ខេត្តកំពង់ធំ ៖ ស្ត្រីម្នាក់ដើរឆ្លងផ្លូវមិនប្រយ័ត្នម៉ូតូត្រូវម៉ូតូមួយគ្រឿងបើកបរក្នុងល្បឿនបុកបណ្តាលឱ្យស្លាប់តាមផ្លូវពេលបញ្ជូនទៅមន្ទីរពេទ្យ ។ ហេតុការណ៍នេះបានកើតឡើងកាលពីវេលាម៉ោង៨និង២០នាទីយប់ថ្ងៃទី១៤ ខែមករា ឆ្នាំ២០១៩ នៅលើកំណាត់ផ្លូវលំក្រាលកៅស៊ូ ស្ថិតក្នុងភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ ។
ជនរងគ្រោះឈ្មោះ លូង ឡៃ ភេទស្រី អាយុ៥៧ឆ្នាំ នៅភូមិឃុំកើតហេតុខាងលើ របួសធ្ងន់ហើយក៏បានស្លាប់តាមផ្លូវពេលបញ្ជូនទៅមន្ទីរពេទ្យ។ ចំណែកភាគីខាងម៉ូតូម៉ាកស៊ុយហ្សុ៊យគីស្មាស់ ពណ៌ខ្មៅ គ្មានផ្លាកលេខ បើកបរដោយឈ្មោះ អ៊ុន ពេជ ភេទប្រុស អាយុ២៥ឆ្នាំ នៅភូមិអណ្តោត ឃុំក្រវ៉ា ស្រុកបារាយណ៍ ខេត្តកំពង់ធំ បានរងរបួសស្រាល និងត្រូវសមត្ថកិច្ចចាប់ឃាត់ខ្លួន ។
សមត្ថកិច្ចនគរបាលបានឲ្យដឹងថា មុនពេលកើតហេតុ ស្ត្រីរងគ្រោះបានដើរឆ្លងកាត់ផ្លូវ ក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែមានបុរសម្នាក់បើកបរម៉ូតូមួយគ្រឿងក្នុងទិសដៅពីត្បូងទៅជើងក្នុងល្បឿនយ៉ាងលឿនក្នុងស្ថានភាពស្រវឹង បានបុកស្ត្រីជាអ្នកថ្មើរជើង បណ្តាលឱ្យរងរបួសធ្ងន់ហើយក៏បានស្លាប់តាមផ្លូវពេលបញ្ជូនទៅមន្ទីរពេទ្យ ។ ចំណែកអ្នកបើកបរម៉ូតូបានរងរបួសស្រាល ។
ក្រោយពេលកើតហេតុ អ្នកបើកបរ និងម៉ូតូត្រូវបានសមត្ថកិច្ចនាំយកទៅកាន់អធិការដ្ឋាននគរបាលស្រុកបារាយណ៍ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ