ប្រទេសហ្ស៊ីមបាវេ ៖ មនុស្សច្រើននាក់បានត្រូវស្លាប់ កាលពីថ្ងៃទី១៤មករា ជាថ្ងៃដំបូងនៃកូដកម្មទូទៅរយៈពេល៣ថ្ងៃ ដើម្បីប្រឆាំងការតម្លើងតម្លៃប្រេងភ្លាមៗនៅប្រទេសហ្ស៊ីមបាវេ។ នាថ្ងៃទី១៤មករាមានបាតុកម្មហិង្សានានាប្រឆាំងការតម្លើងថ្លៃប្រេងឥន្ធនៈយ៉ាងខ្ពស់ ប្រកាសដោយប្រធានាធិបតីលោកEMMERSON MNANGAWA ក្នុងប្រទេសមួយដែលកំពុងស្ថិតលើមាត់ជ្រោះ…
ប្រទេសហ្ស៊ីមបាវេ ៖ មនុស្សច្រើននាក់បានត្រូវស្លាប់ កាលពីថ្ងៃទី១៤មករា ជាថ្ងៃដំបូងនៃកូដកម្មទូទៅរយៈពេល៣ថ្ងៃ ដើម្បីប្រឆាំងការតម្លើងតម្លៃប្រេងភ្លាមៗនៅប្រទេសហ្ស៊ីមបាវេ។
នាថ្ងៃទី១៤មករាមានបាតុកម្មហិង្សានានាប្រឆាំងការតម្លើងថ្លៃប្រេងឥន្ធនៈយ៉ាងខ្ពស់ ប្រកាសដោយប្រធានាធិបតីលោកEMMERSON MNANGAWA ក្នុងប្រទេសមួយដែលកំពុងស្ថិតលើមាត់ជ្រោះ នៃការផ្ទុះសង្គមមកពីវិបត្តិសេដ្ឋកិច្ចនិងហិរញ្ញវត្ថុ។ នាថ្ងៃដំបូងនៃកូដកម្មទូទៅរយៈពេល៣ថ្ងៃ ប៉ូលិសបានធ្វើអន្តរាគមន៍ ដើម្បីបំបែកមនុស្សច្រើនរយនាក់ដែលរាំងខ្ទប់ផ្លូវថ្នល់នានា ហើយប្រមូលប្លន់យករបស់របរ នៅតាមហាងនានា នៃទីក្រុងធំបំផុត២របស់ប្រទេស គឹក្រុងហារ៉ារេនិងក្រុងប៊ូឡាវ៉ាយ៉ូ ធ្វើឲ្យទីក្រុងទាំងនេះស្ទះសកម្មភាពយ៉ាងខ្លាំង។
រដ្ឋមន្ត្រីសន្តិសុខលោកOWEN NCUBE ប្រកាសថា ប្រតិបត្តិការបង្ក្រាបទាំងនោះនាំឲ្យបាត់បង់អាយុជីវិតមនុស្សនិងទ្រព្យសម្បត្តិច្រើន ហើយមនុស្សច្រើននាក់រងរបួស ក្នុងចំណោមកងកម្លាំងប៉ូលិសនិងប្រជាជន។ លោកពុំបានបញ្ជាក់ពីចំនួនជនរងគ្រោះឡើយ។
មុននេះអង្គការក្រៅរដ្ឋាភិបាលអះអាងថាសាក្សីច្រើននាក់រាយការណ៍ថា ប៉ូលិសបានបាញ់ប្រហារនៅក្នុងរដ្ឋធានីហារ៉ារេ និងថាមនុស្ស១៣នាក់រងរបួស។
តម្លៃប្រេងសាំងនៅប្រទេសនោះបានឡើងដល់គុណ២,៥ដង។ ក្នុងសេចក្ដីថ្លែងការណ៍មួយ រដ្ឋមន្ត្រីសន្តិសុខគូសបញ្ជាក់ថា មនុស្សយ៉ាងតិច២០០នាក់បានត្រូវចាប់ខ្លួន។ លោកបានទម្លាក់ការទទួលខុសត្រូវ លើការបង្កចលាចលនេះ ទៅលើចលនាដើម្បីការផ្លាស់ប្ដូរប្រជាធិបតេយ្យ ជាគូប្រជែងសំខាន់របស់គណបក្ស ZANU-PFកំពុងកាន់អំណាច តាមរយៈការបញ្ឆេះកំហឹងបណ្ដាអង្កការក្រៅរដ្ឋាភិបាល សង្គមស៊ីវិលនិងបណ្ដាអង្គការយុវជន៕
ចែករំលែកព័តមាននេះ