រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា មេដឹកនាំអតីតគណបក្សសង្គ្រោះជាតិបានកំពុងតែយកលេសរឿងពលរដ្ឋជិត៣លាននាក់ បោះឆ្នោត ឲ្យកាលពីឆ្នាំ២០១៣ មកធ្វើនយោបាយ ។
ការលើកឡើងនេះបន្ទាប់ពីក្រុមប្រឆាំង ពិសេសលោក សម រង្ស៊ី បានអះអាងថា បក្សកាន់ អំណាចបានរំលោភលទ្ធិប្រជាធិបតេយ្យរំលោភឆន្ទៈពលរដ្ឋជិត៣លាន ដែលបោះឆ្នោតឲ្យបក្សប្រឆាំងតាមរយៈរំលាយគណបក្សប្រឆាំង ។
លោកសុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី១៥ មករា ដោយបានឲ្យមេបក្សប្រឆាំងឈប់និយាយពីឆន្ទៈពលរដ្ឋជិត៣លានដែលបោះឆ្នោតគាំទ្រ កាលពីឆ្នាំ២០១៣ ។ លោកបានបន្តថា ក្នុងការបោះឆ្នោតនៅឆ្នាំ២០១៣ ប្រជាពលរដ្ឋជិត៣លាននាក់បានគាំទ្រអតីតបក្សប្រឆាំងមែន ដែលធ្វើឲ្យបក្សនេះទទួលបានអាសនៈ៥៥នៅក្នុងរដ្ឋសភា ។ ក៏ប៉ុន្តែក្រោយការបោះឆ្នោតភ្លាមមេបក្សនេះបានប្រកាសបដិសេធឆន្ទៈរាស្ត្រទាំងជិតកន្លះនគរនេះរួចហើយ តាមរយៈការបដិសេធលទ្ធផលបោះឆ្នោតចោលជាអាសារបង់ដែលធ្វើឲ្យប្រជា ពលរដ្ឋផ្លាស់ប្តូរជំហររបស់ខ្លួនឈប់គាំទ្រអតីតបក្សប្រឆាំងមួយនេះ ។
ជាក់ស្តែងក្នុងការបោះឆ្នោតឆ្នាំ២០១៨ អតីតមេបក្សប្រឆាំងលែងផ្តល់តម្លៃនៃឆន្ទៈរាស្ត្រជូនបងប្អូនតទៅទៀតហើយ ដោយឃោសនាឲ្យប្រជាពលរដ្ឋនៅផ្ទះមិនទៅបោះឆ្នោត ។ ចំពោះឆន្ទៈពលរដ្ឋដែលបោះឆ្នោតគាំទ្រអតីតគណបក្សសង្គ្រោះជាតិត្រូវបានលោក សុខ ឥសាន បានបញ្ជាក់ថា «ឆន្ទៈរាស្ត្រជិត៣លាននាក់ដែលមានតាំងពីឆ្នាំ២០១៣ នោះបានរសាត់ទៅឆ្ងាយពីអតីតបក្សប្រឆាំងរួចហើយ ហើយងាកមកគាំទ្រគណបក្សប្រជាជនកម្ពុជាវិញធ្វើឲ្យគណបក្សប្រជាជនកម្ពុជាគ្រប់គ្រងអាសនៈទាំង១២៥នៅក្នុងរដ្ឋសភា នៅក្នុងការបោះឆ្នោត២០១៨កន្លងទៅ ។
ដូច្នេះឈប់និយាយពីឆន្ទៈរាស្ត្រជិត៣លាននាក់ដែលចាកចោលអតីតបក្សប្រឆាំងនោះតទៅទៀតទៅអត់ផ្លូវទេ លែងមានទៀតហើយ ។ ការលើកឡើងរបស់អ្នកនាំពាក្យគណបក្សកាន់អំណាចនេះ ខណៈដែលមន្ត្រីជាន់ខ្ពស់គណបក្សសង្គ្រោះជាតិបានលើកឡើងថា បក្សកាន់អំណាចបានសម្លាប់បក្សប្រឆាំងនៅកម្ពុជាត្រូវតាំងតែពីឆ្នាំ២០១៧មកម្លេះ ៕
ចែករំលែកព័តមាននេះ