកើតហេតុ គាត់បានជិះម៉ូតូឌុប
ប្រពន្ធ និងកូនប្រុសតូចម្នាក់ចេញពីកន្លែងធ្វើការនៅម្តុំផ្សារអុីអន២ ហើយបានត្រឡប់មកផ្ទះវិញ ដោយជិះម៉ូតូមួយគ្រឿងម៉ាកហ្វីណូ។
ប្រភពដដែលបានបញ្ជាក់ប្រាប់ថា ទូរស័ព្ទរបស់គាត់បានទុកនៅក្នុងហោប៉ៅអាវ លុះគាត់បើកបរម៉ូតូមកដល់ចំណុចស្តុបមុខព្រលានយន្តហោះ ក៏ឈប់ ព្រោះភ្លើងស្តុបពណ៌ក្រហម ពេលកំពុងឈប់ស្តុបនោះ ស្រាប់តែឃើញជនសង្ស័យទាំង២នាក់ខាងលើជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ មិនចាំស៊េរី ហើយបានមកឈប់ស្តុបជាមួយគាត់ដែរ ពេលភ្លើងស្តុបពណ៌ខៀវ គាត់ក៏បានជិះម៉ូតូចេញទៅ តែមិនបានចាប់អារម្មណ៍ ស្រាប់តែជនសង្ស័យជិះម៉ូតូមកកៀកគាត់ ហើយធ្វើសកម្មភាពឆក់យកទូរស័ព្ទដៃពីហោប៉ៅរបស់គាត់ ។
ភ្លាមៗនោះ ម៉ូតូរបស់គាត់មិនបានដួលឡើយ ហើយជនសង្ស័យខាងលើក៏បានជិះម៉ូតូបញ្ច្រាសទិសចរាចរ នៅពេលនោះដែរ គាត់បានជិះម៉ូតូតាមមើលជនសង្ស័យដែរ គ្រាន់តែដឹងថា ជនសង្ស័យជិះម៉ូតូចូលម្តុំខាងក្រោយព្រលានយន្តហោះអន្តរជាតិភ្នំពេញ ដែលស្ថិតនៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ ។
ក្រោយពេលកើតហេតុ ជនរងគ្រោះខាងលើបានជិះម៉ូតូទៅប្តឹងសមត្ថកិច្ចអោយមកជួយអន្តរាគមន៍ភ្លាមៗផងដែរ តែមកដល់ចំណុចដែលជនជនសង្ស័យជិះម៉ូតូចូលទៅនោះ សមត្ថកិច្ចរុករកមិនឃើញឡើយ ដោយជនសង្ស័យខាងលើជិះម៉ូតូគេចខ្លួនបាត់ទៅហើយ ៕
ចែករំលែកព័តមាននេះ